Wednesday, 21 November 2007

ربك لما يريد... يبقي إعفاه بالتأكيد

الحمد لله ... انااااا اخذت اعفااااااااء ..... ايوه ...اعفاء من الخدمه العسكريه ....الحمد لله... انا عارف من فترة و لكن اليوم انا استملت شهاده الاعفاء رسمياً .. و الله لو عليا انا عايز ابرزوها و أعلقها علي الحيطه عندنا ... :D

انا حاليا بزور اخويا و اصحابي كل يوم جمعه ...و بشوف في عيونهم معني كلمه القهر بجد و بحس من كلامهم بالقحط الي هم فيه ...مهما يحكو او يتكلمو ولا حتي يفضفضو ...اكيد مش ححس بنفس الكبت و الضغط النفسي الي هما عايشينه ......و الله اكاد اكون مش مصدق اني مفروض اكون معاهم دلوقت ... و ان كل امنياتي تبقي زيهم دلوقت ... شويه ميه ساقعه يوم الجمعه الي بيستنوها من الاسبوع للاسبوع ... و اكاد اكون مش مصدق اني انا الي مشيت معاهم في كل الاجراءات علشان ورق الجيش ....انا الي قعدت شهر عايش زيهم علي اني داخل الجيش و هيأت نفسي نفسياً .... وفي الاخر اخرج من الجيش من غير ما حد يمسلي طرف ... لكن نقول ايه بقي لما الكرم يكون جاي من عند الي خلقني و خلقك !!!

ربنا كرمه كبير و كل يوم بيزيد ....و لكن الانسان برضو مبيملاش عينه الا التراب . كام واحد حاطط اماله في شئ معين علي واحد معين او واسطه معينه و مش حاطط ربنا في حساباتوه ...... كام واحد بينسي الي اكبر مني و منك ...

انا نفسي ... رغم اني كنت حاطط تكالي علي الله في موضوع الجيش من اوله لاخره ... مكنتش اتوقع اني اخد اعفاء نهائي ....مش وارده في حساباتي .... دا لاني زي اي انسان (ان الانسان خلق هلوعا) ... سعات الواحد بيبص علي الاحتمالات الممكنه الي قدامه و مش حاطط في باله ان ربنا ملوش قاعده يمشي عليها و ان المستحيل مش مستحيل مع ربنا ... و انه اكيد شايف الي الواحد مش شايفه و لو حاسبناها بالورقة و القلم ...

انا واحد من الناس لما كنت رايح التجنيد و انا بخلص الورق ... كان اقصي املي اني مبقاش ظابط ... كان كفايه قوي عندي اني ابقي عسكري .... علشان تبقي سنه مش ثلاثه ...مجاش فيبالي خالص ان ممكن اخد تأجيل او اعفاء لانها مش من الاحتمالات الموجوده ادامي .
و لكن نقول ايه بقي لما الكرم يبقي جاي من عند ربنا .... انا لم اسعي في ايجاد واسطه تنزلني من ظابط لعسكري .... علشان مخدش حق غيري ... وقولت ان اكيد ربنا حيوفقني للخير. .... فعلا صدق رسول الله (ص)(عجبا لامر المؤمن ان امره كله خير ... ان اصابه خير شكرا فكان خير له و ان اصابه شر صبر فكان خير له ).
دا كمان من فضل ربنا انو خلاني اصبر و اشكر مش حاجه واحده ...

في الاول اترشحت ظابط احتياط و بعدين دفعتنا مطلعتش من يوم الارجاء فصبرت ...مثلي مثل اي واحد من دفعتنا ...

و دلوقت اخدت اعفاء و انا عمري اساسا ما توقعت اني حتي ابقي تأجيل ... و لكن نقول ايه بقي ربك لما يريد ...يبقي اعفاء بالتأكيد ....فشكرت و حمدت و سجدت .

الحمد لله كما ينبغي لجلال وجهك و عظيم سلطانك
ضاقت فلما استحكمت حلقاتها فرجت وكنت أظنها لا تفرج -الامام الشافعي-

Sunday, 18 November 2007

خفايا ماسنجر الجوجل

زي ما الكل عارف ان الجوجل عامله ماسنجر اسمه Google talk or Gtalk الاتنين بنفس المعني ....بيتميز بأنه اخف ماسنجر مشهور .... و دا مش حاجه غريبه علي حاجه طالعه بأسم الجوجل ...
دلوقت انا حتكلم علي حاجات موجوده فيه ...ناس كتيره متعرفهاش ... حتي انا اول مرة اعرفها .... عن قريب ...

