Friday, 28 September 2007

خدعوك فقالوا


خدعوك فقالوا لو وقفت علي سلم عازل و مسكت سلك فيه كهرباء ... مش حتتكهرب :D .

ايوه يا ناس الكلام دا طلع اشتغاله و مش حقيقي :) ؛ انا النهارده كنت في بيت تيته و عامل فيها كهربائي و عمال اغير لبمات و حاجات كدا لان دا بيت عيله ....و طلعت علي سلم حديد بس الاماكن الي بيقف عليها الواحد خشبيه ... و لابس شبشب عازل (الازرق المشهور الي عند ثلاث ارباع الشعب المصري –الي مكتوب عليه O2-) يعني مطاط و عازل ..... و قولت استفيد من الكلام الي اخذته في اعدادي و مسكت السلك المكشوف ....:$

بس دا الي حصل .... :D:D

و لكن حصل حاجه غريبه قوي ... انا اتكهربت كهربه قويه شويه ... بس مش بطاله :D بس الحمد لله و الاغرب اني موقعتش من السلم ولا محصليش حاجه زي ما بنشوف في التلفاز.

سبب الي حصل حاجه من دول انا مش عارفها :

# ان الكهرباء مش مالي عنيها عتبات السلم الخشبيه او الشبشب العازل .

# انا قاعده شاذه في عالم الكهرباء (يمكن اكون ظاهرة لم ترصد بعد في عالم الكهرباء ).

# ان الكهرباء بتاعه زمان غير كهرباء اليومين دول ... حاكم اليومين دول كل حاجه عامله تحرر من كل حاجه :D .

# ان الراجل الي قال الجمله دي ... واثق ان مفيش حد اهبل حيمسك الكهرباء و يجرب في نفسه ... فقال أي كلام و الناس صدقته .

# لحاجه في نفس يعقوب ....

انا ارجح الاخيرة .... لاني في حاجات كتير مش لاقيلها تفسير ... ولا عارف انا بعملها ليه ...فبطلعه السبب و ابطل تفكير :D:D .


في حاجه تانيه عايز اطلبها من كل الي حيقرا المقاله دي ... يا ريت الجميع يدعو لوالد صديق عزيز ليا بالشفاء العاجل ... اللهم يا رب الناس أذهب البأس و اشفه شفاء لا يغادر سقماً .



Thursday, 20 September 2007


لو تفتكروا معايا من حوالي 6 شهور تقريبا كنت كاتب مقاله تحت اسم القران الكريم بالفلاش و ان الموقع دا بيتميز بعيدا عن مظهر الرائع بأنه بيقوم بتحميل الصفحه الي بتقراها بس علشان لو السرعه الانترنت بطيئه ... و برضه مش معقول ينزلك القران كله مثلا و انت حتقرا صفحتين :D...

ما شاء الله الموقع دا ... كان عليه اقبال كبير و كان متوسط عدد الزوار بيتعدي ال ثماني الالف يوميا .
المهم الجديد بقي ان الموقع اتطور اكتر من كدا و بقي حاجه اروع مما كان عليه ...
ما شاء الله ....بقي فيه بدل مصحف واحد .. مصاحف متعدده
زي ما هو باين في الصورة :
و كمان صورة الصفحه بقيت اوضح بكتير و علي حكم الشاشه كلها :
اقول بقي بسرعه كدا المميزات الرئيسيه و اسيبكم انتم بقي تستكشفوا الباقي :
# تكبيرحجم الالصفحه لسهوله القراءة .
# امكانيه رؤيه جزء مضخم من الصفحه باستخدام عدسه مكبرة.
# اماكنيه التأشير الي عده صفحات من كل مصحف .
# امكانيه التحكم في جوده الصفحات و سرعه تحميلها من الموقع .
# امكانيه تغيير خلفيه الموقع لمراعاه شعور المتصفح أثناء القراءه .
# امكانيه الذهاب الي صفحه دعاء ختم القران.
# امكانيه تصفح المصحف من خلال لوحه المفاتيح .

