Wednesday, 13 February 2008

TOEFL التوفل

تنويه : اسف للتأخير في الرد علي اصقائي و جيراني من البلوجات المجاورة :d لانشغالي الفترة السابقه و القادمه:D:D ... .

قبل بدأ الحديث عن التوفل .... لازم اشير ان في الوقت الحالي و الالفيه الجديده التي نعاصرها .. و اللغه الانجليزيه تزداد اهميتها يوم بعد يوم ... و بمناسبه قدوم العام الجديد الفين و تمانه ... لقيت نفسي بعرف الانسان الامي بناء علي نظره المجتمع للامي حاليا انو الفرد الذي لا يجيد مهارات اللغه الانجليزيه او استخدمات الكمبيوتر ... ايوه الكلام دا بجد مش هزار .... مبقاش كفايه دلوقت ان الواحد بيعرف يكتب و يقرا عربي بس ... اللغه العربيه علي عيني و راسي ... لغه القران الكريم و السنه المشرفه.... و لكن للاسف العربي دلوقت بقي لغه النصوص و الاشعار و الاعمال الادبيه ...
اكتر من كدا لا .... مش حقول صعب بس ... لا دا شبه مستحيل انك دلوقت تعرف تحصل علوم باللغه العربيه ...
عايز تعرف انت امي ولا لا ؟؟؟؟ اسأل نفسك عن مستواك و مهاراتك في اللغه الانجليزيه و الكمبيوتر ...
انا دلوقت حتكلم عن التوفل كشهاده معترف بها دوليا لقياس مهارات اللغه ... و ان شاء الله مرة تانيه ممكن ابقي اتكلم عن الرخصه الدوليه لقياده الكمبيوتر كشهاده اخري معترف بيها دوليا في استخدمات الحاسوب ...

الاسم و الاختصار :
توفل TOEFL المقصود بأختصار هذه الحروف هو اختبار الانجليزيه كلغه ثانيه ...يعني الاختبار دا لكن الناس الي اللغه الاولي بتاعتهم مش انجليزي ....

الهدف منها :
قياس مدي المهارات السمعيه و الكتابيه و احترافيه الفرد في التعامل بالانجليزيه .

المستخدمون الحاليين لها :
بصفه اساسيه ... طلاب الحامعات و المنح الدراسيه و رجال الاعمال و العديد من المناصب في الحكومات و الشركات ..

اشكال الامتحان :
هناك نوعان من الاختبار ... الاول ورقي ... يعني علي ورق ... بتاخد كراسه اسئله و بتحلها ...
التاني : بيكون اون لاين علي الكمبيوتر ... مش ورقي يعني :) .

بالنسبه للاختبار الورقي ...
لان دا الي عندي خلفيه عنو..
بيكون اربع اقسام ..
الاول : استماع . خمسون سؤال متعدد الاختيارات . 35 دقيقه .
الثاني : القواعد و التعبيرات الكتابيه . اربعون سؤال متعدد الاختيارات . 25 دقيقه .
الثالث : قراءه مواضيع و الاجابه عليها . خمسون سؤال متعدد الخيارات .55 دقيقه .
الرابع (اختياري يعني ممكن تعمل الامتحان من غيره )اختبار المهارات الكتابيه . مقال واحد .30 دقيقه .

كيفيه الاشتراك في الاختبار :
داخل الجمهوريه العربيه المصريه .. هناك العديد من الاماكن التي تستطيع من خلالها اجتياز الاختبار ..
اشهرها مركز امديست - 23 شارع مصدق- الدقي.
www.amideast.org

كيفيه حساب الدرجات :
اولا مفيش حاجه اسمها درجه سقوط في الاختبار ... الاختبار بيعملك تقيم ليس اكثر ... انت بقي لما بتروح تشتغل في مكان او حاجه كدا ... بيطلبو اكتر من درجه معينه ... كل مكان حسب متطلباته ....
مدي الدرجات في التوفل بيكون من 217 كحد ادني الي 677 كحد اكبر .

سعر الامتحان :
و الله انا شخصيا مش عارف كام بالظبط و لكن هو في حدود 500 ج للامتحان ال local .
و اعلي شويه للامتحان ال international .
اظن الفرق واضح من الاسم ... واحد علي مستوي دولي و التاني محلي .

