Monday, 29 October 2007

صوت الاذان في عالم الويب


برنامج كان نفسي فيه من زمان ......

ان شاء الله قريبا سيبصر الي النور ...

الموقع الرسمي :

Monday, 22 October 2007

فوفو اتكتب ليه عمر جديد



سيناريو فيلم السينما :

فوفو (الي هو انا ) قرر انو ياخد رخصه قياده سيارات لانه مش تمام في السيارات الي بيكون الجير فيها عادي مش اوتوماتك .... علشان هو اخد اعفاء من الجيش من كام يوم ... و اصبح للمرة التانيه من فئه عامه الشباب (معندوش شغله ولا مشغله ) قرر ياخد الرخصه يسلي بيها وقته...

النهارده كان عليه اول حصه و هي حصه نظري ( مش سواقه يعني ) الساعه سته المغرب .و علشان فوفو بيحب يحترم المواعيد .... و كمان الشركه بتاعه التعليم دي قريبه من بيته راح في المعاد الساعه سته ..

الساعه 6.00
دخل مقر الشركه في الدور الارضي و قالهم ان دي اول حصه ... قالو له اطلع الدور الاول في وشك علطول حتلاقي لوحه بأسمنا...

الساعه 6.01
دخل بوابه المول الي فيه مقر الشركه متجه للدور الاول ... بس فوفو لقتى السلم مترب و ضلمه .... فقرر انو يطلع علي المصعد (أسانسير) اهو دور واحد والسلام ... كل الي عمله فوفو في حياته انو ضغط علي رز الدور الاول ... بس يظهر ان المصعد كان ليه وجه نظر تانيه ... المصعد طلعني شويه حلوين و بعد كدا وقف ادام حيطه .

الساعه 6.02
فوفو لما لقي المصعد بيخرف ... و لقي نفسه ادام حيطه ... قال اكيد دا مش باب الدور الاول ... :D
داس علي زرار الدور الاول ... مش شغال .... الدور التاني .... مش شغال ....الارضي ....برضو مش شغال ....ايه دا المصعد باااااااااااظ ....

الساعه 6.03
فوفو قرر يدور علي اخر زرار ...الجرس ... علشان الامن يسمعوه او البواب او أي حد ماشي ....و لكن علشان المشهد يكمل ... الجرس كان بايظ ....

الساعه 6.04
فوفو .... قعد يفكر شويه مذهول من الوضع .... بيقول لنفسه .... انا كدا غالبا اتحبست ... لان انا بقالي بتاع 5 دقايق بطلع دور .... مش معقول ....
هو الناس الي بيتحبسو بيعملو ايه ؟؟؟؟؟؟؟

الساعه 6.06
فوفو قرر انه ينادي علي الناس و يخبط علي الباب زي ما كان بيشوف في الافلام .... و في الاخر حد يسمعه .....و تخلص المشكله ... بس يا تري الناس بتنادي بتقول ايه .... انا مش بنت علشان اقعد اصوت و الاقي الناس تتلم عليا .... انا راجل ... هو الراجل بيقول ايه ؟؟؟؟ فوفو قال انا لو عقدت افكر الاكسجين حيخلص انا لازم اتصرف بسرعه .... اعصابه لسه متماسكه .... متوقعش حاجه كبيرة حتحصل اكتر من كدا .... قال ... يا ناس ... انا محبوس في الاسانسير ... و قعد يقول كدا بتاع 8 دقايق ... بس للاسف ادامه حيطه مينفعش يخبط عليها لانها مش حيطلع صوت !!!!!!!!

الساعه 6.14
فوفو بص في الساعه ... اربعتاشر دقيقه جوه و مفيش حد سامع ... لازم ياخد قرار اسرع .... افتكر ان اخته قالت ليه خد الموبيل معاك و هو مكنش عايز و في الاخر اخده معاه .... اتصل بمين ؟؟؟؟ ايه دا كمان الموبيل مش فاضل فيه الا شرطه و البطاريه تفضي ... و الارسال نازل قوي ...قرر انو يتصل علي 121 و يقولهم علي الحكايه خصوصاً ... لانو بدأ يدوخ .... مش عارف دا بسبب القلق ولا الاكسجين يقل .... في الاخر كلم 121ردت عليه بعد دقيقتين ولا حاجه .... و اخدو عنوانه و مكانه و ايه الحكايه بالظبط ... و فضلو معاه علي الخط بتاع 5 دقايق و بعد ما عرفو ان المصعد فيه كهربا قالوا ... معلش دا مش تخصصنا ...احنا طوارئ الكهرباء بس ... اتصل علي 122 ...

