Friday, 23 April 2010

القرار قرارك


دلوقت الواحد بيمشي في الشارع تلاقي المحل مشغل اغاني ..بالصوت العالي ...
تركب الميكروباص تلاقي نفس الموال...نفس الصوت العالي ...
ناس دلوقت بتقول احنا في زمن ابو الليف...زمن الي رابط ايده و بيلعب بينج بونج ...

انا النهارده حكتب بطريقه مش تقليديه عن الاغاني ..
مش حتكلم فيها من ناحيه الشرع و هل هي حلال ولا حرام ...
لاني مش حضيف جديد في الموضوع...و للعلم أغلبيه العلماء قالو حرام عدا قله قليله قالوا عكس كدا زي الشيخ يوسف القرضاوي ...

انا جاي اتكلم عن الاغاني بعقليه الناس الي بتسمع الاغاني ...
لما سألت ناس من الي بيسمعوا الاغاني هل الاغاني حلال ولا حرام !!!
كان الرد كالاتي : واحد بيقول ان مش عارف بس نفسي تكون حلال ...
و التاني بيقول ايه الي يحرمها اساسا..ممكن الكليبات اه علشان فيها حاجات مش كويسه
و ثالث بيقول للاسف عارف بس مش قادر ابطل ...
و رابع قالي غالبا لاء لان في اغاني دينيه بالمويسقي و كدا ...يعني

اللي غالب علي معظم الاراء
ان هو مش واخد فيها قرار ...رغم ان لو كانت حرام يبقي عداد السيئات شغال عليه ..
فهل الناس الي مخدتش قرار فيها .... لو الاغاني طلعت حرام ...واثق من جبال حسانته و ان الاغاني و الكليبات مش حتيجي حاجه بجوار حسناتهم !!!!!

طيب سيبك من الكلام دا .... يمكن اكون انا الي مكبر حوار و هو اساسا تافه...
ليه خطيب اي مسجد في يوم الجمعه مش بيدعي لاحد المغنين لو كان حد فيهم عيان
ليه خطيب المسجد عمرة ما قال خطبه و جاء في النص و نصح الناس بشريط لتامر حسني ولا ابو الليف و قال الدنيا ساعه عباده و ساعه راحه
طيب لو قال خطيب جمعه حاجه كدا ...حيسقط من نظرك ولا لا ؟؟؟

ليه مفيش شيخ مغني ...او مغني شيخ !!!!
ليه مفيش شيخ بيطلع من حلقه علم في مسجد معين الي حفله خيريه و بيغني فيها و يكون هو تامر حسني ...
و ليه مفيش العكس ؟؟؟؟ ليه مفيش مغني حافط للقران و الحديث و السيرة النبويه ؟؟؟

ليه بتدايق لما تسمع صوت اغنيه كرنه موبيل شغاله في مسجد و بتحس ان في حاجه كبيرة حصلت ...
ليه بتحس بخجل لو كان انت صاحب الموبيل ؟

ليه دايما المغنيين لما البنات او حتي الشباب بيشفوهم بيترمو في احضانهم
ترضي ان اختك او امك او خالتك تكون واحده من الي بتترمى في حضن المغني ؟؟؟
طيب ترضي انت لنفسك تكون منزوع النخوه و الرجوله و تتلقي هذه الاحضان ....
طب ليه بتحب الكائنات دي ؟؟؟ وانت عارف الواحد بيحشر مع من احب !!
ليه بتدعمه و بتشتريله الشريط بتاعه و بتشجع الناس و بتوزع اغانيه!!

ليه لما الواحد بيسمع قران ... بيحس بخشوع او خوف ..و بيحس براحه و طمأنينه ...
ليه الواحد لما بيسمع اغاني ... احيانا بيحس انه عمل ذنب او عمل حاجه مش عارفها و مش مرتاح ...

اظن ان مفروض انك عارف ان اي حاجه حتعملها حتتكتب بحسنات او سيئات مفيش في النصف
قول الرسول صلّى الله عليه وسلّم : ( وفي بضع أحدكم صدقة قالوا : يا رسول الله أيأتي أحدنا شهوته ويكون له أجر ؟ قال : أرأيتم لو وضعها في الحرام أكان عليه وزر ؟ كذلك إذا وضعها في الحلال كان له أجر
ليه بتحس بفرحه داخليه لما حد يطلب منك قرآن صوتي لقارئ معين ...و بتحتسب دا في ميزان حسناتك
طيب لو عكسنا الكلام دا ...لما بتوزع اغاني على حد يترى حتتكتب فين ؟

طلبي الوحيد ..لو مُصر تسمع اغاني او مش عارف تسيبها...
متجاهرش بيها ..اسمعها في الخفاء(بينك و بين ربنا بس و ربنا يعينك) .. علشان لو طلعت معصيه ..يبقي مش كمان مجاهرة بالمعصيه

القرار قرارك

مصدر الصورة : موقع ركاز

18 comments:

Mohammed Hewedy said...

