Saturday, 10 May 2008

خدعوك فقالو : علشان متضربش علي قفاك

انا بقي بنفي الكلام دا و بقولك سخن قفاك ... علشان الضربه متوجعكش .....
انا عارف ان اكيد في ناس مش حيعجبها الكلام دا ... بس بصراحه انا بجيب من الاخر ... و سخنت قفايا خلاص استعداداً لاي ظرف .....

انا واحد من الاف و ربما اكثر من ذلك .... الي قرا كتاب علشان متضربش علي قفاك (هذا الرابط من مدونه هوندا)... الي اكيد الكل سمع عنو ... و اخدتني الحماسه قوي و انا بقرا الكتاب ... قريت ان الواحد مثلا لو في كمين شرطه و لقي حد عايز يسحب الرخص ... لازم يكون ضابط .. و مش من حق حد يفتش العربيه بتاعتك ... الا اذا كان شكل العربيه مشبوه او معاه اذن و متحدد فيه رقم العربيه و حركات كدا و ان لو شكيت في شخصيه الي بيكلمك لازم تطلب منه الكارنيه بتاعو علشان تطلع عليه ...
قريت كلام كتييير كدا .. و قولت انا لو حد فعلا منهم استفزني حعامله رسمي ... يعني مثلا لو حاجه مش من حقو مش حسمحلو يعملها ... و كدا ....
و شوف بقي حضرتك الي حصل ...
يوم السبت الماضي ... 3-5-2008 علي طريق اسكندريه الصحراوي ... و انا و ثلاثه من اصدقائي راجعيين من الساحل الشمالي .. لقيت ناس لابسه لبس عادي ... بتوقف الناس ... مفيش أي حاجه تدل علي انها كمين ... مفيش حد فيهم لابس لبس شرطه نهائي ... ولا في دوريه واقفه ... و لا القراطيس البرتقالي ولا الهوا ... شويه ناس لابسه لبس مدني بتفتش الناس بطريقه مستفزه ...
لما جه الدور علي العربيه بتاعتنا .... نزلنا منها بطريقه متعتبرش ظريفه (اركن علي جنب بصوت عالي... بس متمشيش تاني .... اساسا لو كنا زودنا علي البنزين و مشينا مكنش حيجبنا لان معهمش حتي عربيه دوريه رغم انهم كانو كتير مش اقل من اربعه فتشو العربيه)... و سألنا جايين من فين ؟؟ و هل معانا ممنوعات و كرر السؤال دا كتير كرره لكذا حد علي انفراد... و بذكائه الرهيب ...فتش نص الشنط الي في العربيه تفتيش دقيق(مش فاهم يعني افرض الحاجه في النص التاني من الشنط ) ...لدرجه انو كان بيفتش في الاحذيه الي موجوده في الشنط ... و قعد يفعص في الفطير الي كنا اشتريناه من واحه عمر(مكان مشهور علي الطريق في الكيلو 111) و بعد كدا سابنا ...

بكل بساطه كل الي عملو معانا مش رسمي ... و في نفس الوقت محدش قدر يعملو حاجه .. ولا حتي نسألهم
انتو مين ؟؟؟ ببساطه هو لو عايز يودينا ورا الشمس ... لو حد مننا شد معاه ... كان رمي قرش حشيش في العربيه و قال انا لقيته معاكهم ... و كدا يبقي احنا خلاص !!!!

بس دا الي حصل ... و بناء عليه .... قررت اسخن قفايا ... ليهم .. بدل ما احرق في دمي و ابقي عارف ان ليا حق بس علي ورق ...

و بقولك : سخن قفاك ... علشان الضربه متوجعكش .....


8 comments:

fahd said...

اخي الصاوي

طبعا بغض النظر عن الاعلان الغير مدفوع الاجر عن واحة عمر اللي علي الصحراوي

لكن انت بتتكلم عن موروث موجود عندنا
امين الشرطه اللي ملهوش لمؤاخذه لزمه ليه مكانه كبيره قوي

تعرف انا كنت رايح الشغل بتاعي في صلاح سالم طبعا ده طرق الريس

واظاهر كان في تشريف ماشيه

وجيت اعدي لقيت واحد ظريف قالي ايه اللي في شنطتك افتحها

وهذا امر لو تعلم عظيم

انا عمر ما حد فتشني والحمد لله في اي كمين لو اخد من الناس بطايقهم مش بيشوفها عندي

انا كنت ببساطه كنت اقله انت مين وليه ومش هتفتشها

لكن انا كنت متأخر علي الشغل ومش فاضي
عايز انجز

رحت فاتحها كان فيها اللابتوب اعتقد ان دي اول مرة يشوفه ومش عارف ايه الفرق بينه وبين القنبلة ومشيت

ده كان تصرف سلبي مني
لكن اعلم ايه وانا في بدل مهووسه امنيا

لكن المفروض ندعو الناس للقوة وعدم الاستسلام

آفاق الحرية said...

ههههههههه
هو طبعا الموضوع ده بقي زياده عن الحد اوي
مش عارف ليه
بس هي بتبقي غلاسة وخلاص
هو ملوش هدف الا الغلاسة علي الناس

Ahmed Essawy said...

الي فهد
اولا انا اسمي احمد عيسوي
:)
مش صاوي

اهم حاجه انت قولتها كلمه مفروووض الي في الاخر ... لكن مش دا الي بيحصل و انا و انت عارفين ليه...

Ahmed Essawy said...

الي افاق الحريه
و الله مهوسه امنيا او احنا الي مهوسين ... مش حتفرق ...
:)

Ramy Mahrous said...

طبعا انت غلطان كنت تقولوا هات كرنهيك دا انا عسكري لو حد من المخابرات وقفني وانت طبعا عارف يعني اه المخابرات هقولوا هات كرنهيك ده غلط منك اكتر من اي حاجه تانيه

Sarah Abdul said...

Maknsh hi7salk 7aga lo sa2lto 3ala karnih @ least hatkon radit nfsak be enk msh mdrob 3ala afak .BTW kan fih 7dsa 7slt nas wa2fo banat we nzlohm men 3rbit-hom ys2lhom 3ala bti2hom we b3din e3tdo 3lihom we mot-hom. simply kan momken y7slko keda ysr2oko we b3din man3rfsh3nko 7aga tany.ana mesh bfa2r 3liko ana bs btmnko :D

مصري بالغربة said...

السلام عليكم

مدونة ما شاء الله جميلة فعلا

وانا على فكرة تقريبا حصلي نفس الموقف

وما اعتقدش ان فيه حد بيفكر انه مينضربش على قفاه

لانه من الواضح ان الجميع بينضربوا على قفاهم وحينضربوا على قفاهم

واللي ما انضربش حينضرب

واللي بيفكر انه مينضربش على قفاه

يبقى حيأخذ علقة محترمة مش قفى وبس

وتحياتي لك

Anonymous said...

نسخة الكتاب
http://rapidshare.com/files/212738892/__1593___1604___1588___1575___1606____1605___1578___1590___1585___1576___1588____1593___1604___1609_