Tuesday, 13 May 2008

البقاء لله

ولنَّبلوكُمْ بِشَيْءٍ مِّنَ الْخَوفْ وَالْجُوعِ وَنَقْصٍ مِّنَ الأَمَوَالِ وَالأنفُسِ وَالثَّمَرَاتِ وَبَشِّرِ
الصَّابِرِينَ (155)
الَّذِينَ إِذَا أَصَابَتْهُم مُّصِيبَةٌ قَالُواْ إِنَّا لِلّهِ وَإِنَّا إِلَيْهِ رَاجِعونَ (156)
أُولَئِكَ عَلَيْهِمْ صَلَوَاتٌ مِّن رَّبِّهِمْ وَرَحْمَةٌ وَأُولَئِكَ هُمُ الْمُهْتَدُونَ (157)
سورة البقرة

انتقل الي رحمه الله تعالي الشيخ سعد الصباح اليوم...
الامير الاسبق للكويت
صدمه كبيرة لكل واحد عاش في الكويت ... مواطن او اجنبي ....مفيش حد في الكويت مشفش خير منه او من الشيخ جابر يرحمهم الله...

امراء البلد بس عرفو يكتسبو حب الناس ليهم بختلاف اجناسهم...

مش عارف انا حاسس اني فقدت واحد من اهلي ...

انا واثق دلوقت ان الدنيا في الكويت مقلوبه و بتعيط رجال و نساء...
بكرة حتلاقي كل الي بيحبوه ...واقفين في جنازته...

انا مصري بس مش حزعل عليه عشر الي انا زعلانه دلوقت علي بتاعنا..

الشيخ سعد دا اخر الريحه القديمه و الكويسه في الكويت...و حزن الناس عليه هناك مش اقل من حزن الناس هنا علي جمال عبد الناصر ..

خلاص مع السلامه يا كويت .... زي ما سلمنا قبل كدا علي الوطن العربي ... :(:(

أسئل الله تعالى أن يغفر له ويرحمه ويكرم نزله ويوسع مدخله وأن يجازيه
بالحسنات إحسانا وعن السيئات عفوًا وغفرانا .. وأن يغسله بالماء والثلج
والبرد وأن ينقيه من الذنوب والخطايا كما ينقى الثوب الأبيض من الدنس ..
وأن يخلف عليه بدار خير من داره وأهل خير من أهله .. وأن يرزق ذويه
الصبر والسلوان .

Saturday, 10 May 2008

خدعوك فقالو : علشان متضربش علي قفاك

انا بقي بنفي الكلام دا و بقولك سخن قفاك ... علشان الضربه متوجعكش .....
انا عارف ان اكيد في ناس مش حيعجبها الكلام دا ... بس بصراحه انا بجيب من الاخر ... و سخنت قفايا خلاص استعداداً لاي ظرف .....

انا واحد من الاف و ربما اكثر من ذلك .... الي قرا كتاب علشان متضربش علي قفاك (هذا الرابط من مدونه هوندا)... الي اكيد الكل سمع عنو ... و اخدتني الحماسه قوي و انا بقرا الكتاب ... قريت ان الواحد مثلا لو في كمين شرطه و لقي حد عايز يسحب الرخص ... لازم يكون ضابط .. و مش من حق حد يفتش العربيه بتاعتك ... الا اذا كان شكل العربيه مشبوه او معاه اذن و متحدد فيه رقم العربيه و حركات كدا و ان لو شكيت في شخصيه الي بيكلمك لازم تطلب منه الكارنيه بتاعو علشان تطلع عليه ...
قريت كلام كتييير كدا .. و قولت انا لو حد فعلا منهم استفزني حعامله رسمي ... يعني مثلا لو حاجه مش من حقو مش حسمحلو يعملها ... و كدا ....
و شوف بقي حضرتك الي حصل ...
يوم السبت الماضي ... 3-5-2008 علي طريق اسكندريه الصحراوي ... و انا و ثلاثه من اصدقائي راجعيين من الساحل الشمالي .. لقيت ناس لابسه لبس عادي ... بتوقف الناس ... مفيش أي حاجه تدل علي انها كمين ... مفيش حد فيهم لابس لبس شرطه نهائي ... ولا في دوريه واقفه ... و لا القراطيس البرتقالي ولا الهوا ... شويه ناس لابسه لبس مدني بتفتش الناس بطريقه مستفزه ...
لما جه الدور علي العربيه بتاعتنا .... نزلنا منها بطريقه متعتبرش ظريفه (اركن علي جنب بصوت عالي... بس متمشيش تاني .... اساسا لو كنا زودنا علي البنزين و مشينا مكنش حيجبنا لان معهمش حتي عربيه دوريه رغم انهم كانو كتير مش اقل من اربعه فتشو العربيه)... و سألنا جايين من فين ؟؟ و هل معانا ممنوعات و كرر السؤال دا كتير كرره لكذا حد علي انفراد... و بذكائه الرهيب ...فتش نص الشنط الي في العربيه تفتيش دقيق(مش فاهم يعني افرض الحاجه في النص التاني من الشنط ) ...لدرجه انو كان بيفتش في الاحذيه الي موجوده في الشنط ... و قعد يفعص في الفطير الي كنا اشتريناه من واحه عمر(مكان مشهور علي الطريق في الكيلو 111) و بعد كدا سابنا ...

بكل بساطه كل الي عملو معانا مش رسمي ... و في نفس الوقت محدش قدر يعملو حاجه .. ولا حتي نسألهم
انتو مين ؟؟؟ ببساطه هو لو عايز يودينا ورا الشمس ... لو حد مننا شد معاه ... كان رمي قرش حشيش في العربيه و قال انا لقيته معاكهم ... و كدا يبقي احنا خلاص !!!!

بس دا الي حصل ... و بناء عليه .... قررت اسخن قفايا ... ليهم .. بدل ما احرق في دمي و ابقي عارف ان ليا حق بس علي ورق ...

و بقولك : سخن قفاك ... علشان الضربه متوجعكش .....