ميه ميه و الله يا أحمد, ربنا يباركلك..

Mostafa said...

كلام منطقى و يحترم

Shady M. Najib said...

ردي الوحيد:
حلاله حلال و حرمه حرام :)

ماتعممش الكلام القلته على كل حاجة :)

مدونة مرآة الحقيقة said...

اسلوبك حلو في الحوار ، ومدونتك عجبتني

انا جارك في المدونة يللي بعدك :)

شكرا لمقالاتك :)

mona said...

كلامك جميل بس انا مقتنعة ومؤمنة بإن كل شئ حلاله حلال وحرامه حرام ، انا شفت حلقه للشيخ الشعراوي بيتكلم عن الغناء قال ان في غناء حرام و في نص نفسه بيكون حرام من غير غناء ، المشكله مش في الغناء المشكله في الكلام والطريقه اللي بيتقدم بيها واللي بتخرج ناس كتير عن وقارهم وده مش صح ، في اغاني كتير ايجابيه وهدافه
ومش حسه اني لو سمعت اغنيه دينيه مثلا او اغنيه وطنيه او اغنيه بتشجعني اني اعمل اي حاجه حلوه ان ربنا هايعاقبني ويدخلني النار

ماجد العياطي said...

صحيح اخي الكريم احمد

المشكله هو ان الناس

بتبرر الفعل

لكن اذا على الاقل الناس اعترفت ان المسأله شخصيه وكده

ساعتها هيبقى في شئ من الصراحه

تدوينه حلوة ياابوحميد

ربنا يوفقك

أبو بكر said...

و الله كلام جميل فعلا يا أحمد ،
و قد روى البخارى فى صحيحه قال رسول الله صلى الله عليه وسلم : { ليكونن من أمتي قوم يستحلون الحر والحرير والخمر والمعازف }

لاحظ يستحلون !!! يستحلووون !!! والله صدق رسول الله صلى الله عليه و سلم !!
و المشكلة ليست فى نوع الأغنية فقط أو كلامها ، و لكن كون معها معاذف فهذا خطير !

shaymaa.mohamed said...

عجبني أوي الكلام ياعيسوي و أنا واحدة من الناس اللي عارفة انه حرام بس للاسف بسمع...كل فترة أحاول بس برجع تاني..عارفة ان الاغاني تلهي عن ذكر الله وذكر الله المفروض علينا عدم تركه الا في اوقات معينة ومعروفة مثل اوقات الاستماع الي خطبة لشيخ او عند قضاء الحاجة او عند طلب العلم ...الخ ولكن اذا فرغ المرء من هذا لابد ان يعود لذكر الله ...ولكن ليس هذا ما يحدث... فعسي الله ان يهدينا الي الحق جميعا ان شاء الله

Ahmed Essawy said...

@ هويدي و مصطفي و مراه الحقيقه و ابو بكر و ماجد العياط و

جزاكم الله خير علي المرور و التعليق

Ahmed Essawy said...

@ شادي مصطفي و مني

صح كلاكم ، الغناء حلاله حلال وحرامه حرام .
انما الموسيقى !!؟
مشكلة منتشرة شويه عندنا اننا مش عارفين نفرق في كلام السلف ، السلف قالوا على الغناء اللي هو باختصار ( الالقاء ) حلاله حلال وحرامه حرام ، أما الموسيقى ففيها كلام تاني فهي حرام على اجماع السلف .
اول واحد عارض الإجماع كان ابن حزم رحمه الله وده من المتأخرين وليس من السلف وأدلته كلها رد عليها العلماء اللي عاصروه واللي أتوا بعده .
علشان كده الكلمة دي تطلق على الغناء وليس على الموسيقى .
دا بخصوص كلام الشيخ الشعراوي حلاله حلال و حرامه حرام
انا مكنتش عايز اتوسع في الجانب الديني زي ما قلت في البوست العلماء مخلوش حاجة ، وممكن تقرأ رسالة القرضاوي والرد عليها وكل حاجة هتتضح إن شاء الله
و بعيد عن كده الفكرة الي انا قولتها في البوست ..ان حتي طلاما عليها خلاف .. فانا ممكن اسيبها و مش حخسر حاجه و مش حتضرني تماما.. بحيث اكون سيبت الشبهات
بلا شك ان الموضوع دا في شبهه بدليل ان كل واحد عمال يتمسك بكلام شيخ معين
و يقاتل بيه ...
انا مش حناقش كلام الشيوخ لاني زي ما قولت حتلاقي ميت لينك علي النت لفتاوي بأدق تفاصيلها
تعالي معايا شوف كدا الرسول قال ايه في الحديث دا ؟
في باب رقم 68- باب الورع وترك الشبهات

