Wednesday, 8 August 2007

وفاة المدونه شيماء

بصراحه انا مش عارف ابدأ من فين !!!!!!
افكار كتيره عماله تدور في دماغي ....
حاجات كتيرة مرة واحده بفكر فيها مع بعض ...
سلسله احداث بتخيلها برضو مع بعض ....
الحاجه الوحيده الي شايفها دلوقت هي حاجات مشوشة ملهاش ملامح .
الحاجه الوحيده الي سامعها هي ضوضاء حوليا رغم اني قاعد لوحدي و مفروض الدنيا ساكنه .....
بس ....!!!!


اليوم و كعادتي بلف علي المدونات الي بحبها من الجوجل ريدر ... كان في دماغي مدونه معينه اسمها شيكو ... ملقتهاش منزله حاجه جديده و اخر حاجه كانت كاتباها
مقاله بتقول فيها انها حتغيب لاجل لا يعلمه الا الله لانها بتمر بوعكه صحيه ... و انها حتحكيلنا تفاصيلها لما تشفي ....

لفت نظري كميه التعليقات علي البوست دي و كانت الصدمه ...
اخوها بيقول انو شيماء توفت من حوالي 10 ايام و هي كان وصيتها ان الخبر دا يتنشر علي البلوج و تقرؤا عليها الفاتحه .

مش عارف انا مصدوم ليه دلوقت ... علشان انا اول مرة اشهد نهايه بلوج ...

ولا علشان رغم اني مقابلتش الشخصيه دي ( شيماء) .. الا اني من خلال متابعتي للبلوج حاسس اني اعرف عنها كتير... انسانه توفت عن عمر تناهز 28 عاما غير ان يربطنا بها مجال عملها فهي تعمل في التصميمات الجرافكس ... فهي بتعرف تعبر عن الي عايزة تتكلم عنو و كلامها موزون و عاقله و راسيه جداً ....مش بتقول أي كلام و خلاص ....

و لا لان الموت جه بغته ...

ولا علشان كنت فاكر ان زيها زي معظم الناس مش بيموتو دلوقت (الناس الكبيرة بس الي بتموت) ....

ولا علشان خايف اسمع حد تاني يموت كدا برضو ...

ولا اني ممكن اكون مش مدي ربنا حقه !!!!

ولا لاني مكنتش متخيل ان في حد ممكن يكتب في البلوج بتاعي و مقدرش اكومنت عليه ...

ولا لاني رغم اني مخصص جزء من وصيتي خاتمه لبلوجي لما ربنا يقبض روحي الا اني مكنتش متوقع ان هيجي اليوم دا ؟؟؟؟و يمكن قريب كمان ...!!!!!!مكنتش متخيل الزحمه الي عندها في البلوج لما توفت فين الناس من قبل كدا...

رساله بوجهها لينا قبل ما اوجهها ليكو .... ياريت كل واحد يحاول يراجع نفسه ..... ميعملش حاجه مش مقتنع بيها و يقول العمر مديد كلنا فاكرين محمد عبد الوهاب بتاع الكروة 22 سنه .... لو كل واحد بص بجد علي الي حوليه اكيد حيلاقي حاجات زي كدا ...يا تري لو مت دلوقت حيكون شكلك ايه و انت مش عارف تتحرك من مكانك اساساً و الناس من حوليك بتشفق عليك .....يا تري ربنا راضي عننا دلوقت .... يا تري الرسول عليه الصلاه و السلام فرحان من الي شايفه بيصدر منك ...

بجد انا مش عارف انا كدا بختم مقاله ولا ببديها ..... بس كفايه عليا و عليكوا كدا ... يا ريت نراجع نفسنا تاني ....

ياريت تحققو وصيه شيماء و تقروا عليها الفاتحه .
اللهم اغفر لها وارحمها وعافها واعف عنها وأكرم نُزُلها . ووسع مُدخلهاُ . واغسلها بالماء والثلج والبرد ، ونقها من الخطايا كما ينقى الثوب الأبيض من الدنس ، وأبدلها داراً خيراً من دارها ، وأهلاً خيراً من أهلها وزوجاً خيراً من زوجه وأدخلها الجنة وأعذها من عذاب القبر ومن عذاب النار .

