Wednesday, 17 October 2007

تاج العيد


سلام عليكم ورحمة الله وبركاته
الحمد لله انا خفيت.. من الاربعه ادوار الي كانو عندي ... و جيت بتاج سريع لاني بقالي كتير كان نفسي في تاج ... التاج دا من مدونه خليك في حالك :)

لو قالولك اختار عصر من عصور مصر علشان تعيش فيه تختار أى ‏عصر و فى عهد أى حاكم .. واشمعنى؟

عمرو بن العاص ... محرر مصر من الرومان ...

أول ‏أولويه فى حياتك عيلتك ولا شغلك ولا أصحابك؟
بعد ديني ...العيله و اصحابي المقربين لانهم في نفس مكانه اخواتي


إيه أكتر ‏حاجه بتحبها في رمضان؟
تجمعات الناس في المساجد ايام الاعتكاف... بتلاقي هناك الشيخ الكبير و هنا الصبي الي لسه معداش ال5 سنين . بجد الواحد بيحس ان الدنيا لسه فيها خير ...


اوصف ليا ‏أجمل فطار ممكن تفطره
لما يكون برة البيت في اي مكان مفتوح

لو أنت ‏حاكم على مجموعه من الأفراد هتكون عادل؟؟ طب هتعمل إيه عشان تتأكد إنك حاكم ‏عادل؟
ححاول ...و الكمال لله طبعا ... حمشي براي الاغلبيه ...

اللى بيبوظ الحكام .. نفسهم؟ ولا الشعب؟ ‏ولا الحاشيه المقربه؟
الثلاثه ... مفيش حد بيعمل الي عليه صح ...

مين ‏أكتر إعلامي مصري بتحترمه؟
محمود سعد


قريت ديوان عمر مصطفى صاحب بلوج تجربه " أسباب وجيهه للفرح" ‏عن دار ملامح و لا لسه ؟؟
لأ ... دا اول مرة اسمع الاسم دا ...

لو ‏ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ‏ايه؟
بزنس مان


ايه تانى بلد تتمنى تعيش فيها بعد ‏مصر؟
الكويت : بحكم اني عيشت فيها معظم عمري ...و اعرف فيها ناس طيبين ... و بصراحه بلد بتحترم الي يحترمها ...نظيفه جداً ... و مرتبه ... مفيهاش رشاوي نهائي ...كل واحد بياخد حقه ..

اوصف ليا ‏ترتيبات أجمل فرح ممكن تحضره
كفايه انو يكون لشخص انا بحبه...بس صراحه حكون فرحان جداً لو كان اسلامي ... صاله رجال و صاله نساء ... علشان يكون بادئ حياته بحاجه مش حرام .... لانه مفيش فرح دلوقت مش بيرقص فيه ستات ادام الرجاله ...


بتراعي ‏كلام الناس والقيل والقال؟ لو اه او لو لا قول لى ‏ليه؟
مش حيأثر فيها كتير لو مأقنعنيش... انا بهتم برأي ناس معينه انا بثق فيهم .. بس مش أي حد يقولي حاجه اهتم بيه ...

صحيت من النوم ما لقيتش الموبايل ولا الكمبيوتر ولا ‏الكاميرا الديجيتال ولقيتنا ‏رجعنا لعصر الحمام الزاجل والحصنه هتكون سعيد؟
نفسي اعيش الصدمه دي


السعاده ‏هى؟
انك تنام و مش مزعل حد و حاسس انك مش مزعل ربنا .

عندك أمل ‏؟؟ أسبابك
الامل هو وقود الحياه .

لما تحب ‏تهرب من كل شئ بتروح فين؟
من كل شئ دي كبيرة شويه عموما حسب الموقف : احيانا ممكن اروح كورنيش النيل ... احيانا و دي المفضله اني اروح مكان هادي جدا جدا و افضل ببص علي النجوم .

امتى ‏أول مره خدت فيها نفس طويل كده وقلت بينك وبين نفسك يااااه الظاهر انا فعلا ‏كبرت؟
بعد اما اتخرجت من الكليه بفترة و حسيت اني فعلا مسئول نفسي و اهدافها و شوفت الحياه الشريره بنفسي :(.


لما ‏بتعمل عمل خيرى بيكون ايه هو دافعك الاول؟
زي أي بني ادم : ربنا سبحانه و تعالي


بتشرب ‏سجاير؟ لو الاجابه اه ايه شعورك لو شفت ست بتشرب سجاير؟ وليه ‏؟
الحمد لله لا ...ست بتشرب تبقي مخوخه فكريا و مريضه نفسيا ... بتصعب عليا و بدعيلها ربنا يهديها ..


بتعرف ‏ايدك اليمين من الشمال ازاي؟
انت عايز ايه ؟؟؟ :)

ايه اكتر ‏اله موسيقيه بتحبها ؟ ؟
انا عند رأي لان دي مشكله مأرقاني
قال رسول الله صلى الله عليه وسلم :
((
ليوكنن في أمتي قوماً يستحلون الحر والحرير والخمر والمعازف)) رواه الترمذي جامع الأصول رقم الحديث 7455

والمعازف هي الموسيقى والعود والطبل والبيانو والجيتار
بمعنى اصح هي اي شئ يصدر منه صوت موسيقي
وهنا الرسول لم يقل يستحلون المعازف الحرام ويحرمون المعازف الحلال
معنى ذالك ان المغازف الي هي الموسيقى ليس منها حلال بل كلها حرام
والله أعلم


فى رأيك ليه الذوق والنخوه ‏اتعدموا؟
لان الوازع الديني قل جدا


ايه ‏الحاجه اللى لو حصلتلك تبقى سعيد قوى؟؟؟
لما ببقي مهيس :D لا بجد حاجات كتير قوي ... مش حاجه واحده لو كتبتهم مش حخلص ..


