Thursday, 15 June 2006

Not The End

1صدمات و ليست الاخيرة

مبدأيا انا فاضي و مش ورايا حاجه و حقول كلام أعتقد ان دي اول مرة حقول فيها الكلام ده ؛حقول صدمات اتصدمتها في حياتي علشان أفرغ الشحنه الي في داخلي شويه الواحد كل يوم بيتعلم و يفتكر انه كده خلاص عرف كل حاجه مش معقول حيشوف اكتر من كده حاجه ؛ و لكن في الاخر يكتشف انه لسه مكتشفش حاجه و لسه حيشوف كتير ....
أنا حتكلم شويه عن اتحاد العام الماضي (مش اتحاد هذا العام) ده لانه علي الاقل بالنسبه لي كان ملئ الصدمات .
مبدئيا أنا سمعت ان في حاجه اسمها الاتحاد و انا لسه في سنه تانيه ؛ و انا كعادتي عندي حب استطلاع قررت ان ادخل الاتحاد و اشوف الاتحاد ده بيتعمل في ايه ؟ ....لما دخلت في قاعه الانتخابات و التصويت و طلعت منها و انا عضو اجتماعي في اتحاد الطلاب كنت في قمه الذهول و الاندهاش و الصدمه و مش مصدق الي ادامي كنت متوقع ان الكلام الي شوفتو في القاعه ده بيحصل في الافلام بس.......... اقولك حصل ايه في القاعه :
لما دخلت القاعه دي فوجئت بواحد (طالب الي اصبح وقتها امين الاتحاد الامين ده حاجه زي الرئيس) بيقولي لو عايز تكون عضو في الاتحاد تصوت لمحمد امين الجنه الفلانه و مش عارف مين للجنه العلانيه و كده لكل لجان الاتحاد و بيقولي لو معملتش كده محدش حيصوتلك و مش حتاخذ أي حاجه كده –حسيت ساعتها اني في حلم او كابوس - و دي كانت اول صدمه ليا في الموضوع ده .
المهم صوت لفلان في كذا و مش عارف مين في ايه . عملت زي ما قالي و حسب ما هو قالي كان المفروض اصوتله مساعد الامين للاتحاد(زي رئيس الوزراء كده) و فلان الفلاني امين الاتحاد (رئيس) و لما جيت اصوتله حصلت منه حركه خيانه و قالي لا لا انت فهمت غلط انا حكون الامين و صوتله زي ما قالي الامين و انا في دهشه من الي بيحصل في القاعه مش مصدق الي بيحصل و المهم كرر كلامه مع باقي الناس و بقي حضرته الامين . و دي كانت صدمتي التانيه . المهم انا طلعت من لجنه النفاق دي و انا مليان صدمات . قولت لنفسي مش مشكله شكل الناس ماشيه كده مش افلام بس المهم يا احمد تعمل حاجه كويسه للناس .
لان ربنا حيسألك عن المنصب ان انت شغلته ده يوم القيامه . استنيت شهر مستني حد يقولي ان في اجتماع علشان تعمل حاجه و لكن محدش كلمني . قولت استني شويه يمكن يكونو مشغولين في حاجات كبيرة انا مش قدها دا انت يا احمد مهما روحت ولا جيت عضو لا منصب ولا حاجه . فات الترم الاول و مفيش حاجه روحت كلمته و قلتله علي التنفيض ده قالي انت عارف الترم الاول صغير و كده الترم ده ان شاء الله حنعمل و حنعمل و في الاخر ..لقيت محدش بيعمل حاجه ولا حتي هو او بيعمل حاجات لا تذكر ..أكتشفت انه مش عايز المنصب علشان يشتغل طلع عنده الداء بتاع كل العرب الا و هو داء حب كرسي العرش ...مش مهم هو قد المنصب ولا لا هو ارتاح لما وصل اليه و خلاص كده ارضي غروره مش مهم علي حساب مين او لحساب مين ...و كانت دي صدمتي التالته .المهم طلعت من اول تجربه لي في الاتحاد ب 3 صدمات علمتني كتير في الحياه ....ازاي افهم الناس ....ازاي الناس بتفكر ...

الصدمه الاولي : لاسف اكدت لي ان الطرق للقمه بالطرق الغير مشروعه اسهل الطرق .

الصدمه التانيه: اني مش اثق في أي حد بسهوله خالص ممكن يكون بيبتسم ليا علشان اثق فيه و لما احط وجهي الناحيه التانيه يضربي بسكين و يطعنني (الخيانه ) .

الصدمه الثالثه : علمتني ان الضمير منعدم في قلوب كثير من الناس.او بمعني ثاني ان الي مش منطقي انه يحصل سهل انه يحصل دلوقت . و ان الواحد ممكن يدوس عليك علشان يطلع لفوق مش مهم الي داس عليه ده ايه ...

انا بقول الكلام ده وو انا كلي حزن مما يحدث بس انا بقولها علشان اوفر عليك طريق صعب ممكن متكنش مشيت فيه ..

No comments: