Saturday, 28 June 2008

مذكرات فوفو من قطرالشقيقه

التدوينه دي حتكون ملاحظاتي و معاها بعض المقارنات بين مصر و الكويت و قطر و دبي ...نظرا لاني فعلا حسيت بفرق شاسع بينهم رغم الانتماء النظري لهم جميعا للمرحوم الوطن العربي الي كان كبير...
التدوينه دي نتاج رغبه شخصيه لي في تدوين بعض الملاحظات ... و طلب بعض اصدقائي تدوين نظرتي في قطر بعد اول زياره لها ...
انا مستبعدش ان حد يهاجمني في التدوينه دي ...معنديش مانع ....انا اقبل النقاش ..و ارحب بيه و لكني ارفض الوقاحه في التعليق ..و سأقوم بإلغائه ..
انا عشت في مصر و الكويت الفترة الكافيه للكتابه عنهم بتفاصيل دقيقه و لكن قطر سأتحدث عنها بصفتي زائر لها في رحله لن تستغرق اكتر من شهر ... اما دبي فسأتحدث عنها رغم عدم زيارتي لها ...عن نتاج معلومات قصها لي العديد من اصدقائي الذين يعملون في دبي ...
اولا :قبل اي حاجه ...ببعت سلام خاص و كبيييير من قطر لكل اهلي واصدقائي و حبايبي .... في كل مكان ....
بسم الله : رحلتي الي قطر ...كانت رحله غير متوقعه و هي رحله عمل علي العموم ...لم اعلم عنها الا قبل اقل من 48 ساعه ...
بدأت الرحله من مطار القاهرة الدولي علي الخطوط المصريه المتوجهه الي مطار الدوحه في قطر ...و هنا كانت اول مقارنه ممكن اتكلم عنها ...المطار بشكل عامل
المطار :
في مصر المطار كبيرجدا و رغم كدا زحمه جدا....المعامله و التنظيم مقبولين بالعافيه...
تمييز المسافرين الاجانب عن باقي المسافرين و الاخص المصرين ...للاسف ...دي كانت واضحه في كل حاجه اقلها الاجراءات....
للاسف وجود العادات الشعبيه المصريه المخجله ...زي مثلا انك تاخد مكان في الطابور و تلاقي واحد بيزاحمك و ياخد مكانك في الطابور ...
في قطر : المطار صغير جدا جدا ... اعتقد لو نزلت طائرتان او ثلاثه حيكون زحمه جدا ...
الحركه النسائيه هناك رهيبه ...اجراءات الدخول كلها كانت مع موظفات قطريات ... بصراحه مشوفتش رجاله هناك الا الامن ...مفيش ولا موظف راجل علي اي مكتب ...
هناك في قطر التميز بيكون لمواطنين الخليج العربي و ليهم مكاتب لختم الجوازات مستقله عن الباقي...اما الباقي معامله واحده ..
المعامله تعتبر جيده رغم ان في موقف حصلي و دايقني ...كنت في طابور ختم جواز السفر للدخول البلد ..و معايا موبايلي من مصر و انا عامله خدمه تجوال ...علشان اعرف استقبل عليه المكالمات في قطر ..المهم اخويا اتصل عليا علشان يطمأن و لكن اول ما رديت لقيت راجل من بتوع الامن بيزعق لي جامد و طلب من اغلق الموبيل ...رغم اني مشوفتش لوحه تنبيه بكدا....
الكويت :
المطار كبير و الخدمه ممتازين ...
هناك في الكويت التميز بيكون لمواطنين الخليج العربي ...اما الباقي معامله واحده ..

دبي :
المطار كبيييييييييييييييير و نظيف جدا .
هناك في دبي التميز بيكون لمواطنين الامارات ...اما الباقي معامله واحده ..
بعد ما طلعت من المطار...علشان اركبت ليموزين او تاكسي للفندق ..كانت مفاجئتي التانيه ..بجانب الليموزين....في تاكسي اسمو كروة ...هو الي ماسك خدمه التوصيل في قطر كلها بس الي يميزه انو زي تاكسي العاصمه في مصر بعداد : ) مش حيضحك عليك يعني .

اول ما طلعت من المطار و ركبت التاكسي...لفت نظري حاجه غريبه جدا ... ان مفيش مبني شوفته لغايه ما وصلت الفندق يعدي 3 ادوار .. بأمانه انا اتصدمت ..
المهم نظرا لان الفندق كان بعيد عن مكان الشغل ...و لاني علشان اطلب تاكسي (كروه) لازم استنه ساعه و نص ...علشان يجي غيرت كمان السكن ...و دي كانت الصدمه الثالثه .. في مصر الي اسمها زحمه و الشوارع واقفه بيجي تاكسي العاصمه في 45 دقيقه (متوسط)...
بعدها انتقلت لفندق تاني ....صراحه خدمته ممتازة جدا ...فيه كل حاجه ... حتي الغساله الاوتوماكت و الميكرويف ..
مش علشان حاجه غير انو اقرب للشغل و الاهم ان عندو خدمه الليموزين ...بطلبه قبل العمل ب 10 دقايق ..: )
لما روحت الشغل كانت المفاجئه في منطقه في الدوحه اسمها الدفنه .... فيها كميه ابراج رهيبه ما شاء الله..بس معظمها لسه بيتبني ...قليل منها فقط الي خلصان ...حاجات مش موجوده في الكويت او حتي مصر ...بس اكيد في افظع منها في دبي ...الي فيها اعلي مبني في العالم 850 متر (برج دبي) .
من الحاجات الغريبه برضو ان مش كل المطاعم المشهوره عندها خدمه توصيل لمنطقه الدفنه ...الي فيها الابراج : ) ...يعني تتصل عليها تقوم تقولك مش بنوصل للدفنه ... رغم ان الدوحه كلها علي بعض اصغر من اي حي في مصر زي مصر الجديده ..و المطعم علي بعد اقل من كيلو متر .

برضو من الحاجات الملفته برضو ان الدوحه لوحدها فيها 3 كارفور ... في حين بلد زي مصر الي قد قطر علي بعضها مش الدوحه بس ... واحد و تسعين الف مرة ... دي 11 الف كيلو متر و دي مليون كيلو متر.. مساحات تقريبيه .. عندها برضو 3 كارفور و دا ان دل لا يعد الا علي حجم القوه الشرائيه في الدوحه ..علي فكرة نفس تصميم كارفور مصر المعادي ..و البضائع موجوده في نفس الاماكن ..
و لكن هنا الجوده معظم الاشياء اجود ...
من المضحك او المبكي مش عارف الصراحه هناك اني لما روحت و بطلب من العامل لانشون حلواني ...قالي معنديش غير فراجلو المصري : ) ...
في حاجه تانيه برضو عايز اتكلم عليها و هي المساجد ... المساجد في قطر فخمه جدا ...عامرة بالمصلين ... حاجه بجد تشرح و تفتح القلب و النفس ....
برضو نفس الكلام في الكويت .... مساجد بمساحات رهيبه ما شاء الله ... و اشهر و اكبر مسجد في الكويت هو المسجد الكبير ..صراحه انا معرفش مساحته لكن معمول علي مساحه لاتقل عن 2 فدان علي الاقل (تقدير شخصي )
و لكن مش حيكون اكبر من مسجد الشيخ زايد في ابو ظبي ثالث اكبر مسجد في العالم بعد الحرم و المسجد النبوي عليه الصلاه و السلام .
بلاش نتكلم علي مصر علشان منقلبش المواجع ...
اه في حاجه تانيه برضو بالنسبه للمساجد و هما ليهم فيها حق علشان الحر ...ان الخطبه لازم متزيدش عن تلت ساعه ..علشان الحراره ...الكلام دا في قطر و الامارات و الكويت ..اما مصر كل امام حسب مزاجو لكن متوسطها ثلاث ارباع الساعه .
بالنسبه لثقافه الشعب :
في قطر موجود ناس من دول كتير ... الشعب القطري انا اتعاملت معاه في الشغل في ناس ممتازه ... و في ناس تانيه بيبصو لينا بصه وحشه ... ايوه ..انا بتكلم بصراحه .... هناك عندهم كلمه المصري دي زي الشتيمه .. زي مثلا يا معفن(اسف في اللفظ) لما تقولها لواحد بيبقي انت قرفان منه ...برضو زيها كلمه المصري ...يا المصري ...عندهم كلمه حقيرة ..ممكن زي ما احنا بنقول بينا و بين بعض دا صعيدي ...دي كنايه عندهم برضو ...
الكويت مفتكرش تفرق عن قطر في النقطه دي ...
بصراحه معرفش النقطه دي في دبي ...
المستوي المعيشي :
اكيد طبعا الخليج كلو عالي ... بس صراحه اقلهم في الرفاهيه هي قطر ...و باين الكلام دا قوي من مستوي السيارات في الشوارع ...
اللغه :
في الكويت اللهجه الكويتيه في اللغه المنتشره بين معظم الناس ..
في قطر في اماكن كتير مش بتتكلم فيها غير انجليزي ...الفندق ....كارفور ....المحلات....حتي الوزارة الي بشتغل عندها دلوقت ...في ناس بتتكلم خليجي عادي و ناس مش بتتكلم غير انجليزي ...
دبي تقريبا الانجليزي هي اللغه الاساسيه ...باستثناء المطار ...و بعض المطاعم ...و لو كلمت حد في الشارع ... مصر ...اللهجه المصريه ...و حاليا بقت مخلوطه بشويه كلام انجليزي ...

حاجه مدايقاني (صراحه مش عارف اسميها ايه!!! :$ ممكن نقول قله الادب او انعدام الحياء):
عامتا الخليج ..بيتدهر عام عن عام ...و دا حال الوطن العربي كلوه ...بما فيهم مصر ..انا كنت بقول علي الخليج بحكم اني عايش فيه فترة كبيرة ...انو اكثر المجتماعات الملتزمه و بصراحه كااان احسن من مصر ... و لكن الكلام دا تقريبا اضمحل ...دلوقت كلو محصل بعضو ...
كلها خطوه او اتنين و يكونا زينا ...لا و اوحش مننا كمان ...الفجور عندهم بزياده ...انا شوفت حاجات مكنتش مصدقها و لا متخليها ...
في الفندق ...عادي انك تيجي مع واحده مش مراتك و تقعد معاها في الفندق من غير ما حد يسألك مين دي ؟؟؟في مصر ...الي فيها ملاهي ليل ...علشان تدخل فندق مع واحده لازم اثبات انها تحل لك .... لو حد قالي مش بيتنفذ علطول ...حقولك بس عندنا قانون ... : (
في الفندق عندي قناه المجد علي التيليفزيون و لكن القنوات الي بعدها ... مش عارف اقولكم عليها ايه ؟؟؟؟حاجه تكسف ...:$
في الشارع او المول او كارفور عادي انك تلاقي واحده بتحضن واحد (صراحه ملفتش نظري العكس : ) )... واحده مش عارف اقول عليها لابسه ايه ؟؟؟اقذر من مصر ميت مرة ...و الله الواحد ضغطه بيرتفع لما بيشوف الكلام دا ...و بيحزن بشده علي مجتمع مفروض انو كان في يوم من الايام احسن مننا في حياته الدينيه..
الشعب القطري كويس في زيه .... و لكن في ناس ...مش تبع الناس ...هما قله بس عيب عليهم انهم يسمحو بالكلام دا . مصر ...الي اسمها مصر ...الي الخمرة بتتباع فيها في الشارع عيني عينك ... مبيحصلش فيها الكلام دا ..ادام الناس ...
.و مول ستي استارز الي مفروض انو مول المسخرة في مصر ...ميجيش حاجه من حيث القذارة ادام هنا ...(عدد الناس البايظه في مصر اكبر و لكن القذارة هنا اكترمن كل الي في مصر) ..
و الكارثه بقي دبي ...دي اقذر واحده علي الاطلاق ...اعرف واحد من الناس التي احتسبه يتقي الله بيقولي انو بيكون خايف و هو في دبي اني يجي عليها اعصار زي تسونامي يشيلها من كتر الذنوب و المعاصي الي فيها و هو فيها...
وو احد تاني بيقولي ....ان اقذر واحده في ستي استارز مصر ....تعتبر عاديه في دبي ....
اما الكويت ...بتدهور من عام لعام ... و لكن لسه موصلتش لقطر او دبي او حتي مصر ...الحمد لله ..لكن للاسف هي في الطريق و بخطوات متسارعه...حاجه اذكرها و اثني عليها ان الشعب الكويتي ...كذا مرة في الكويت اشوف حد لابس زي سيئ في الكويت بنت او ولد ...كنت بلاقي اهل الكويت يطلبو منو انهم يشوفو او يكلمو ابوه او امه ... و لكن للاسف النسبه دي بتنقرض حاليا ...
صراحه دا الي في دماغي حاليا ... ممكن لو جد جديد ابقي اكتب بوست تاني اكمل عليه ..
اهم حاجه دلوقت بقي اني بطلبك منكم انكم تدعولي ربنا يوفقني و يصلح حالي في شغلي في قطرلاني مضغوط حاليا في الشغل حبتين ثلاثه اربعه :)

9 comments:

عصفور المدينة said...

وفقك الله وأعانك وبارك في وقتك

Rehab Mostafa said...

ربنا يكرمك يا أحمد ويوفقك ويبارك لك في وقتك يارب :)

والبوست بجد حلو أوي

ahmed said...

ربنا يوفقك يا احمد .. ويسهلك كل أمورك وحياتك

Shady Mostafa said...

terga3 besalama ya abo l farafer :P

AhmedOsama said...

