Monday, 14 February 2011

Valentine Day عيد الحب

بالنسبه للعشاق الذين ينتظرون اليوم من العام الماضي لكي يتم صرف ما في الجيبو شراء ورده حمراء
الحب معنى ان لم تلمسه طوال العام فلا معنى له :)

Sunday, 13 February 2011

تغطيه مدعومه بصور عن اول يوم نظافه في ميدان التحرير

مع انتهاء العصر المباركي انتشرت علي نفس الشبكات التي أسقطت النظام وهي الفيسبوك و تويتر دعوات وحملات للذهاب (السبت 12-2-2011 ) لتنظيف ميدان التحريرالذي أغلق منذ جمعه الغضب و اعتصم فيه المتظاهرون..
و ذهبت كباقي الشباب بالمقشه و الجروف لنبدأ حمله تنظيف الميدان.. اريد ان اوضح حجم الدمار الذى لقي بالميدان بعد حريق العديد من السيارات و عدد من سيارات الجيش و تكسر و تدمير للارصفه و انتشار الحصى و الزلط و قطع الصخور التي اتى بها بلطجيه معركه يوم الاربعاء التي راح فيها اكتر من 1000 جريح و بعض الشهداء الذين كانوا يدافعون عن انفسهم و هم عزل تماما و امامهم الخيول و السيوف!! 
اسف جوده الصور مش قويه و مكنش في بالي اني حعمل تدوينه اوثق فيها الكلام دا :) و للعلم الطوب دا كدا قليل جدا بالنسبه لباقي الرصيف كان بيصل في بعض الاحيان ان الرصيف مش ظاهر من كثرة الطوب

سيارة متفحمه و يوجد منها في الميدان اكثر من واحده


 أنا مش عايز أطول في الموضوع و الصور حتشرح نفسها ان شاء الله .. 
النهارده في التحرير كان فيه ألوف من المقشات و جروف (معرفش جمع جروف ايه :D ) علي الاقل.. طوائف كتيره و إن كان أغلبهم الشباب (ولاد و بنات) ممشيوش الا لما كنسوا الشوارع و بعضهم كمان اتمسح بالميه و غسلو تمثال عبد المنعم رياض و طلعت حرب بالصابونه و كمان أسدين قصر النيل و مسحوا كل الشتايم الي علي الجدران و دهون الارصفه الي عند عبد المنعم رياض و طلعوا عشرات الاطنان من الزباله في شكاير... كلها بالجهود الذاتيه و الذاتيه تماما .. شكرا شباب مصر الي اثبت شهاته طول الشهر الماضي في اشكال كتيره .. و الي لسه ادامه طريق طويل :)
برضو اخذت بالي ان فيه جمعيات زي رساله مدينه نصر و غيرها نزلوا في مجموعات للمساهمه في حملات النظافه و مش للتحرير بس. و الي عرفته كمان من بعض اصدقائي ان جمعيه رساله دلوقت عندها حملات عديده لإعمار الخراب الذي اضر المنشأت العامه زي مثلا اليوم كان عمليات ترميم لمقر شرطه في مدينه نصر و كان فيه شباب بتدهن..لو  عايز تشارك ببساطه ممكن تلتحق بأقرب مقرة رساله من بيته و ممكن برضو تدوروا حتلاقي جروبات كتيرة علي الفيس بوك لنفس الهدف.. و علي فكرة ممكن تجمع اصحابك و تشتغل انت من نفسك في مكان شايفه محتاج لجهدك :).
من اكثر الصور الي ذهلتني واحد اجنبي و معاه صديقته كانوا شغالين معانا ولا كأن دي بلدهم.. :)

جموع من الشباب:)

انا و معايا السلاح :) و الكيس الاسود الي رابطه في البنطلون فيه العده .. مجموعه قفازات و كمامات علشان لو حد احتاج :)