الساعه 6.21
فوفو قفل السماعه و بيبص في البطاريه ... الحمد لله الشرطه الاخيرة لسه منزلتش ... و طبعا متغاظ في وقت مينفعش فيه يتغاظ من طوارئ 121 ..... المهم بسرعه اتصل علي 122 و قعدت البداله بتاعه دقيقتين تانين شغاله موسيقي و صوت مسجل بيقول سوف نقوم بالرد عليكم حالاً .... حالاً دي اخدت بتاعه دقتين ولا حاجه ... و الراجل الجديد اخد البيانات من تاني و المكان و السبب و حوارات كتير كدا.... بس الراجل دا حسسني بخطورة الموقف خصوصا اني بقالي بتاع نص ساعه في المصعد و ادام حيطه و قولتله اني دايخ ...

الساعه 6.26
الطواؤي 122 قالتلي خليك علي الخط لغايه ما تجي الطوارئ ... بس انا فهمت قصدو ... هو متوقع اني ممكن اموت لاني بقالي كتير جوه ... بجد ساعتها كنت فعلا مخنوق... مش قادر اخد نفس براحتي او قلقان بصراحه مش قادر احدد ... و كنت قاعد علي الارض اسبح ربنا ... و سلمت امري لربنا ... المهم جتلي مكالمه تانيه علي ال waiting رغم ان انا كنت مازلت علي الخط مع الطوارئ ... نمرة بيت ... معرفهاش ... المهم لما رديت لقيت واحد بيقولي ... متخفش احنا في الطريق ... و قفل علطول ... بيني و بينك انا دماغي راحت بعيد .... و قولت دا ملك الموت.... و بيستأذن ...

الساعه 6.31
سمعت صوت عربيات المطافي و النجده تحت .... قلت الحمد لله في امل اهو .... و لقيت واحد بيكلمني من بئر المصعد و عمال يكلمني ... اسمك ايه ... عمرك كام ؟ حاجات كدا ... و قالي متقلقش . ...علشان يتأكد اني لسه علي قيد الحياه ... و في نفس الوقت سامعه بيكلم حد باللاسلكي ... رغم انو كان بعيد ... الا ان بير المصعد كان هادئ و أي صوت بيكون قريب مني ...

الساعه 6.34
لقيت ناس تانيه بتسألني انت في الدور الكام و انا برد انا مش عارف ... بس الاسانسير مطلعش كتير ... اصل العمارة بتاعه 15 دور ولا حاجه ... سألوني عن اقرب باب ليا فين ... قولتلهم معرفش ...و زي الي قبله قالي متقلقش ... و الي زاد المشهد رعب الكهرباء انقطعت عن العماره كلها .... قعدت تنقطع و تيجي تاني ... يا تري صدفه ولا هما الي عملو كدا ... انا معرفش ....

الساعه 6.41
بعد فشل تحريك المصعد ..... عده مرات .... لقيت المصعد بدأ يرتفع 2سم كل دقيقه .... بيرتفع ببطئ شديد ...
بدون الامل في وجود باب ... غالبا ... الادوار الاولي ملهاش ابواب ...و كالعاده واحد تاني جه يقولي متألقش ... كل ما فوفو بقي يسمع الكلمه .... يعرف ان الموضوع اتعقد اكتر ... و بقي نفسه ميسمعش كلمه متقلقش .....

الساعه 6.44
لقيت ادامي بدل الحيطه .... فتحه غالبا للتهويه ... مغلقه بشبكه حديد مسلح و مفيش نور نهائي او كهرباء .... و لكن دا كان اخر قرار لهم ... جابو مقصات حديد و قعدو يقصو الحديد و يكسرو في الحيطه ..... علي اضواء الموبيلات ... و من شده التكسير واحد دخل 3 اسياخ حديد في ايده و غالبا حياخد غرز في ايده ...ربنا يشفيه ... و الله عملو الي عليهم بزياده .... لغايه ما فتحو فجوه كافيه لاخراج شخص .. و شالوني ... و اخرجوني للحياه من تاني ....زي الي بيتولد من جديد ...

الساعه 6.50
خرجت للحياه مره اخري .... انا الي اتحبست و هما الي اصابو.... انا جتلي عربيه الاسعاف و لكن هما الي استخدموها... ..الحمد لله ...لم اصاب الا بقليل من التراب علي ملابسي .... مقدرتش اقول غير ان ربنا مش عايز ياخد عمري دلوقتي ...يا رب اكرم و وفق الجماعه اللي انقذوني دول للخير حيث كان... و ابعدهم و بعاد بينهم و بين الحرام ...