و قد تم هذا الموقع من قبل جهود فرديه و ليس عن طريق اي مؤسسه او هيئه و هو موقع مجاني دعوي و يمكن لاي شخص الاستفاده منه
بدون اي نوع من انواع الاشتراكات . و بإذن الله ستبدأ النسخه الثالثه من الموقع و الذي سيحوي علي صوتيات مترابطه مع صفحات المصاحف و مميزات اخري كثيرة ..
قبل ما اسيبكم ... ياريت تدعوا للناس دي و ان ربنا يجازيهم عن الموقع حسن الجزاء..بارك الله فيهم و يكثر من امثالهم ......

لينك الموقع :
http://www.quranflash.com/

Sunday, 16 September 2007

صمنا عن الحلال ...و لن نفطر علي طعام و شراب اعداءنا

موضوع معدل (حتي تكون معلوماته اكتر دقه... شكرا لاصدقائي الذين قامو بتنبيهي )

الدنيا لسه بدري و الشروق لسه عليه شويه ... و بقالي فترة مش متابع الاخبار ... فقولت ادخل اشوف ايه الجديد ...
مع اني شبه عارف الي حلاقيه ....
اكيد حلاقي امريكا بتتكلم علي سوريا لغايه ما يجي الدور عليها و احنا بنستنكر و نشجب ...

و علي انفجار في العراق (ما هي مبقتش تفرق معانا قوي ... زي ما تقول كدا حضرتك جسمنا نحس من كتر الضرب -مثل مصري-) ...
و مقتل كام واحد في فلسطين ....
و مش عارف الرئيس الفلاني راح يبحث الاوضاع الخطيرة في المنطقه مع امانا الغوله ... بتاعه امريكا ... الانسه رايس ...
و عن الرياضه العالميه ...
برضو مش عارف مين جالو شد في رجله ... و راح المستشفى ...
و مين عايزين يبيعوه ب 20 مليون يورو ..
و اعلان بطل التنس العشبيه و تكريمه (اصل عندهم حاجات تانيه غير العشبيه فكل يوم حاجه :) ) ...
و عن الرياضه المحليه ...
كل يوم في ماتش كورة ... فحتلاقي معاد الماتش ...
علي ازمه بين لاعب و مدرب او مدرب و جهاز فني ... عادي بقي ...

ضمن الروتين الي الواحد عايش فيه ... بيصحي في ساعه معنيه ... بينام في وقت معين ... لو خرج مع اصحابه يبقي غالبا في ساعه معنيه .... وقت الفطار ثابت ... و اخيرا الاخبار بقيت ثابته ...

محدش ناصح زي واحد اعرفو يقولي لا ... الاخبار مش ثابته .. عدد الي بيموتو كل يوم بيتغير :@... انا اقصد ان مش حتيجي في يوم و حد يقولك الاوضاع في امريكا بايظه و امريكا مهدده ... اصل كندا مثلا بتهددها ... عمرك ما حتسمع ان المانيا دخلت انجلترا ... دا الي اقصدو بالروتين ...

المهم قريت الاخبار ... الحمد لله ... بس استفزني خبرين جدا ... واحد منهم بيقول هجوم انتحاري في االعراق و تتوعد بشن غزوة خلال شهر رمضان دون تفاصيل .
حتي في شهر الصيام ...... ايه الهبل دا ... فين امريكا الي واكله البلد و شاربه من بترولها ..... امريكا الي كل سنه بتقول ادامي سنه كمان و اطلع من هنا .... ايه الجديد من ساعه ما دخلت البلد .... لا شئ .... ... هي امريكا بتشتغلنا !!!!! طيب ... حنقول ماشي ... بس مش بالسذاجه دي ... احنا برضو بنفهم شويه ... اعملو اي حاجه تخسسنا ان حصل تغير او تعديل في البلد ... كل كام يوم تبعت ذخائر و جنود للجيش بحجه الدفاع و تعديل الوضع .....و تعمل عبيطه ... اصلها بتحبنا قوي و عايزة تدافع عننا ..... . بأمارة المجازر الي بتحصل كل يوم ... علشان مش لاقيه حد يقف ادامها ...
بس ارجع و اقول مش بعيده علي بلد بتدعي احترامنا ... و بتسب الاسلام و تهين المصحف .... واحده زي دي اتوقع منها حاجه كويسه ازي ؟؟؟؟؟ انا الي غلطان اني متوقع انهم مش حستهبلونا للدرجه دي .....