بعض اكياس القمامه و كسر الصخور

بعض اكياس القمامه و كسر الصخور

دهان الرصيف بعد الكنس و ازاله اكياس القمامه



تمت المهمه بنجاح.. كل واحد عمل حاجه و كلنا منعرفش بعض و لكن متفقين علي هدف و فعلا وصلناله :)
مجموعه من البنات استخدموا المقشات في عمل اخر و هو منع حد من استخدام الرصيف لغايه ما ينفش :)

شباب بيغسل الشهيد عبد المنعم رياض بالفرشه و الميه و الصابونه :)

اكياس قمامه اخري

بعد ما مهمه الغسيل للتمثال تمت مسكوه علم بلاده :)

من النهارده دي بلدك أنت ،مترميش زباله، متكسرش إشارة ، ماتدفعش رشوه، متذورش ورقه ..
أبدأ التغيير الذي تريده في مصر بنفسك اولاً..

روابط ذات صله : محاوله تعدي بلطجيه علي ميدان التحرير بعد تنحي الرئيس

محاوله تعدي بلطجيه علي ميدان التحرير بعد تنحي الرئيس

أمس (السبت 12-2-2011) في حدود الساعه الثالثه عصراً بعد مرور أقل من يوم علي انصرام عهد سياده الرئيس محمد حسني مبارك و الشباب في أول يوم لهم في تنظيف الميدان و إذا هناك هجوم من خارجين عن القانون (مجموعه بلطجيه) حاولوا دخول ميدان التحرير من جهه عبد المنعم رياض و حاولو ترويع المواطنين بنفس الطريقه الخسيسه ليوم الاربع (معركه الجمل) ولكن بدون جمال او دواب و لكن بالعصيان والتي يعود بعضها للامن المركزي و بواسطه تخبيط العصيان في حديد الاسوار من اماكن مختلفه لاصدار اصوات عاليه من اكتر من مكان لترهيب الناس.
بعض الحواجز الحديديه التي وضعها المتظاهرين لتأمين مداخل و مخارج مدخل عبد المنعم رياض و حتي لا تحدث مذبحه اخري شبيه بمعركه الجمل (يوم الاربع) و قد استغل الخارجين عن القانون هذه الحواجز لترويع المواطنين بمحاوله كسرها و القرع عليها بالعصيان ليصدر منها اصوات عاليه
 ادرك الموضوع من بدايته و شممت رائحه الخيانه .. و ذهبت ركضاً الي اقرب ظابط جيش علي كتفه نسر و نجمه .. و قالي متقلقش تلاقيهم شويه بلطجيه .. :D صراحه انا استغربت من بروده في الرد !! 
و لكن في اقل من 20 ثانيه لقيت جنود كتير بتخرج .. أنا مش عارف دول خرجوا من فين !! كما في الصور هنا :)
 


و خلال اقل من 3 دقايق خرجت كتايب جيش و مسكوا منهم جزء و بعضهم الدم سايل من راسه و امنوا المكان بطريقه اقوي من الاول .. صراحه كنت فخور جدا بالجيش و فعلا الجيش مدرب تدريب عالي منظم فعلا الجيش لسه بألف بخير :)
و قرروا بعد تأمين المكان و قهر الخارجين عن القانون اخراج جميع الحواجز الحديديه من المكان كما هو في الصورة هنا حيث طلب الجيش من الشباب المساعده في رفع الحديد و بالفعل تم ذلك . 


و بالفعل انتشر صفوف من الجيش لتأمين المكان بأنفسهم كما في الصورة و كان منهم رتب ظباط كتير .. صراحه كنت فخور جداً .. العمليه كلها من اول ظهورهم حتي تم سحقهم مخدتش 10 دقايق .. جيشناً قوي و مدرب و مجهز بشكل منظم و سريع  :) ..
 روابط ذات صله :

تغطيه مدعومه بصور عن اول يوم نظافه في ميدان التحرير

Friday, 11 February 2011

للجمعه الثانيه :المسجد النبوي الشريف يدعو بأن يعم الامن في مصر و يحفظها و ان يحقن دمائها.