الساعه 9.30
فوفو بيكتب المقاله دي دلوقت... لان كل الي قولتو دا بجد مش هزار ...

الحمد لله الذي لا يحمد علي مكروه سواه ...



Wednesday, 17 October 2007

تاج العيد


سلام عليكم ورحمة الله وبركاته
الحمد لله انا خفيت.. من الاربعه ادوار الي كانو عندي ... و جيت بتاج سريع لاني بقالي كتير كان نفسي في تاج ... التاج دا من مدونه خليك في حالك :)

لو قالولك اختار عصر من عصور مصر علشان تعيش فيه تختار أى ‏عصر و فى عهد أى حاكم .. واشمعنى؟

عمرو بن العاص ... محرر مصر من الرومان ...

أول ‏أولويه فى حياتك عيلتك ولا شغلك ولا أصحابك؟
بعد ديني ...العيله و اصحابي المقربين لانهم في نفس مكانه اخواتي


إيه أكتر ‏حاجه بتحبها في رمضان؟
تجمعات الناس في المساجد ايام الاعتكاف... بتلاقي هناك الشيخ الكبير و هنا الصبي الي لسه معداش ال5 سنين . بجد الواحد بيحس ان الدنيا لسه فيها خير ...


اوصف ليا ‏أجمل فطار ممكن تفطره
لما يكون برة البيت في اي مكان مفتوح

لو أنت ‏حاكم على مجموعه من الأفراد هتكون عادل؟؟ طب هتعمل إيه عشان تتأكد إنك حاكم ‏عادل؟
ححاول ...و الكمال لله طبعا ... حمشي براي الاغلبيه ...

اللى بيبوظ الحكام .. نفسهم؟ ولا الشعب؟ ‏ولا الحاشيه المقربه؟
الثلاثه ... مفيش حد بيعمل الي عليه صح ...

مين ‏أكتر إعلامي مصري بتحترمه؟
محمود سعد


قريت ديوان عمر مصطفى صاحب بلوج تجربه " أسباب وجيهه للفرح" ‏عن دار ملامح و لا لسه ؟؟
لأ ... دا اول مرة اسمع الاسم دا ...

لو ‏ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ‏ايه؟
بزنس مان


ايه تانى بلد تتمنى تعيش فيها بعد ‏مصر؟
الكويت : بحكم اني عيشت فيها معظم عمري ...و اعرف فيها ناس طيبين ... و بصراحه بلد بتحترم الي يحترمها ...نظيفه جداً ... و مرتبه ... مفيهاش رشاوي نهائي ...كل واحد بياخد حقه ..

اوصف ليا ‏ترتيبات أجمل فرح ممكن تحضره
كفايه انو يكون لشخص انا بحبه...بس صراحه حكون فرحان جداً لو كان اسلامي ... صاله رجال و صاله نساء ... علشان يكون بادئ حياته بحاجه مش حرام .... لانه مفيش فرح دلوقت مش بيرقص فيه ستات ادام الرجاله ...


بتراعي ‏كلام الناس والقيل والقال؟ لو اه او لو لا قول لى ‏ليه؟
مش حيأثر فيها كتير لو مأقنعنيش... انا بهتم برأي ناس معينه انا بثق فيهم .. بس مش أي حد يقولي حاجه اهتم بيه ...

صحيت من النوم ما لقيتش الموبايل ولا الكمبيوتر ولا ‏الكاميرا الديجيتال ولقيتنا ‏رجعنا لعصر الحمام الزاجل والحصنه هتكون سعيد؟
نفسي اعيش الصدمه دي


السعاده ‏هى؟
انك تنام و مش مزعل حد و حاسس انك مش مزعل ربنا .

عندك أمل ‏؟؟ أسبابك
الامل هو وقود الحياه .

لما تحب ‏تهرب من كل شئ بتروح فين؟
من كل شئ دي كبيرة شويه عموما حسب الموقف : احيانا ممكن اروح كورنيش النيل ... احيانا و دي المفضله اني اروح مكان هادي جدا جدا و افضل ببص علي النجوم .

امتى ‏أول مره خدت فيها نفس طويل كده وقلت بينك وبين نفسك يااااه الظاهر انا فعلا ‏كبرت؟
بعد اما اتخرجت من الكليه بفترة و حسيت اني فعلا مسئول نفسي و اهدافها و شوفت الحياه الشريره بنفسي :(.