اختصارات الكيبورد اثناء المحادثه :
Keyboard shortcuts

* CTRL + Mousewheel up/down: تغير خط المحادثه فورياً .
* CTRL + E: توسيط الكلام
* CTRL + R: محاذاه لليمين
* CTRL + L or CTRL+J: محاذاه لليسار
* F9: فتح نسخه من بريد الجوجل Gmail لارساله رساله للشخص صاحب المحادثه .
* F11: بدأ اتصال
* F12: انهاء الاتصال الحالي
* ESC: اغلاق المحادثه الحاليه .
* انا مش عارف اقول علي دي ايه بالعربي .... ممكن نقول اختصارات الوجوه و التعبيرات :-| :-O :-x :-P :-D ;-) :-( :-) B-) :'( :| :O :x :P :D :) :( :)
* علشان تكتب حاجه bold ِ بتحط النص بين نجمتين زي ما هو باين هنا ... , *your gtalk message*
* * علشان تكتب حاجه italicِ بتحط النص بينعلامتين _ زي ما هو باين هنا ... , _your gtalk message_
==========

حاجه جامده قوي و هي دي بقي الي خلتني اكتب المقاله دي ... هي ان الجوجل ماسنجر بعد تسعه دقايق ...بيحول حالتك الي بالخارج away لوحده غير كدا لا .....و مفيش تحكم في الحاله دي خالص بالخارج يعني ....
بس انا بصراحه بحب الحاله دي كتير ... بيني و بينها معزه خاصه :) و المهم لقيت برنامج صغير حجمه حوالي ميجا واحده بيخليك تتحكم في الحاله دي ... براحك ...مش مقيد بالتسع دقايق ... عن طريق انو بيزود عندك في المينو بتاعه الجوجل حاجه جديده زي ما هو باين في الصورة ...
و دا الموقع الرسمي للبرنامج دا ... و عموما هو اسمه galwaysidle
http://www.galwaysidle.com
بس و السلام عليكم و رحمه الله ... :)





Thursday, 15 November 2007

فوفو و دماغه العليا

لو كنت دماغك زي فوفو....
لو عليك شغل كتير في المطبخ شويه و حياخد وقت كبير ... و بس مش بيحب الروتين .... بتزهق من انك كل ما تدخل المطبخ تعمل في صمت لا يقطعه الا صوت حله بتخبط في اختها او صوت حاجه علي النار مش اكتر ......
لو كنت بتفكر في حاجه تسليك و انت جوه المطبخ ....
لو نفسك تشغل الميديا بلاير او الريل بلايل جوه المطبخ كنوع من التسليه و تسمع حاجه ممكن تفيدك .... لا و كأنك ادام الجهاز لو حد بعتلك Nudge علي الماسنجر او بيكلم .... تروح تكلمه ....و ترجع تشوف الي وراك !!!!!!!!!!
يبقي متشيلش هم و خليك مع فوفو ..... حتي لو كان جهازك بعيد عن المطبخ قوي :D
مع فوفو ...كل همومك محلوله .....
فوفو سأل كذا محل اكسسوارات عن حاجه كدا و لكن ملقاش بالظبط الحاجه الي عايزها الا عند محل واحد و غالي قوي و مش عملي ...
بس علشان الحاجه ام الاختراع ...
روحت مفتكش ابتكار صغير كدا علي السريع و حل المشكله الحمد لله ....و مكلفنيش حتي عشرين جنيه علي بعض.....
ببساطه ... جبت عشرة متر سلك نيتورك العادي ابو خمسه و سبعين قرش للمتر... و وصلت ناحيه من السماعات و ناحيه في كرت الصوت ...
حتقولي ازي !!!!!
ببساطه نهايه أي سماعات كمبيوتر في الدنيا ليها 3 اطراف سلك ..... وصلتهم من ناحيه بسلك النتورك عادي و من الناحيه التانيه لسلك النيتورك ...وصلته بنهايه الوصله دي ...و وصلت الوصله دي بالجهاز ....
الوصله دي ...معروفه عن معظم محلات الاكسسوارات .... زي مشترك الكهرباء بالظبط ...بس دي بتوزع صوت مش كهرباء طبعا ...بيوزع الصوت علي فتحتين .... الناس بستعملها لو المزربورد بتاعتهم فيها فتحه صوت واحده و هما مثلا عندهم سماعات خارجيه و سماعات اذن و عايزين يشغلوهم مع بعض ...
محدش يقول ليه بعمل في نفسك كدا !!!!!.... للناس الي ميعرفوش عني او عن فوفو كتير ... انا واحد من الناس والدي مسافر علشان رزقه مكتوب في بلد برة والدتي و اخويا الضغير مع بابا ... و اخويا في الجيش :D بيحمي القوميه العربيه ...
:D:D:D:D:D. انا هنا لوحدي مع اختي و اكيد مش حشيلها كل حاجه :)...
النهايه من مطبخ فوفو ...