الي اعرفه ان كل يوم نقتنع بالمقاطعه اكتر ... لانها الشئ الوحيد اللى بأيدي ممكن اعمله بعد التقرب الي الله و الدعاء لاخواتنا في كل مكان .... انا عارف ان المقاطعه مش واجبه ... ايوه ... حكمها الشرعي انها يثاب عليها فاعلها ... و لا يجزى عليها تاركها ...

لكن بحس اني انسان تافهه ... عاله على امم لا تستحق ... انسان لا معني له في الحياه ...فرد اناني غير مدرك لاي شئ ....سبب في شقاء اخرين...مذنب في جميع الاحوال .... . لما اشوف كل دا بيحصل فينا و احنا بنستورد منهم و لو اسم المنتج ....بيثر في جسمي الم و رعشه ...في نزعه الفرديه زياده شويه بعيشها المجتمع حالياً .....

حيجي واحد يقول .... يا عم فكك ...من الصداع دا .. انت وجت دماغي ... ما هي مش حرام ... ارجع و اقوله يعني مش مالي عينك الثواب علي الاقل لما اموت ابقي رافع راسي ... علي الاقل ابقي عمل تو لو جزء من الي عليا ؟؟؟؟
حد يقولي ؟؟؟؟ يعني لو مشربتش بيبسي مثلا !! حيحصلك ايه ؟؟؟ حتموت ؟ ولا حتنقص ذراع ؟ ولا البيبسي بتزيد من قيمتك ؟؟؟
و حتي لو قولتلي بتظبط المزاج ... ليه ما تقاومهاش (مع ان ليها بدايل كتييير ) و تستلذ الثواب( تخيل كده لحظه مشربتش فيها بيبسي في عز النهار و الدنيا حر ... يا تري رد ربنا علي الموقف دا حيكون ازاي (جزاء)!!! ) .. في نفس اللحظه الي ايدك فيها مش حتروح ناحيه البيبسي ....و يبقي استلذيت و اخذت ثواب بإذن الله ... دا نوع من انواع الجاهد ...
حد يقولي ناس ... بتستحقرنا كدا (دول المقاطعه) .... ازاي نبني لحم كتافنا منهم ... ازاي يكون و لو جزء مني ...جاي منهم ...
و الله دا مش كلام و خلاص ... انا مش حسمح ان يكون للناس الحقيرة دول فضل عليا .... و انا سبب في دا ...

يا جماعه ... قاطع و لو حاجه ...اي حاجه .... قاطع الي تقدر عليه ....و كله في الميزان ...

القضيه الي اصبحت كذا قضيه ... دي مسئوليه امه .. مش واحد لوحده ولا جماعه لوحدها ..
ايمانك بالقضيه بس مش كفايه ....تعاطفك لوحدوه مش كفايه ....المقاطعه دي اقل و اهون رد فعل يعملو ناس لسه عندها كرامه !!!!!!