في مقالتين من مقالتها معلقين في دماغي حاليا اتكلمت فيها عن موتها ... بس ياتري هي كانت عارفه دا !!!!!!!!
http://shikoonline.blogspot.com/2007/02/blog-post_05.html
http://shikoonline.blogspot.com/2007/07/blog-post.html

و دا كلام واحده من المدونين عنها (مدونه انسانه)
شيماء توفت يوم السبت اللى فات بعد ماخفت من مرضها .. توفت قضاء وقدر ، كانت بتسلم على كل اصحابها وزمايلها فى الشغل وقرايبنا وكأنها حاسه باللى هيحصل ، كانت مخططة تروح عمرة وكانت بتصلى حتى وهى فى المستشفى ، كانت ثابتة ومتماسكة وكانت هى اللى بتحاول تصبر اللى حواليها
توفت وهى عندها 28 سنة ياجماعة .. لا اتخطبت ولا اتجوزت ، توفت بعد ما خفت من مرضها سبحان الله .. عشان نعرف ان كلنا ممكن نبقى فى نفس موقفها وان الموت مالوش اسباب ولا له سن معين
وكم من فتى امسى واصبح ضاحكاً .. وأكفانه فى الغيب تنسج وهو لا يدرى
انا فقدت اخت عزيزة جدا عليا والمجتمع التدوينى كله فقد مدونة من المدونات المحترمة جدا .. وببلغ تعازيا وتعازي كل المدونين لأهلها .. ربنا يفرغ عليكم صبرا .. يارب آمين

9 comments:

omar مشروع بطل said...

اللهم ارحمها وارحمنا اذا ما صرنا الى ما صارت اليه ..

Anonymous said...

ربنا يرحمها ويجعل مثواها الجنه ويصبر اهلها ...

radwa said...

لا حول ولا قوة الا بالله العلى العظيم
انا لله وانا اليه راجعون
اللهم ارحمها وانر لها قبرها

m.m.e said...

ربنا يصبر اهلها ويرحمها ويوسع قبرها .........ويرحمنا اذا صرنا الى ما صارت اليه

بندقه said...

الله يرحمك يا شيماء
اللهم ادخلها فسيح جناتك

فعلا انا مش عارفه ليه الخبر ده ماثر فيا جدا
رغم انى ماكلمتهاش غير تقريبا مرتين

بس فعلا كون ان مدونتها هتفضل مفتوحه وماحدش بيكتب فيها ولا حد عارف يقفلها ده مينى شعور غريب كده مش قادره اوصفه

الله يرحمك يا شيكو

moataz said...

ربنا يرحمها يارب
والله من ساعة ماقريت الموضوع
وانا خايف جدا
ومقدرش اعمل حاجه غير انى اقول ربنا يرحمها ويغفر لها ويجعل قبرها روض من رياض الجنه
وانا نقلت الموضوع عندى فى البلوج وذكرت المصدر
واتمنى انك متتضايقش منى
لعلها تبقا عظة للناس زى ما انا حصلى دلوقتى
وشكرا ليك

moataz said...

ربنا يرحمها يارب
والله من ساعة ماقريت الموضوع
وانا خايف جدا
ومقدرش اعمل حاجه غير انى اقول ربنا يرحمها ويغفر لها ويجعل قبرها روض من رياض الجنه
وانا نقلت الموضوع عندى فى البلوج وذكرت المصدر
واتمنى انك متتضايقش منى
لعلها تبقا عظة للناس زى ما انا حصلى دلوقتى
وشكرا ليك

Ahmed Essawy said...

@ Motaz

مفيش مدايقه ولا حاجه طلاما انت كاتب المصدر .
و شرفتناو تنور في اي وقت يا معتز .
علي فكرة انا شوفت المدونه بتاعتك ماشاء الله التصاميم فيها جميله .
.
الا صور البنات المتبرجه الي فيها لاني اعتقد ان دا حرام ....

moataz said...

الله يخليك يا احمد
وهشيل الصور دلوقتى اللى فيها بنات ان شاء الله
الله الغنى ياعم هههههه
وشكرا على زيارتك