تختار ‏يبقى عندك...أرض زراعيه ولا أجنس عربيات و لا كام عماره و لا فلوس فى ‏البنك؟؟؟؟
كام عمارة


البحر و ‏لا النيل؟؟؟
الاوسع : البحر


مركب و ‏لا طياره؟؟
الابعد : طياره


مجنون و لا ‏عاقل؟؟
في اختلاف واسع في الاراء :)


تقرأ ‏كتاب و لا تتفرج عليه فيلم؟
مبتفرجش علي افلام ...كتاب


أمررة لمين ؟
نظراً لان بقي عندي حبايب كتير من كذا مكان .... افضل مكتبش حد :) و اسيبه للاي عايزه بس يبقي يقولي علشان ابقي اقراه

:D


7 comments:

عصفور المدينة said...

رائع اللهم بارك لنا فيك
ياااه إجاباتك جميلة جدا ربنا يعزك
وخاصة ان إجابة عمرو بن العاص أنا مجاوبها بس لسة مش نزلت التاج

آلام وآمال said...

ربنا يبارك لك يا احمد والله
اجاباتك جميلة وشخصيتك واضح انها جميلة بردو

كل سنة وانت طيب
:)

أحمد عماد said...

إجاباتك معظمها عجبني يا عيسوي
بس في شئ مختلف معاك فيه وهو مش لازم علشان تكون حاكم عادل تكون تحكم برأي الأغلبية لأن ماحدش عارف الأغلبية دي فاهمة ولا مش فاهمة
صالحة ولا فاسدة
كده يعني
بس الإجابات في مجملها كويسة قوي

Zo0oZ said...

ما شاء الله عليك .. معظم اجاباتك جميله و الاسئله مميزه
:)

لفت نظري سؤال بس وانا باقراه : لو أنت ‏حاكم على مجموعه من الأفراد هتكون عادل؟؟ طب هتعمل إيه عشان تتأكد إنك حاكم ‏عادل؟
ححاول ...و الكمال لله طبعا ... حمشي براي الاغلبيه ...


لو هاتمشي برأي الاغلبيه .. جايز تكون الاغلبيه قرارها غلط أو فاسد .. في الحاله دي هاتعمل ايه أو تبرر لهم قرارك المعاكس لهم ازاي ؟

ربنا يوفقك للخير و يقوّيك في الحق

Ahmed Essawy said...

الي الجميع
عصفور المدينه و الامو و امال و احمد عماد و زوز

شكرا علي تعليقاتكم ... التدوينه لما قريتها تاني هي فعلا تميل الي المثاليه ...
و بصراحه مرضاش احط نفسي في مكان مش مكاني ...
اكيد الاجابات دي بتمثل جزء من شخصيتي و لكن مش معني علشان الاجابات كانت مثاليه يبقي انا مثالي ... انا واحد زي اي واحد تاني بغلط كتير ... بأخطأ كتير ...و حسابي حيكون اشد من غيري لان عارف الصح و الغلط ...
بحاول اعمل الصح علي قد ما اقدر و لكن ليا ذلات ربنا هو الي بيسترها
==

مش معني اني انسان بأخطأ و اصيب اني اكتب الخطأ .... انا اكتب الصح و الي مفروض نمشي عليه و الي انا بحاول امشي عليه...
لان المهاجره بالمعصيه ذنب علي ذنب..
==

انا حبت اوضح الكلام دا ...علشان محدش يحطني في مكان مش مكاني ...
لان كلامكم كان زياده فعلا عليا..
جزاكم الله خير...

Zo0oZ said...

السلام عليكم

لما قريت عجبتني الاسئله و اتخيلت نفسي لو كنت هاجاوبها هاقول ايه فيها .. و دلؤتي لما قريت ردّك علينا هنا قلت : المجاهره بالمعصيه تعتبر ذنب على ذنب

احترت !! في السؤال مثلا اللي بيسألك عن أكتر آله موسيقيه بتحبها .. قريت جوابك و اعترف اني لو كان التاج ده اتبعتلي كنت هاقول : الناي و العود

مش عارفه كان ممكن اجاوبه ازاي .. لانه طبعا انا مش قصدي أجاهر بمعصيه و في نفس الوقت لو كنت كتبت حكمهم كنت هاكون باكذب أو باجاوب رياء فقط .. حيرتني بجد

أكذب ولا تعتبر مجاهره بالمعصيه !!؟
:S :S

Ahmed Essawy said...

انا لما كتبت التاج مكذبتش ... انا كتبت الي حعمله فعلا ... و الي انا مقتنع بيه ... و لكن دا ميمنعش احيانا ان النفس امارة بالسوء ً ...
==
بالنسبه لسؤالك
اكدب ولا اجاهر بالمعصيه ؟؟؟
مثلا علي الناي و العود ...
اولا دا راي شخصي انا لا شيخ ولا حاجه ... ولا ليا في الكلام دا ...
انتي لما تخلي الرد بتاعك
علي السؤال انك تكتبي الحكم ... انتي كدا مكدبتيش ....لانك مردتيش اساسا علي السؤال لا ب اه بحب كذا او ب لا مبحبش حاجه ....و كمان ممكن حد يقرا الكلام دا و تاخدي ثوابه ... دا احسن ما تكتبي الناي و حد يعمل زيك و تاخدي من سيئاته وكل واحد عمل زيه ...
و ممكن من الاساس تشيلي السؤال من التاج او ترفضي الاجابه ...
:D