Monday, 4 June 2007

التاج الذهبي

قام البشمهندس احمد ... صاحب مدونه مبرمج حر .بتمرير هذا التاج الذهبي لي بعد طلبي لذلك . لذلك فأنتهز هذه الفرصه لأقوم بشكره :) .
مش حطول عليكيو . تدخل في التاج علطووووووووول ......
;)

أحب شخص لقلبك في الدنيا؟
الرسول عليه اذكى صلاه و سلام و من ثم اسرتي .
انسان مستعد تضحي بحياتك – ركز فى كلمة حياتك – عشانه؟
اسرتي كلهم .. و بعض اصحابي مش كلهم :( .
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
و الله لو كان ينفع كنت عملتها في ناس كتير .....:D:D
لو علي المستوي المحلي في مرة شوفت واحده ست المفروض انها ام :( بتضرب ابنها الصغير في المترو بالحزام و الناس لما اتدخلوا ؛ كانت بتضرب الولد اكتر –بكل برود بتقول اعمل ايه الواد مش راضي يسكت-.
لما بشوف ظابط شرطه ...واخد في نفسه مقلب و بيبلطج علي خلق الله علشان بقي علي كتفه كام نجمه ولا حتي نسر و بالذات الناس الي انتشرت الفيديوهات بتاعتهم و هم بيضربوا الناس علي الموبيلات.
لما بسمع او بشوف حاجه اسمها شاورن او بوش الحقير بيبقي نفسي اخلص فيه مدفع مش بندقيه .
ما هو اسم اجمل كتاب كتبه بشر قراته ومحتفظ به حتي الان؟
مش عارف بصراحه . انا مش في دماغي حاجه حاليًا بس اكتر كتاب بألجئ ليه كل فترة هو رياض الصالحين للامام النووي علشان اطلع حديث معين منه .
اسم كتاب كتبه بشر برضة- انت متعلق بيه وبتقرأه كل فترة؟
اسرار حيرت العلماء . هو كتاب مش كبير قوي . بس انا بطئ جدا جدا في القراءة .
:$
اهم جهاز منزلى انت متعلق بيه او بتستخدمه كتير؟
طبعا طبعاً ..... بلا شك الكمبيوتر و لازم يكون متوصل بالنت .
مكان تحس بالراحة عندما تدخله؟
لو مكان الكتروني :) يبقي البلوج بتاعي ؛ بحس فيه بالراحه لاني لما بكون عايز اتكلم او اقول حاجه و مش عايز حد يقاطعني بقولها علطوووول .

لو مكان بجد ليه XYZ يبقي المسجد :D:D .
شىء تحس بالراحة النفسية عندما تنظر اليه؟
النظر للسماء و ياحبذا لو تكون مليئه بالنجوم بالليل طبعا .مبزهقش منها . :) .
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
لو بلد يبقي الكويت لاني اتولدت فيها .
لو مش بلد :D يبقي قمه الجبال و المرتفعات .
اجمل مدينة زرتها داخل مصر ؟
للاسف مزرتش اماكن كتير . بس سامع ان مطروح حلوه . :$
أجمل مكان طبيعي رأيته داخل مصر ؟
البحيرات والشلالات في الفيوم .منظر رهيب جدا .
شخصية كارتونية بتحبه
طبعا كونان ... المحقق الذكي :)
كل حلقه يعقد يحيرنا و في الاخر يطلع الحل بسهوله ؛ فعل االواحد كان الواحد بيستمتع معاه .
و برضو توم اند جيري دا معليهوش كلام .
نوع هاتفك المحمول؟
نوكيا
سرعة بروسيسور جهازك؟
2.6
حجم ذاكرة –هارد- جهازك؟
الرام : 512 ميجا و الهارد : 240جيجا ما شاء الله :D .
المساحة التى تشغلها المواد الاسلامية على جهازك؟
مش عارف بالظبط لانها في كذا مكان . بس في حدود 8-10 جيجا .
نفس المساحة السالف ذكرها فى قلبك -الاجابة لنفسك عشان الرياء يا اخواننا -؟
الاجابه مشفرة :) .
أهم هدف انت واضعه لحياتك الآن؟
هما 3 حاجات . بس احتفظ بيهم في نفسي .
مواصفات فتاة الأحلام بالنسبة لك؟
برضو احتفظ بالايجابه لنفسي ؛ بس الي انا ممكن اقولو اني ليا مواصفات كتيييرة قوي مش حتنازل عنها .
و بعيد عن كدا لازم لازم تكون ليها في الكمبيوتر . علشان لما اكلم نفسي . ملقيهاش تبلغ عني مستشفي العباسيه ولا تفضحني ادام الناس و تلم عليا الجيران و تقولهم جوزي عامل زي هاني رمزي بيجيله الهسهس . :$:$
صف ما يأتى:شعورك لما بتسمع كلمة مصر ؟
ولاء و حب شديدين مغلفين بالحزن و الاسي العميقين .
شعورك لما بتسمع كلام عن اليهود؟
حرقه دم و فوران. طاااااااار كل يوم بيكبر و بتمسك بيه اكتر رغم اني فلاح مش صعيدي .
شعورك لما بتشوف ظابط شرطة؟
احترم و تقدير شديدين او الاحتقار الشديد .
شعورك لما بتشوف الكناس العجوز فى الطريق؟
حب لله في الله . الواحد مش حيكون عايز منه حاجه لكن الواحد بيفرح ان لسه في حب من اجل الله رغم مفاتن الحياه العديده.
احيانا و بيبقي نفسي يطلب مني حاجه علشان اعملهاله .
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
بدعيله ان ربنا يثبته و يوفقه للخير و يحفظه و يكون سفير كويس للمسلمين كلهم .
احساس يراودك فى اشارة مرور مغلقة بسبب مسئول كبير؟
مش بالفرح طبعا:( ؛ ممكن يكون دهشه و استغراب و غيظ احيانا . طالما هما مسئولين كبار كدا ليه مش بينتقلو بالهيليكوبتر و يريحو البشر الي في الشارع دي كلها . اكيد المسأله مش مسأله توفير معاهم خالص .


بس كدا التاج خلص . و جه وقت تمرير التاج للجدعان اصحابي... طبعا كلكم بمرر ليكم التاج .
و بالنسبه للبنات لو في حد عايزة تاخد التاج اهلا و اسهلا بيها تتفضل فالبلوج بتاعكم يا FCIs :) .

4 comments:

أبوعامرالديب said...

اسئلة حلوة واجاباتك كويسة

ومتشكرين علي التاج بس ده وقته

Rehab Mostafa said...

التاج ده صعب أوي كويس انه اختياري :D
بس بجد اجاباتك كويسه أوي وخصوصاً أول سؤال والأسئله بتاعة لو شوفت مين هتحس بإيه وبتاعت الاماكن
بس انت ليه اتكلمت عن جهازك ده احنا ورانا مشاريع وربنا مايجعل لنا
FCIye
وليه عنين الله أكبر

kimogaafar said...

شكرا ع الاسئلة متتصورش الاجابة ع الاسئلة دى تعبتنى اد ايه بجد اصعب موضوع لية حتى الان بس برضوا شكرا

Ahmed Essawy said...

@ محمد عامر
فعلا الاسئله حلوه .
و بعدين الشكر لله انا معملتش حاجه .
:)

@ ريحاب
التاج مش اختياري و لا اجباري .
:D:D
كل واحد براحتوا بس انا بصراحه كان نفسي ناس كتير تجاوب عليه لان اسئلته عجبتني .


@ كريم جعفر
الشكر لله يا بشمهندس كيمو .