Sunday, 23 August 2009

ميزانيه مسلسلات رمضان الفلكيه


في احصاء صغير و صغير جدا لمسلسلات رمضان من موقع مصراوي لقيت ان شويه مسلسلات زي الاتي :

أفراح إبليس 25 مليون ,ابن الارندلى 18 مليون ,متخافوش 19 مليون ,الرحايا 16 مليون ,قاتل بلا أجر 15 مليون ,هانم بنت الباشا 17 مليون ,الادهم 16 مليون ,البوابه الثانيه 14 مليون ,ليالي 14 مليون ,حكايانت و بنعيشها 16 مليون ,الباطنيه 17 مليون ,علشان مليش غيرك 15 مليون ,حدف البحر 15 مليون ,وعد مش مكتوب 15 مليون تاجر السعاده, 16 مليون ,حرب جواسيس 17 مليون ,الرجل و الطريق 12 مليون ,ادهم الشرقاوي 13 مليون و إسماعيل ياسين 14 مليون .

تكلفته بيتكلم في 304 مليون جنيه ... و كمان في شويه مسلسلات جديدة زي

خاص جدا
ونيس وأحفاده
هدوء نسبي
المصراوية 2
بشرى سارة

مش مذكورة تكلفتهم ... انا حفرض ان تكلفتها تكلفه اقل واحد من الي فوق 12 مليون جنيه ..يعني كدا بنتكلم في 364 مليون جنيه يعني عدينا ربع مليار جنيه مستريح ...
حضرتك دي تكلفه المسلسلات بس ...ايوه 364 مليون جنيه علي الاقل ... محدش جه جنب تكلفه البرامج الحواريه ولا الفوازير ولا الهلس الي بنشوفو علي كل القناوات و خفه الدم الي نزلت علي الممثلين كلهم مرة واحده.

364 مليون جنيه يعني بلغه الناس الغلابه 364 و جنبه ست اصفاااااااااار .

يعني بأقل تقدير كان ممكن نوزع 364 الف جنيه معونات لالف قريه من الي تحت خط الفقر ..

اه ... يا بلد فيها اكتر من 1000 منطقه سكانيه تحت خط الفقر ..وغالبا معندهم ميه او كهرباء او صرف صحي او كلاهم..فيها 15 مليون نسمه ..

يا تري المصريين فعلا محتاجيين المسلسلات دي في رمضان وهي دي مشكلتهم و كدا بيحلوها !!!
يا تري هو دا مبادئ التكافل الاجتماعي الي اتربينا عليه !!!!
يا تري ايه بس ... من فترة كان في حوار زي كدا و لقيت واحد بيقول للتاني بلد واحد دفع فيها 50 مليون دولار علشان واحده ست ... حيحس بحاجه من الي انتو بتقولوها ...


خبر مكذوب و غير صحيح بالمره :
امر رئيس الوزراء بعد الرجوع الي رئيس الجمهوريه في قرار جمهوري رقم 1/2382009 بالتعاون مع الوزارات المسئوله انه سيتم فرض ضرائب تصل الي 70 % من الارباح ليتم صرفها علي المحتاجين من ابناء الوطن الغالي تحقيقاً لمبادئ التكافل الاجتماعي.

2 comments:

Fahd said...

شر البلية ما يبكي فعلا

بس تعرف افضل شيء ايجابي في اللي بيحصل ده اننا وصلنا لقمة الاسفاف والبذخ والتبذير والسفاهة

ده معناه اننا وصلنا للقاع فاللي بعد كده ان شاء الله المنحني يبدا يطلع

يعني مثلا لما الاغاني كترت وبقت بالعبيط ايه الي حصل ؟ المغنيين انفسهم بقوا ضدها

وفيه ميزة تانية ان نظرية التشتت دي كويسه

يعني لما كانت قناة واحده ومسلسلين كان تأثيرهم رهيب زي الليزر لكن دلوقتي الدنيا في المشاع

كل سنة وانت طيب

Rehab Mostafa said...

هو فعلاً احصاء صغير جداً
قرأت ان عدد المسلسلات 50 مسلسل ميزانيتها تقدر بمليار جنيه وما خفي كان أعظم
واللي يغيظ أكتر ان واحده تطلع في برنامج تقول ربنا يقدرني وأقدر أتابع المسلسلات كلها!!! لأ بتتعب بصراحه وربنا يقدرها دي بتعمل مجهود وعمل خير يعني مش أي كلام

بس في كلمه استفذتني أوي أخر البوست وأكدتلي ان الخبر مكذوب
"ابناء الوطن الغالي"
و100 خط تحت الغالي

شكراً يا أحمد على كم الاستفذاذ اللي في البوست :)