"يَا أَيُّهَا النَّبِيُّ جَاهِدِ الْكُفَّارَ وَالْمُنَافِقِينَ وَاغْلُظْ عَلَيْهِمْ" (التوبة: من الآية73).
وجه الدلالة: أن الله تعالى أوجب على المؤمنين مجاهدة الكفار والمنافقين، إما وجوباً عينياً أو كفائياً، ومن المعلوم أن في جهادهم استباحة لهم ولاموالهم، فإلحاق الضرر بهم عن طريق المقاطعة الاقتصادية مشروع من باب أولى .
اضغط علي الصورة للانتقال "لدراسه شامله للمقاطعه الاقتصاديه "


Friday, 14 September 2007

يوميات مجند

الصورة دي ... تجمعني مع بعض المجندين من دفعتي ....زي ما انتم شايفين كدا في الصورة انا و اخويا و رامي ...
مش عارف جمال مطلعش في الصورة ليه!!! .... عموما الصورة حتفضل تفكرنا باليوم الي روحنا فيه الهايكستب علشان نعمل تحليل كبد وبائي (اجراء روتيني ) ... و طبعا علشان نعوض كام نقطه الدم الي اخدوها مننا في الجيش ( حوالي 3 جرام :D ) و كميه الشمس الي اخدها ..... مش عارف ليه كل يوم هايكستب بيكون عامل كدا .... طلعنا علي محل العصير ... كل واحد شدلو حوالي 3 كوبايات ... او اربعه ...الصورة دي و احنا في الكوبايه التانيه ... :D

نصيحه لكل واحد عليه الدور : لما تروح حاجه ليها علاقه بالتجنيد زي الهايكستب او منطقه التجنيد بالحلميه.... ابقي احلق ذقنك بالموس .... سامع مووووووووووس ... علشان متعملش زي ... حلقتها بمكنه حلاقه ذقن قبل ما انزل من البيت( المكنه بتخلي الذقن منبته علي خفيف )...فالراجل ميعجبوش الحال و يرجعك مترح ما جيت :D ...

Sunday, 9 September 2007

سلسله دروس دوال الويندوز للماسنجر بالعربيه



سلسله دورس Windows Live Messnger Add-In API بالعربيه بكيبورد : أحمد عيسوي :)
السلام عليكم و رحمه الله بركاته .
الصلاه و السلام علي اشرف الخلق اجمعين سيدنا محمد و علي اله و اصحابه اجمعين .

هل سمعت من قبل عن ما يسمي
Windows Live Messnger Add-In API
هل اردت يوما ان تقوم بعمل برنامج لمخاطبه اصدقاءك بالماسنجر و الرد اوتوماتيكيا عليهم بدلا منك في حاله عدم وجوده علي الجهاز .... هل تخيلت قبل ذلك انه من الممكن عمل برنامج يرد علي من يحادثك و في نص محادثته كلمه كلمه "الرسول محمد" .... بالصلاه و السلام علي اشرف المرسلين اوتوماتيكيا... و بمجهود قليل لا يذكر ....
سيناريو اخر...
عند استخدم أي برنامج يقوم بعمل a full-screen للشاشه مع وجود الماسنجر ستري ان الماسنجر قام اوتوماتيكيا بتحول الحاله الخاصه بك الي مشغول و عندما يقوم احد بمخاطبتك علي الماسنجر فلن تعرف ذلك لان في الحاله مشغول لا يصدر الماسنجر صوت اضافه الي ان الشاشه حاليا في وضع full-screen لذلك من الممكن ان يتضايق منك احد الاصدقاء ظناُ منه بأنك اهملته و لا تريد الرد عليه ...هل وجدت حل لهذه المشكله ؟؟؟؟؟؟

هذا ما سوف احاول بعون الله ان اوضحه لكم من خلال شرح سلسله من الدروس في ال Messenger Add-In API حيث انها دوال API الرسميه التي تستطيع من خلالها التحكم في اداء الماسنجر .


من مميزات Windows Live Messnger Add-In :
تستطيع بعد انشاء ال Messnger Add-In الخاص بك التحكم في الرساله الشخصيه لمستخدم الماسنجر او تغير حالته من مشغول علي سبيل المثال الي بالخارج كما تستطيع ايضا الرد اوتوماتيكيا علي من يحادثوك عبر الماسنجر او ارسال تنبيه لهم Nudge و غير ذلك من المميزات التي سأحاول عرضها بالتفصيل بعون الله .