لما ‏بتعمل عمل خيرى بيكون ايه هو دافعك الاول؟
زي أي بني ادم : ربنا سبحانه و تعالي


بتشرب ‏سجاير؟ لو الاجابه اه ايه شعورك لو شفت ست بتشرب سجاير؟ وليه ‏؟
الحمد لله لا ...ست بتشرب تبقي مخوخه فكريا و مريضه نفسيا ... بتصعب عليا و بدعيلها ربنا يهديها ..


بتعرف ‏ايدك اليمين من الشمال ازاي؟
انت عايز ايه ؟؟؟ :)

ايه اكتر ‏اله موسيقيه بتحبها ؟ ؟
انا عند رأي لان دي مشكله مأرقاني
قال رسول الله صلى الله عليه وسلم :
((
ليوكنن في أمتي قوماً يستحلون الحر والحرير والخمر والمعازف)) رواه الترمذي جامع الأصول رقم الحديث 7455

والمعازف هي الموسيقى والعود والطبل والبيانو والجيتار
بمعنى اصح هي اي شئ يصدر منه صوت موسيقي
وهنا الرسول لم يقل يستحلون المعازف الحرام ويحرمون المعازف الحلال
معنى ذالك ان المغازف الي هي الموسيقى ليس منها حلال بل كلها حرام
والله أعلم


فى رأيك ليه الذوق والنخوه ‏اتعدموا؟
لان الوازع الديني قل جدا


ايه ‏الحاجه اللى لو حصلتلك تبقى سعيد قوى؟؟؟
لما ببقي مهيس :D لا بجد حاجات كتير قوي ... مش حاجه واحده لو كتبتهم مش حخلص ..


تختار ‏يبقى عندك...أرض زراعيه ولا أجنس عربيات و لا كام عماره و لا فلوس فى ‏البنك؟؟؟؟
كام عمارة


البحر و ‏لا النيل؟؟؟
الاوسع : البحر


مركب و ‏لا طياره؟؟
الابعد : طياره


مجنون و لا ‏عاقل؟؟
في اختلاف واسع في الاراء :)


تقرأ ‏كتاب و لا تتفرج عليه فيلم؟
مبتفرجش علي افلام ...كتاب


أمررة لمين ؟
نظراً لان بقي عندي حبايب كتير من كذا مكان .... افضل مكتبش حد :) و اسيبه للاي عايزه بس يبقي يقولي علشان ابقي اقراه

:D


Saturday, 13 October 2007

انت فين يا فوفو ؟؟؟؟

احم احم ....
انا و اعوذ بالله من كلمه انا .... :D:D:D
طيب بلاش اقول انا .... نقول فوفو ... ما هو اصحابي بيقولو لي كدا .... فوفو ... حتقولي ايه وجه الشبه بين احمد عيسوي و فوفو ....
حقولك هو مش وجه شبه ولا دلع ولا حاجه .... غالبا دا وجه اختلاف ..... هو كدا .... انا مرة صحيت من النوم لقيت اصحابي حبايبي بيقولي يا فوفو .... ازيك يا فوفو... عامل ايه يا فوفو !!!! غالبا حصل حاجه و انا نايم خلتهم يسموني كدا .... علشان كدا انا مش عارف ..... المهم شغلت شويه ذكاء صناعي من اللي عندي نظرا لاني عقليه مش معمليه ولا فذه .... فهمت انهم يقصدوني انا .... :D:D:D

المهم فوفو دا دلوقت تعبان و عندو اربعه ادوار ...
دور برد
و دور كحه خفيفه
و دور تكسير في العظم ( اصله راح النادي و لعب كورة لغايه ما انتقم من نفسه :) )
ودور هلوسه مؤقت (بدليل الكلام الرهيب الي انتو شافينو دا )

فأصحابه حبايبه اتصلو علي فوفو علشان تطمنو عليه ... و واحد منهم اسمه خالد عادل دعاله دعوه حلوه قوي .... لما عرف ان فوفو عندو اربعه ادوار ... قاله يا رب يهد العماره الي عندك دي ...
فوفو لما شاف كل اصحابه بيتصلو عليه يطمنو ... قلق علي نفسه قوي و قال هو كمان يتصل علي نفسه يشوفها عامله ايه دلوقت ... المهم قلق اكتر حاول يتصل علي البيت بتاعه من البيت بتاعه و لقاه مشغول ... بس علشان هو عندو ذكاء صناعي زي ما قلتلكم من شويه ... قال خلاص اطلبه من الموبيل من الموبيل بتاع نفسه ... فبرضو لقاه مشغول .... قلق عليه اكتر ... المهم قال اخر حل انو يكتب المقاله دي يمكن نفسه تشوفها ... و تكتبله كومنت و تطمنه ....