==
- وعن النُعمان بن بشيرٍ رضي الله عنهما قالَ: سمعتُ رسول الله صلى الله عليه وسلم يقُولُ: (( إن الحلالَ بينٌ ، وإن الحرام بينٌ، وبينهما مُشتبِهاتٌ لا يعلمهن كثيرٌ من الناسِ، فمن اتقى الشبُهاتِ؛ استبرا لدينه وعرضهِ، ومن وقع في الشبهاتِ؛ وقع في الحرام، كالراعي يرعى حول الحمى يُوشك أن يرتع فيه، ألا وإن لكلّ ملكٍ حمى، ألاَ وإنَّ حمى الله محارمهُ، الاَ وإن في الجسد مضغةً إذا صلحت؛ صلح الجسدُ كلهُ، وإذا فسدت: فسد الجسد كلهُ: ألا وهيَ القلبُ)) متفق عليه
==
قسم النبي صلى الله عليه وسلم الأمور إلى ثلاثة أقسام: حلال بيّن،و حرام بين ومشتبه.

الحلال البيّن؛ كحلَّ بهيمة الأنعام، والحرام البين؛ كتحريم الميتة، والدم، ولحم الخنزير، وما أشبه ذلك، وكلّ ما في القرآن من كلمة (( أحلَّ)) فهو حلال، ومن كلمة ((حرّم)) فهو حرام، فقوله تعالى: ( وَأَحَلَّ اللَّهُ الْبَيْعَ )(البقرة: 275) هذا حلال بيّن، وقوله تعالى: ( وَحَرَّمَ الرِّبا ) (البقرة: 275)هذا حرامٌ بيّن.

هناك أمور مشتبهات تخفى على الناس، وأسباب الخفاء كثيرة، منها ألا يكون النصُّ ثابتاً عند الإنسان، يعني يتردد: هل يصح عن الرسول عليه الصلاة والسلام أو لا يصح، ثم إذا صح قد تشتبه دلالته: هل يدل على كذا أو لا يدل؟ ثم إذا دلّ على شيء معين فقد يشتبه: هل له مخصص إن كان عاماًّ؟ هل له مقيد إن كان مطلقاً؟ ثم إذا تبين قد يشتبه: هل هو باقٍ أو منسوخ.

المهم أن أسباب الاشتباه كثيرة، فما هو الطريق إلى حل هذا الاشتباه؟ والجواب: أن الطريق بينه النبي صلى عليه الصلاة والسلام فقال: (( فمن اتقى الشبهات؛ استبرأ لدينه وعرضه ومن وقع في الشبهاتِ؛ وقع في الحرام)) من أتقاها يعني تجنبها إلى الشيء الواضح البيّن؛ فقد استبرأ لدينه وعرضه.

و في حديث تاني
قال رسول الله صلى الله عليه وسلم: (( لا يبلغُ العبدُ أن يكونَ من المُتقين حتى يدع ما لا بأس به حذرا لما به بأسٌ)). رواه الترمذي وقال : حديثٌ حسنٌ.

وهذا فيما أشتبه مباح بمحرم وتعذر التمييز، فإنه من تمام اليقين والتقوى أن تدع الحلال خوفاً من الوقوع في الحرام.

هي دي الاسباب المنطقيه الي خلتني اعيد النظر في الموضوع برمته
انا واحد كنت بسمع للاسف اغاني و عمري ما كنت اتصور اني حقدر اسيبها لكن لما فكرت تفكير منطقي اكمل معاها ليه او اسيبها ليه !!!
و لقيتني مش قد ذنوبها لو طلعت حرام رغم اني علي قناعه داخليه بكدا ... و لا قد حساب ربنا يوم القيامه و الواحد حيكون في عرض حسنه و مش لاقي
اخذت قراري :)

سعيد بتعليقكم

Ahmed Essawy said...