اذا كنت من المهتمين بالموضوع فإليك السلسله كامله :
الدرس الاول Windows Live Messnger Add-In API
الدرس الثاني Windows Live Messnger Add-In API
الدرس الثالث Windows Live Messnger Add-In API
الدرس الرابع و الاخير Windows Live Messnger Add-In API

Saturday, 1 September 2007

بعد غيبه طويله ... حيث اني اصبحت من الفئه العامله حاليا ( مش عارف اقول ربنا ما يوريكم ولا ايه.. لانه مرهق قوي.:( و بياخد معظم الوقت ) ووقت فراغي بقي صغير جدا...اخيرا لقيت يوم فاضي بحاله ...:D (انا مش مصدق:D) ... قولت انا مش قايم من علي البلوجات ولا الفيس بوك الا لما اعوض اسبوعين الحرمان الي فاتو ...
اه قبل ما ادخل علي التاج ... احب اوجهه تهنئه كبيرة قوي لعريسنا الطويل ...طويل قوي ... بشمهندس محمود عيد الي كانت خطوبته امبارح ...ربنا يتممله علي خير ...
ندخل في التاج بقي ...قامت مدونه طمطم و هوندا بعمل تاج ليا ...عن طريق هوندا ...و ادي اول سؤال و نقول باسم الله ...
1-اسم مدونتك؟
AhmedEssawy
2- لماذا اخترته ..وماهي نيتك من وراء اختياره؟
نفس اسمي لانه حيعبر عن شخصيتي و ووجهات نظري و طريقه نفكيري..
3- هل فكرت في إغلاق مدونتك؟ والسبب؟
لا طبعاً ... انا ساعات كتير بجي المدونه بتاعتي اقرا الكلام الي انا كاتبه فيها بحس اني بشوف زوايا جديده في شخصيتي مكنتش اعرفها .... مدونتي جزء عزيز عليا ...
4- صورتك في المدونة ورمزيتها ؟؟
صورتي و انا صغير.. متصور خلف الكعبه في مكه المكرمه ... تدل علي براءه الانسان الي بيكون مخلوق علي الفطره النقيه.... لا يحمل اي هم او شقاء في اطهر بقاع الارض ....
5- لماذا دخلت عالم التدوين من الاساس؟
حينما اريد ان اخاطب الهواء و احيانا الفراغ حينما اريد ان اعبر عن رأيي او فكرتي لشخص لا استطيع ان اوجه له الكلمه حينما اتذكر الحاجات الحلوه آتي مسرعا الي هذا المكان الساكن .... لانه الوحيد الي استطيع أخاطبه في اي وقت .. من الاخر البلوج بابه مفتوح 24 ساعه D: ...
6- جمله قيلت لك فى وصف مدونتك؟
و الله من غير كبرياء ولا حاجه ناس كتير مدحتلي في البلوج ... بس الحاجه المشتركه بين معظم الي كلموني عليه ...انهم مقدروش يسيبو البلوج الا لما قروه كله ... و ناس تانيه في الكليه من الدفعات الي اصغر مني لما كانو بعرفو اني احمد عيسوي صاحب البلوج .... كانو بيشكروا في اسلوبه ... بيحسسوني اني نجم و متجمعين حواليا ... والله دا مش بيزيدني الا اني حماس اني مسبش البلوج او اسلوبه دا خالص ....
7- التعليقات بالنسبه لك ,اهميتها؟
اكيد شئ مهم لان الموضوع مش بينتهي لما انا بكتبه ...لا... النقاش بيبدأ لما اول تعليق بيتحط ...الكلمه الطبيه صدقه ... من غير رأي الناس رأيي ملوش معني ...
ا8- احلى بوست كتبته ...ضع اللينك , ثم اذكر لماذا؟
شكر و تقدير