Friday, 2 November 2007

عالم افكار ..بس الي ينط بفكرة



انا ححكي حاجه كدا زي حتوته ... ممكن تحصل لاي واحد مننا ... بس يكون فعلا مش مدي نفسه اقل منها حقها ....
سبيني من الكلام دا و بعدين نرجعله ......
اسمع معايا الحكايه دي الاول ....
في يوم 14-5-1984 اتولد واحد اسمه مارك .... (يعني اكبر مني بسنه و اربعه ايام :) ) ولد زي اي ولد في الدنيا دي ... كتبله القدر انه يدخل جامعه فارفرد الشهير في امريكا لما كبر ...
و لان ظروفه او حياته كانت عاديه ... دخل المدينه الجامعه و كان بيدرس علوم الحاسب .... طول عمره .... ولد طبيعي ... بيفكر بطريقه عاديه .... انا لما قريت عنه شويه ملقتش انو كان متميز في حاجه معينه في حياته ....
في مرة من المرات حاول يدخل من الجامعه علي الملف الشخصي (Profile ) لناس تانيه معاه في الجامعه ... لكن لقي ان دي مش من صلاحياته و انه ممنوع من كدا .....
لو كنت في موقفه كنت عملت ايه ؟؟؟؟؟؟؟؟؟؟

لو كان واحد مننا في موقفه ... كان زمانه شتم الجامعه و يمكن الريس و رئيس الوزرا و جاب ابيض و اسود عليهم و دعا عليهم .... و بعد ما خلص الشريط الي حافظه ينفض للموضوع وينسي هو فكر في ايه و خلاص ... و هي دي النقطه الي فرقت في حياته كلها و حياه عيلته كلها كمان ....

هو معجبوش الموضوع دا ... و قال ليه كدا !!!! مفروض الحاجات دي تكون موجوده و ببلاش .... ايه الغلاسه دي ... و حط الموضوع في دماغه و عمل الموقع بتاعه ... بأمكانات عاديه .... و كان اقصي حلمه انو يكون عليه اصحابه و الناس الي في الجامعه ... علشان الناس تعرف بعض ...
الموقع طلع لاول مرة و في حدود الجامعه بس سنه 2004 ؛ لما كان عنده 20 سنه ....

الموقع بتاع حضرته .... Face Book بدأ يمشي بطريقه رهيبه في الجامعه الناس الي برة سمعت عنه ... راح مدخل المدارس الثانويه كمان .... شويه شويه .... راح فتحو للعالم كله ..... هو مش خسران حاجه ....

سنه 2006 لما بقي البشر كلها عرفاه اتعرض عليه ..... من كذا شركه انها تشتريه .... شركه زي الياهو عرضت عليه ....
بليون دولار :D .... سته بليون جنيه يا حضرات .....
طبعا لو حد مننا كان مكانه .... كان زمانه قال .... الحق انفد بجلدي .... شكل ياهو اتجننت و يمكن يقول للياهو لا.... نص بليون بس ... :D

بعديها بسنه و بالظبط من حوالي شهرين ..... بقي عند مستخدمي الفيس بوك 40 مليون مستخدم .... و متوقع علي اخر العام يكونو 50 مليون مستخدم ... ربنا يزيده ...