@ شيماء
اولا بوجهه ليكي نفس الكلام الي وجههته لشادي و مني علشان وجهه نظري تتضح ليكي اكتر ..
بالنسبه لكلامك
كلام جميل ، يا ريت حياتنا كلها تكون لله .
بس حياتنا لله يعني كل حاجة لله ، مش يعني رهبنة ، لا رهبانية في الإسلام .
يعني في إني اخرج اتفسح فسحة حلال ونيتي تجديد نشاطي للطاعة ، اني اتكلم مع حد وادردش معاه مش في غيبة ولا نميمة ولا حرام ونيتي سرور تدخله على قلب مسلم ، اني اضحك واتبسط ما دام في حلال وبنية صالحة أؤجر عليها .

كنت بسمع دايماً كلمة حلوة ولسه حد من اصدقائي مفكرني بيها امبارح ، الصحابة كانوا تجار نيات .
:)
يعني كل حاجة بنية صالحة ، ده حتى لدرجة انه بيحتسب بنومه أجر .

حياتهم كلها لله ، لكن محدش يقدر تكون كل حياته صلاة وصيام ، لإن الرسول نهانا عن كده ، مرة تانية لإن ربنا عارف اننا مش هنستحمل كده ، ولو عملنا كده هنزهق ، علشان كده كان الحديث الجميل ده :

" جاء ثلاثة رهط إلى بيوت أزواج النبي صلى الله عليه وسلم يسألون عن عبادة النبي صلى الله عليه وسلم فلما أخبروا كأنهم تقالوها فقالوا وأين نحن من النبي صلى الله عليه وسلم قد غفر له ما تقدم من ذنبه وما تأخر قال أحدهم أما أنا فإني أصلي الليل أبدا وقال آخر أنا أصوم الدهر ولا أفطر وقال آخر أنا أعتزل النساء فلا أتزوج أبدا فجاء رسول الله صلى الله عليه وسلم إليهم فقال أنتم الذين قلتم كذا وكذا أما والله إني لأخشاكم لله وأتقاكم له لكني أصوم وأفطر وأصلي وأرقد وأتزوج النساء فمن رغب عن سنتي فليس مني "

انا بس كنت عايز اوضح ليكي ان مش لازم في اوقات الفراغ تكون ذكر علي طول

رغم ان مفيش عبادة أسهل من الذكر ، عبادة حلوة جداً وسهلة جداً ، ولا هتتعور فيها زي الجهاد ولا هتتعب فيها زي الصيام ولا مكلفة زي الزكاة ولا فيها مشقة زي الحج بالإضافة لإنك مش هتتمسك من أمن الدولة زي لما تطول لحيتك :)

قال رسول الله صلى الله عليه وسلم "ألا أخبركم بخير أعمالكم وأزكاها عند مليككم ، وأرفعها في درجاتكم وخير لكم من إنفاق الذهب والفضة ، ومن أن تلقوا عدوكم فتضربوا أعناقهم ويضربوا أعناقكم ، قالوا: بلى يارسول الله قال: ( ذكر الله )" .

Ahmed Essawy said...

@الي الجميع

صديق من اصدقائي ارسل لي عبر بريدي الاكتروني تعليقه علي التدوينه و احببت ان اشاركم اياه

ربنا خلقنا وادالنا كاتلوج حياتنا ، لو انت جبت جهاز كهربائي جديد وخالفت الكاتلوج لإنك مش مقتنع بحاجة فيه الجهاز ممكن يضرب ، تخيل ربنا سبحانه وتعالى ولله المثل الأعلى هو اللي صنعنا وعارف الأصلح لينا ولو خالفنا أمره ..حياتنا في الدنيا هتضرب زي الجهاز بالزبط

شئ منطقي

HeRmOsO ♥ said...

كلامك عين الصواب خيي

انا صديقتي تسمع اغاني ومجنونة اغاني
اقولها ديما الاغاني حرام تقولي مش مقتنعه ابدا انها حرام

:(

تعبت معها الله يهديها


شكرا الك

HaMaDa AzzaM said...

مقال رااااااااائع ياأحمد
ربنا يبارك فيك

HaMaDa AzzaM said...

مقال رااااااااائع ياأحمد
ربنا يبارك فيك

المدرب حسن ابراهيم said...

مدونه راااائعه جزاك الله خير يا ابو حميد

وربنا يباركلك يارب

اللهم اغننا بحلالك عن حرامك ..وبفضلك عن من سواك

hassan said...

مدونه رااااائعه وجزاك اللي خير يا ابو حميد
ربنا يباركلك يارب
اللهم اكفنا بحلالك عن حرامك ...وبفضلك عمن سواك

Anonymous said...

من اجمل ما قرأت عن الاغاني .. جزاك الله كل خير