كانت اول رساله شكر و تقدير وعرفاناً بالجميل الي جنود بعضها مجهول ...اناس كانوا سببا في وصولي لما انا فيه بعد نجاحني في السنه النهائيه من الكليه .
من معاني القوه موقف رائع شايف فيه معاني جميله جدا تحملها النفوس السويه و الطيبه حبيت اني انقلها هنا علشان تشوفوها معايا .
في حاجات كتير قوي.... انا كتبت اول اربعه حسب التاريخ الاحدث ...
10- أفضل مدونة قرأتها؟
غير ان التدوين بتاعهم كويس ...دا كمان الاتنين دول مشتركين في حاجه تانيه و هي الاهم بيكتبوا مواضيع تقنيه باللغه العربيه و مؤمنين بأهميه اللغه ...و انو سبب قوي لنهوضنا مرة اخري (الكلام دا ناقشته فاطمه قبل كدا )
11- حد قل أدبه فى التعليق إيه رد فعلك؟
بالطبع حذفت التعليق ..
12- أسوأ بوست أسوأ مدون؟
في اكتر من واحده ... ناس دماغها مخوخه من جوه ...ماشيه مع التيار .. ربنا يسهل لهم.. :(
13- هيحصل ايه لإيميلك لما تموت ؟؟
سؤال بجد مش لاقيله اجابه ...مش متخيل اليوم دا :$
14- اديت الباسوورد لحد قبل كده؟
لواحد صاحبي بثق فيه ثقه عمياء ..علشان لما اموت ... ربنا يرحمنا جميعاً...
ا15- اسمك؟
احمد عيسوي
16- المشهور بيه وسط اصحابك؟
ناس كتير بتقولي يا عيسوي ...و يوسف صاحبي مسمني فوفو (مش فاهم ليه بس هو كدا )و احمد محمدين مسمني كوكا (برضو مش فاهم ليه :D)
17- شخصيتك نوعها إيه؟
الناس الي حوليا هو الي يحكمو عليا... اكيد كل واحد شايف نفسه كويس ..
18- السفر بالنسبة لك؟
دماغ عليا..
19- وقت فراغك بتعمل فيه إيه؟
اساسي مخصص وقت للبلوجات و القراءه عامتا من النت و لكن انا مش مديله اولويه عاليا ... لاني مشغول ...خصوصا و انا الان من الفئه العامله ... و كمان اهلي مسافرين و فلازم اساعد اخواتي في المهام منزليه لازم تخلص الاول :D .
20- المود بتاعك؟
هادي للغايه ... مش بتعصب بسهوله..
21- الاكلة المفضلة؟
اولا صنيه لسان العصفور (في ناس كتير مش عارفينها بس بجد في حاجه اسمها كدا:D) ..دي لو قدامي 100 صانيه ممكن اقوم بيهم(;) كدا و كدا طبعا مش حقوم بيهم :D) .. بحبها جدا جدا... و عموما بحب الصواني بصفه عامه(بشاميل .. كوسه مراكب ..وكدا...)
22- صفات اللي أخدتها من بابا؟
المسئولية والطيبة والإيثار و الكفاح ..
23- الصفات التي أخدتها من ماما ؟
الطيبه برضو... التفاني في الحب ...الكفاح برضو ....
24- اكتر ست حاجات بكرهها؟
الخيانه ... عدم الرجوله ... السلبيه ... التفاهه ...وقت فراغ بدون هدف...الاستهبال :@..
25- اكتر ست حاجات بحبها؟
العمل التطوعى بشكل عام في اوقات الفراغ ..الهدوء ....و عكس الصفات السابقه .
26- الشغل بالنسبة لك؟
وسيله من اجل حياه كريمه ...
27- الانترنت بالنسبه لك؟دنيا تانيه ...عالم تاني ...احلي حاجه فيه الهدوء حتي ولو في مشكله مليون مشكله...سيغلبهم الهدوء ...
دلوقتي انا مفروض اعمل تاج للناس للمدونين من الكليه دول الولاد
و دول المدونين اصحابي الي مفتكرش لسه جلهم التاج دا ...