Monday, 12 February 2007

شويه جد

بسم الله الرحمن الرحيم
ابدأ الكلام بالصلاه علي اشرف الخلق ....صلي الله عليه وسلم .رجاء خاص ...كمل المقاله للاخر ....لان هي مش بتتكلم عن حاجه واحده ...هي بتتكلم عن كذا موضوع جوه بعض بس انا معرفتش افصلهم من بعض ..
طبعا ً الكل عارف ليه الصورة دي ليه هنا ...

ايوه باب المغاربه...القدس الشريف ...أستهانه بالمقدسات وده شئ مش غريب بعد اهانه الرسول و القران و المسلمين و كل حاجه عندنا ....كالعاده مظاهرات في كل العالم المسلم ...استنكار و إدانه ....مطالبات للامم المتحده و منظمه المؤتمر الاسلامي...و غيرها الكثير حتي بابا الاسكندريه اتكلم عن الموقف الحرج دا .

ولكن يا تري ايه كان الرد من حكومه اسرائيل الله يهدها ....مواصله عمليات الحفر بأسرع ما يمكن وسط إجراءات مشدده.مش حتكلم عن الاصابات او الخساير لانها مبقتش بيفرق معانا قوي :( .
السؤال دلوقتي
أحنا حنعمل ايه؟ولا عملنا ايه!!!!!!!!
أنا بقول الكلام دا و بوجه ليا في المقام الاول ...يا رب يكون خالص لوجهك الكريم .
هل الدعاء كفايه ؟
هل ان الواحد يزعل دا كفايه ؟
هل الصلاه كفايه ؟
هل اني ميكونش ليا دعوه دا كفايه ؟
ولا ايه .... انا لما بفكر في الكلام ده برد علي نفسي بحاجات كتير .
في المقام الاول اكيد الالتزام بألي قال عليه ربنا دا مفيهوش نقاش .
و برضو الدعوه بنيه صادقه .
و حاجه تانيه لازم الواحد يبقي قلبو علي غيره ...مينساش اخوانه الي بيتهانو في كل مكان و في كل وقت من غير ما يأثر علي عزيمته في الدنيا ولا اهدافه علشان ميكونش عامل سلبي عليه ....لازم يحول الموقف دا للوضع الايجابي له علي قدر المستطاع مش العكس .
و برضو في حاجه تانيه متوافقه مع الكلام الي فات .كانت المعيده مي جزاها الله خير كانت بتقولها دايما . و هي مأثرة فيا او فاكرها لغايه اليوم . كانت دايما بتقول ملكش دعوه باللي حواليك ...متكونش سلبي ...غير من نفسك ... دايما حتلاقي ناس حقوده في كل مكان ملكش دخل بيهم .......... حاول تكون قدوه لمن حولك .............
حاجه مهمه مهمه مهمه جدا و يمكن عشانها انا كتبت الكلام دا دلوقت .
المقاطعه ثم المقاطعه ثم المقاطعه ....
سلاح قوي بس نستعمله صح ... و نستعمله كلنا ....
#هل تعلم ان خسائر المنتاجات الامريكيه في مصر عشرين في الميه لما كانت المقاطعه شاده حيلها في مصر .
#من امتي كانت شركه بيبسي وكوكاكولا بتعمل الكم الرهيب دا من الاعلانات رغم انهم الشركتين الي مسيطرين علي سوق المياه الغازيه في مصر !!!!!!!!!!!
#ايه الي خلي عاطف عبيد يتصور مع منتاجات مسحوق اريال و ينزل في الجريده اليوميه ؟!!!!!!!!
انا مش حدخل في درس اقتصاد .
اسمعني للاخر ...اولا المقاطعه مش فرض و لكن نوع من انواع الجهاد .
حاجه كده تثبت بيها ادام نفسك انك لسه ماسك علي دينك...
حاجه كده ممكن تحسسك بحاجه لا تذكر من شعور المسلمين الي بيموتو و يستشهدوا كل يوم .
شعور واحد كل اهلو بيموتو ادام عنيه او ام اصبحت ثكلي ...
مش كل حاجه ليها بديل في المقاطعه و انا مش بقولك قاطع كل حاجه ولكن قاطع علي قد ما تقدر .....
بدل ما تحس بضيق لانك مش بتشرب بيبسي مثلا غير ان في بديل ...حاول بدل شعور الضيق بشعور بالفرحه بأنك تحتسبه عند الله خير و حسنات ....ولا الجهاد مش عليه ثواب . ...العمليه عمليه نفسيه و انت بإيدك تحول عمليه المقاطعه لفخر و سعاده و اجر بإذن الله...
حاجه بقي بعيده قوي عن الموضوع .اكدت ليا و الزمتني بالمقاطعه ...
مشهد مر من حوالي اسبوع لم افهمه الا اليوم و انا بين هذه السطور .
تحديداً الموقف دا كان لما كنت في الام دي سي مؤتمر مايكروسوفت و كان فيه انا و معظم اصحابي من الكليه بناخذ صور جماعيه مع المحاضرين العالميين الي جابتهم مايروسوفت ....باترك و استيفن و كذا واحد تاني ..
المهم ستيفن كان مهيس قوي و عمال يهزر معانا...و في نص الهزار سأل مين بيحب جورج بوش..... محدش رفع ايده الا هو .....و سأل بعدها مين بيكرهو...طبعا كلنا رفعنا ادينا ...بس و خلص الموقف علي كده و كملنا تصوير معاه ....
سألت نفسي هو جه هنا ليه ؟؟؟؟؟؟؟
هل علشان سواد عيون مصر .
ولا علشان يدي المحاضرة بتاعتو و ياخد فلوسو و يمشي ..؟؟؟
طبعا ..اكيد التانيه ...امال ليه بقي انا مستغرب انه بيحب بوش الله يحرقه .
قولت لا دا اكيد كان بيهزر والاعلام الامريكي كمان بيقول ان الناس مش يتحب جورج بوش ..
رجعت و قولت طب ازاي و هو من الرئساء القله الي اخدو فترة رئاسيه تانيه في امريكا ؟؟!!!!!!!!!!!
المهم انا مش حعمل تحقيق و اقول يمكن كان قاصد يشوف رد فعلنا علي السؤال حيكون ازاي ؟؟؟؟