7agtyn :
1- Bma 2en 2el Fasad hynak 3aly . Law La2et wa7da sha3raha 2asfar wy 3ynaha zar2a wy bytakalam Labnany wy 2esmaha Nawal , Yaret tygybly namrat telephonha .

2- 2abl matygy Masr , 2abos 2edak 3ady 3ala Carfour wy hatly "Shany".
2mana fy Ra2btak wy mesh hasam7ak law Nysyt .

Rabyna Yakramak Wy Ya7'dak ........Byra7matoh , wy Yasad Nafsak ......... 3an 2el ma3asy .

Mohamed Gamal El-Den said...

enta ya 3essawy sebt masr ba2alk 2ad eih !!! aslk bet2ol mafesh 7ad byo7don 7ad, wala fe city stars mafesh el kalam dah !!!

saba7 el kher :)

Rabena yewaf2k we terg3 3in shams bel salama :D

mona essawy said...

السلام عليكم
ازيك يا احمد ؟ ربنا معك في الشغل ويسهل لك الامور ..........
معلش يا احمد انا عندي شوية ملاحظات الصراحة مش متفقه معك فيها بالنسبة للكويت اللى انا فيها الان ، بسم الله نبدأ : الكويت اتغيرت كتير عن اخر مرة كنت فيها،العاصمة ماشاء الله اتغيرت تماما كلها ابراج تحفة باشكال متنوعه وجميله جدا جدا ورهيبة وطبعا على السطح مهبط الطائرات ( الهيلوكوبتر) ومعظم المبابي اللى كانت فيها القديمة ازيلت وطلع مكانها ابراج ، اعتقد انك لو جيت الكويت مش هتتوقع ان هى ده العاصمة اللى انت كنت عارفها زمان .
بالنسبة اللى انت قلته ان الخليج بيتدهور والحته ده ...........وانه عادي الواحد يدخل الفندق .... فاعتقد ان مصر عليها العوض اساسا في الحته ده حتى لو في قانون فالقانون اساسا عليه العوض برضه في مصر واعتقد ان عدم الالتزام والبوظان في مصر يغطي ما يحدث في الخليج كله يا احمد كفاية شرم والغردقة حتى سيتي ستارز ونروح ليه بعيد تعال جامعة عين شمس كفاية .الكويت رغم حالة التغير اللى بتحصل في المنطقة بشكل عام فالحمد لله الكويت لسه بخير و والدين الحمدلله موجود والمحترمين لسه موجودين بكثرة والاخلاق لسه موجوده والبوظان لسه لم يصل الى مستوى مصر الحمد لله ، ومستوى الملابس في الشوارع كويس الحمد لله ...والزي التقليدي مازال يلبسه الجميع نساء ورجال .
وللحديث بقيه لما ننزل مصر ان شاء الله
وربنا يثبت الجميع .

Sarah Abdul said...

ya said ahmed e5tsr we 2ol masr el azbal 3ala el etlak fe kol 7aga , enta ma2oltsh kelma 3dla 3n masr we kol 7aga bet2ol "dh 7ata masr el fiha kaza " lih mosamem to7t-ha fe mokrna lel so2 keda .ana mesh ba2ol en masr a7san bs fe nafs el wa2t ahl masr a7san men ahl el 5alig 7ata en kan fe nesbt bowazan fa still fe nas kteeer lsa motmska be a5la2ha.Sorry for franco arab ,Rabna ykrimak we ywf2ak .

No DEnTist said...

اولا ... احب اقولك حمد لله عالسلامة لرجعوك الاض الوظن و ربنا يوفقك في شغلك ....
ثانيا... بصراحة انا اتفق معاك في كل الكلام اللي قولته و فعلا هي دي الحقيقة خصوصا ان انا و انت تقريبا عشنا الكلام ده كله في فترة ما كنا في الكويت و كمان عارفين اللي بيحصل في الدول المجاورة زي قطر و الامارات من خلال اصحابنا و فعلا الكلام ده صح ... اما بالنسبة لمصر و انا اتفق معاك ان زي ما انت قلت ان الضع هناك مختلف زز فده يمكن فعلا لان هناك احنا مش متوقعين ان يكون في كده (بنعتبر ده المفروض مش بيحصل في المجتمعات دي ) اما هنا في مصر فكاننا اتعودنا على ان البوظان ده سمة من سمات البلد هنا ..ربنا يسترها في الايام اللي جايه زز الواحد مش عارف ايه اللي ممكن يحصل اكتر من كده.. ربنا يستر (موضوع رائع )