Saturday, 13 December 2008

حاجه تكسف


انا ححكي موقف عاصرته النهارده صراحه خلاني في قمه الضيق و الخجل الشديد. علشان مدخلش في مقدمات انا ححكي علي طول.

النهارده كنت عايز اروح اقابل اصحاب ليا في شارع الطيران.المهم استقليت ميكروباص من موقف الف مسكن للحي السابع لانه بيمر علي شارع الطيران.
بعدما تأكدت من التباع ان الميكروباص بيروح للحي السابع؛ ركبت في الكنبه قبل الاخيرة و بعدما امتلاء الميكروباص بالركاب ...بدأ بالتحرك ..لقيت البنت الي جنبي بتتكلم لغه اجنبيه لم افهمها و هي ليست بالانجليزيه لبنتين علي الكنبه الي امامي. لفت نظري لبسهم المحتشم لدرجه عاليه و حجابهم الرائع للغايه.
و ما هي دقائق من حركه الميكروباص حتي قالت احداهن للتباع باللغه العربيه الفصحي و قد ظهرت ملامح وجهها ذات السمات الاوروبيه البيضاء:
"هذه أجرة ثلاث افراد من فضلك" (سيبك انت من الكلام الي قعد يرميه التباع).

طبعا باين من الكلام انهم بنات مسلمه غير عربيه و من دوله اوروبيه و ما ميزهم اكثر من ذلك زيهم الاسلامي الصحيح.

مش عارف ليه تذكرت حديث الرسول حين الوفاه عندما بكي :
فقال له الصحابه : ما يبكيك يا رسول الله ؟
فيقول لهم صلي الله عليه و سلم : إشتقت إلى إخوانى , فيقولون : أولسنا بإخوانك يا رسول الله ؟
قال صلي الله عليه و سلم : لا أنتم أصحابى , أما اخوانى فهم قوم يأتون من بعدى يؤمنون بى و لم يرونى.

مش عارف ليه حسيت بمعني الحديث دا قوي في اللحظه دي و حسيت بالاسي الي وصلنا ليه كعرب مسلمين... ناس من اقصي الارض و من بلاد غير مسلمه و بلاد لا تتحدث العربيه اساساً .... وواصلهم الدين و متمسكين بالدين احسن مننا.

انا فعلا كنت قاعد خجلان من حالنا (ولاد و بنات)و ياتري هما حيقولوا علينا ايه!!! و هما شايقين السفور دا كلو .

مش عايز اقارن بينهم و بين بنات بلدي ... لان لو الحق حيتقال حنزعل بنات بلدي...
الي ممكن اقوله اني اترحم علي الحياء و الغيرة و الحشمه و العفه و الادب.
اني اترحم علي قول الامام علي رضي الله عنه : على قدر الحياء تكون العفّة.

8 comments:

m-hewedy said...

جزاك الله خيرا

Bongo said...

السلام عليكم

مشكلة فعلا ان الناس - المصريين و اغلب العرب المسلمين حاليا - مش بيقدروا الاسلام كنعمة
و مش بيفتكروا ان الرسول عليه افضل الصلاة و السلام تعب جداا في حروب و قتال و فراق لبلده علشان ينشر الدين اللي احنا اتولدنا لقيناه من المسلّمات

الفرق ان الأجانب او اللي اتولدوا في دول غير مسلمة ملقوش الاسلام من المسلّمات زينا , هما اختاروه بأرادتهم لما شافوا قد ايه هو دين عظيم
علشان كده يمكن حاسيين بقيمته اكتر ..

فأحنا بدل ما نقول الحمد لله علي النعمة دي بنفرط فيها و مش بنحترمها
علي عكسهم

فعلا عندك حق المقارنة هتبقي في صالح البنات الأجانب المسلمات , لأنهم اقتنعوا بأن ده الصح فنفذوه.. اماالبنات المصريات المسلمين اقتنعوا انه صح بس منفذوش - و طبعا الكلام ده علي نسبة معينة من البنات مش كلهم علشان منظلمش حد -

ربنا يهدي شباب و بنات المسلمين يارب
فعلا حاجة تكسف !

هوندا said...

ربنا يهدينا ويهدى شباب وبنات المسلمين جميعاً

ونفهم دينا صح ونحاول نأسسه لأولادنا صح

كريم عبد المجيد said...

ما اكتر الحاجات الي تكسف في بلدنا واحنا المسلمين الي تنزل علينا الدين
ربنا يعافينا

آلام وآمال said...

معاك حق والله يا احمد
احنا كعرب للأسف مش مقدرين قيمة النعمة اللي ربنا جعلنا مولودين بيها كده

إلا من رحم الله طبعا
وربنا يهدينا

L.G. said...

عفواً
ولكن لم تتأسف على حال المسلمات
أغلب صديقاتي اتجهن للحجاب الشرعي من العباءة الفضفاضة والكثيرات يتجهن للنقاب أحيانا

أنت رأيت 3 فتيات وفقط
الشعب المصري وحده كام مليون وكام وحدة فيهم ملتزمة كثيرات
العين ترى ما تبحث عنه

أجد توجهاً معتدلا من كثير من البنات حاليا للحجاب الشرعي الذي لا يصف ولا يشف

الدين في القلوب ولا يعلمه الا الله وليس فقط في الملبس أغلب الدول الخليجية يرتدين النقاب والله اعلم بقوة الدين عندهم

مصر بخير والحمد لله ادخل المدارس والجامعات واعمل احصائية عادلة

في محيط من أعرف لا اعرف بنات يتخطين حدود الاخلاق في الملبس وكثيرات وصغيرات في السن يلتزمن تماما باللبس الشرعي

أحيانا الاجنبيات يلبسن كذلك نوع من التميز وكذلك البعض في لبس النقاب

لا تحكم على الناس لا ظاهرا ولا باطناً
فقط ادعو بالعفة والصلاح لأمة المسلمين رجالا ونساء

تحياتي

Zo0oZ said...

السلام عليكم
ممكن ده يزعلك فعلا على حال العرب لانه المنتشر أو الظاهر مفيش فيه أي مفهوم للاسلام

ناس كتير بتاخد الاسلام من قشوره و تنسى أصله " الدين المعامله "

مش بس على الحشمه .. يعني صادفت في حياتي أكتر من بنت منقبه بس الغالبية العظمى منهم لما اتعاملت معاهم لقيت انها لو قلعت النقاب و مشيت بشعرها يكون أنسب لشخصيتها و سوء معاملتها

و العكس كمان كنت أعرف ناس حجابها عادي أو حتى بدون حجاب لكنها عاقله جدا و محترمه في تصرفاتها .. و بعد فتره من الزمن لقيت اللي كانت بدون حجابها اتحجبت و ربنا هداها لانه جواها طيب

ادعيلهم بالهداية و زي ما فيه ناس كده فيه برضو ناس كويسه حتى لو كانوا مش ظاهرين زي الناس التانيه

ياريت أعرف رأيك في الموضوع اللي عندي طااازه و فرّح كل العرب

doaa said...

أكيد في ناس كتييير قوي صادقة في إيمانها مفيش شك
بس برده وجهة نظرك واضحة جداً وللأسف إنها حقيقية
هو الموضوع بس إننا بنغير لما نشوف حد أجنبي بيحب ربنا أو نبينا عليه الصلاة والسلام أكتر مننا
ربنا يهدي كل المسلمين وينجينا يارب
الموضوع رائع وواقعي