السؤال المنطقي دلوقت :
اعمل ايه علشان اجتاز الامتحان بدرجه كويسه ... او بمعني تاني اعمل ايه علشان احضر نفسي قبل الامتحان و مدفعش فلوس الامتحان علي الفاضي ؟
لو شايف نفشك كويس ممكن تروح تعمل امتحان قياس مستوي توفل من المعهد الي اشرت ايه فوق ب 50 جنيه لو شافوك كويس ممكن تدخل الامتحان علطول ... لو كنت كويس بس عايز احسن ... ممكن تاخد عندهم كورس 5 اسابيع ... اسمه تحضير ما قبل التوفل ...
اما لا قدر الله لو كنت مش تمام .... حتضطر تاخد كورسات general و ترجع في الدايرة دي من تاني .

لو كنت مش عايز كورسات و عايز تتعامل مع نفسك في عندك كتاب نظيف جداً بيحوي علي امثله للاختبار و قواعد و و تعليمات ... انصح كل واحد عايز يجتاز الامتحان انو يعدي عليه الاول ...
و عموما هو بيجي معاه 7 شرايط استماع (موجودين عندي علي اسطوانه كمبيوتر )و اكتر من الف سؤال علي سي دي تاني ...
عموما الاتنين عندي :) لو حد عايزهم .
اسم الكتاب
Longman Preparation course for the TOEFL® Test
و دا لينك الكتاب من امازون


7 comments:

عصفور المدينة said...

جزاك الله خيرا على تشارك المعلومات

Bongo said...

Nice post , and important info ..
awel zyara lel Blog , hopw not the last

My greetings ..

HoNdA said...

جزاكم الله خيرا يااحمد انا فعلا ناويه اخدها بس بعد ماخلص الكلية لان مش دى اولوياتى حاليا بس فعلا زى ماقلت مفيش علم اقدر اخده بالعربى حاليا بالذات علوم الكمبيوتر
خدو العلم بلغه اهله

آلام وآمال said...

الف شكر يا احمد بجد على المعلومات القيمة دي انا استفدت فعلا لأني بحضر للاختبار ده حاليا

ربنا يوفقك ويعينك ويوفقنا كلنا
:)

moataz said...

شكرا ياعيسوى على المعلومات دى وفى زى ما انت قولت على شهادة الكمبيوتر اللى هى ال
icdl
مهمه بردووا
بس حلو اول مره اعرف الموضوع بالتفصيل

Ahmed Essawy said...

الي
عصفور المدينه
هوندا
الام و امال
معتز
بونجو

الشكر لله يا اصدقائي ...
يا رب تكون فعلا افادتكم و حازت علي اعجابكم
:)

اسف للتأخير الرهيب دا في الرد

Dr. Tarek Nofal said...

الأخ احمد
مجهود طيب لشرح لتويفل ولى بعض الاضافات لما ذكرته:
أولا: التويفل هو امتحان دولى بمفهوم الدولية أى أنه موجود بنفس الشكل والمالك والشهادات فى كل الدول، وخطأ منا نحن المصريين تسمية الذى يعتمد على الانترنت دوليا والذى يعتمد على الورق محليا وهيئة ETS
تطلق على الأول iBT
والثانى ITP (مؤسسى)
ثانيا: بالنسبة للمراكز المعتمدة للتويفل iBT
أشهرها وأهمها الأميديست بالدقى وكذلك مصرية بسوهاج ثم اكاديمية النيل بالمنصورة بخلاف بعض الأماكن التى انضمت مؤخرا فى بعض محافظات الدلتا والقاهرة واكتوبر
ثالثا: المراكز المعتمدة لامتحان التويفل المؤسسى فليس هناك بمصر سوى الأميديست لأنها وكيل حصرى بالجمهورية ومصرية بسوهاج لأنها تعاقدت مع أميديست حصريا بالوجه القبلى
رابعا: بخصوص الدرجات للتويفل (انترنت) من 120 درجة ولدينا فى مصر الحديث عن المطلوب 500 أو 550 لذا يوجد جدول لعمل التحويل بين الدرجات على الموقع
www.tareknofal.com
top-menu: MASRYA ITTS, then drop-down menu: Testing >> Test Scores.
خامسا: يفضل للحصول على أفضل الدجات بالاختبارات الدولية أن يحصل الممتحن على دورة تحضيرية بأحد المركز المعتمدة للخبرة الطويلة وللاستفادة من امكانيات المدربين المحترفين، وينصح مرة أخرى بالأميديست بالقاهرة، مصرية بسوهاج، اكاديمية النيل بالمنصورة
مع استعدادنا الكامل للرد على اى استفسار بهذا الشأن على0122178414