المهم خلال الشهرين الي فاتو مايكروسوفت جت تعرض علي الاخ مارك انها تشتري 5% من الفيس بوك ب رقم يصل الي 500 مليون ... يعني مايكروسف خلت الفيس بوك يرتفع ثمنه الي 10 بليون دولار ..... ها مين يزود ؟؟؟:D:D

الاخ مارك شاف ان سعر الفيس بوك بقي 10 بليون بس .... فرفض ....
يعمل ايه بقي .... الواد عنده 23 سنه ... رفض علشان يعرف يكمل جهاز العروسه :D

بعد محاورات عديده بين مايكروسفت و الاخ مارك .... مايكروسفت بدل ما تشتري 5% مأدرتش و الاخ مارك رفع السعر و وصله ل 15 بليون ....
من ايام قليله فقط .... مايكروسوفت اشترت 1.6% فقط من الفيس بوك .... ب 240 مليون دولار ... يعني سعر الفيس بوك بقي 15 مليار بس ... :D

ايه الفرق بينا و بين الاخ مارك :
اولا : هو رغم انو مكنش انو يتوقع دا ... بس برضو بيعامل نفسو انو قد دا ... لما لاقي الجامعه مش سمحاله ... ميأس ... ل ... ا دا فكر في حل للمشكله ...
ثانيا : عندو روح المجازفه لابعد الحدود ... واحد اتعرض عليه مليار .... رفض ... 10 مليار ... رفض برضو .... شوف بعد النظر عندو كان لفين .... مش علشان مكنش يحلم انو يمسك مليار ... لما يشوفو يركعلو و خلاص ....

كل الي انا طالبو من نفسي و منكم ... اننا منستحقرش حد ... منستحقرش نفسنا ... حتي لو الظروف الي حولينا وحشه .... هو كمان ظروفه مكنش 100% ... دا كان في مدينه جامعيه في وقت في ناس في جامعته بتروح البيت ....

متستبعد علي نفسك انك تكون زيه .... هو مش اقل ولا اكتر مننا في حاجه ....

هو مخترعش الذره ...علشان يبقي كدا بالحجم الي هو فيه دلوقت .... مش لازم علشان ابقي حاجه كويسه .... اني اعيد اخترع الكون ...ولا اخترع نظريه هندسيه فيزيائه بحته .
عندك ناس من هندسه هنا في مصر عملو كذا موقع ... شويه افكار عندهم ... نجح منها واحد بس و الباقي فشل و هو موقع اطلب ... بعد فترة باعوه ب مليون جنيه من حوالي اربع او خمس سنين ...ايام ما كان المليون دا حاجه ما بيخلص :)...

لو عايز اديك في امثال زيه مش حنخلص ... بالمناسبه في مقوله عجباني بتقول
عاوز تنجح؟.. ضاعف معدل فشلك.. لأنك كل مابتفشل.. كل مابتتعلم أكتر .

انا مش الراجل الفظيع ولا وريث سيدنا لقمان عليه السلام ... علشان اقعد اقول الكلام دا ... انا واحد مصري ....بفكر بنفس الطريقه القاصره الي عند معظمنا و لكني حاليا تحت تأثير الصدمه (قرائه الخبر)... نفسي اكون حاجه زي الراجل دا ..... انا كنت متابع اخباره من قبل ما مايكروسفت تشتري عنده لانه فعلا اظهر علي الاقل ليا نقاط اختلاف كتيرة بينا و بينه .... مارك ميفرق كتير عن معظمنا ... و الكلام الي انا كتبته دا .... دا نتاج انبهار و تفكير الايام السابقه بعد ما عرفت ان مايكروسفت اشترت عنده ...

دا تعليق حطيته عندي في الماسنجر اول ما عرفت الخبر :
بجد بجد العالم دا عالم افكار ...الفلوس طايرة في الهواء كتير .... بس اللي ينط بفكرة ==الفيس بوك ب 15 مليار

بعيد عن كل الكلام دا ...و الحاجات الي تشرح القلب دي .... لو كنت انت مارك ... و معاك ال15 مليار بس :D .... كنت عملت ايه ؟؟؟؟؟ ........
يا ريت من الي يقرا المقاله يقولي ... :)