الخلاصه :
نبطل انبهار بالكلاب دول .و نبطل نفتكر ان مجبتهمش ولاده ......هو من حقو يحب بلده و يدافع عنها ....
احنا كمان من حقنا نحب بلدنا وندافع عنها و عن اسلامنا في كل مكان و ديننا الي اصلا احنا في الدنيا دي علشانه .
اهو الراجل بيحب بلدو و بيقولها ادام العالم كله..........
احنا بقي ايه الدليل علي حبنا لبلدنا و لديننا .........
و في الاخر يا ريت تفكر في المقاطعه تاني ....
تمت...

2 comments:

thabet084 said...

أنا معاك في المقاطعه يا أخ عيسوي
بس فيه حاجه أنا عن نفسي لما بتفرج علي الحاجات ده علي قناة الجزيره أصبح شيء عادي وقلبي أصبح متبلد مش عارف ليه


غثاء كغثاء السيل

Ahmed Essawy said...

كلمه تبلد دي ليها معاني كتير قوي في الوضع الي انت فيه .
ممكن كلمه متبلد دي تفسرها انها خلاص لا يمكن تصدق او تحب العدو يعني زمان كان مثلا في اعجاب بحاجه و حاجه لا اما دلوقتي تبلد من ناحيتو نهائي.
و ممكن تفسرها بأن زمان كنت بتزعل علي المسلمين و دلوقت لا و دي حتي لو شعرت بيها فدا شعور مش حقيقي خالص دا تفكير مؤقت و ممكن وساوس شيطان
و اكبر دليل انت بتقول حتعمل مقاطعه
لو بجد قلبك متبلد صحيح بالمعني التاني كان عادي بالنسبالك ما هي مش فارقه بلا مقاطعه بلا بتاع
هو صحيح قلبك بقي بيستحمل المشاعر الي مكنش بيقدر يستحملها زمان لانك شئ عارفو و حفظتو كل شويه يغيرو الصورة بس نفس المضمون مفيش مشاعر جديده لان مفيش حاجه جديده المشاعر دي خلاص اتولدت عندك
انا بأكدلك و بأكد لكن واحد مسلم و بيحب دينه عمرك ما حتقدر تنسي او يتناسي هم دينك الا لو انت واخد الدين صورة وخلاص
=======
الحمد لله الذي جعلنا مسلمين و يا رب يصبرنا علي ما نحن فيه و يقوينا
و في النهايه اختم بجزء من دعاء الحرم المكي للشيخ السديس
اللهم أعز الإسلام والمسلمين , وأذل الشرك والمشركين , ودمّر أعداء الدين , واحمِ حوزة الإسلام , واجمع كلمة المسلمين , على الحق يا رب العالمين . اللهم انصر دينك , وكتابك , وسنة نبيّك , وعبادك الموحدين .اللهم أعد المسجد الأقصى لرحاب المسلمين , اللهم طهّره من اليهود الغاصبين , اللهم عليك بهم فإنهم لا يعجزونك يا قوى يا عزيز .اللهم مُنزل الكتاب, مُجرى السحاب, هازم الأحزاب , سريع الحساب , اهزمهم وزلزلهم يا قوى يا عزيز يا وهّاب