Tuesday, 15 May 2007

العقل المصري

من ارشيف مقالاتي بتاريخ فبراير 2007
سنه 2007 بتمثل ليا عصر الحاجات الغريبه .انا كنت اتوقع اي حاجه في اي حاجه . يعني لو قالولي ان الناس وصلو بلوتو مثلا حصدق . كل حاجه الواحد ميتخيلهاش بقت بتحصل . و من كترة المفاجأت الي الواحد شافها مكنتش اتوقع اني ممكن اتفاجئ بحاجه تاني .
و كنت بحاول اجيب تعريف للعقل المصري وسط هذه التكنولوجيا السريعه .
و لكن اسمعي مني الكلمتين دول و انا بعرف العقل المصري .
مرة كنت في سوبر ماركت في روكسي بجوار نادي هيليوبلس . مشيت من جنب ركن التسالي زي ما بيقولو يعني اقصد الراجل بتاع المقله . لقيته عارض لب سوبر :) .
دا فيها حاجه :) .
اه فيها . لاني لقيت حضرته عارض لب سوبر بالجبنه و لب سوبر تاني بالباريكو و لب سوبر عادي . و فول سوداني عادي و بملح و اسواني و بالجبنه و بالبابريكو و بالعسل و السمسم . D:D:
و عندو حاجات غريبه كتير . بس و الله طلعت حلوه .
اتفاجئت و قولت هو دا العقل المصري .
مرة تانيه كانت قبلها بشهر ولا حاجه . واحد صاحبي قالي في عصير لب بس ايه طعمو جامد جدا و قعد يقول فيه ابيات شعر و كلام كتير خلاني قولت لازم اجربو علشان اثبت لنفسي انو اتجنن و مفيش حاجه اسمها كده .
روحت معاه للمحل بتاع العصير و لقيته بيقول اتنين عصير لب كبير .انا سمعت كده و روحت مغمض عيني و استسلمت للقدر و قولت الراجل حيضربنا دلوقت و يقول علينا محششين ولا حاجه كده . و لكن الي حصل اني لقيت الراجل بتاع العصير بيقولي عنييا الاتنين و بيقول بصوت عالي اتنين عصير لب كبير .بيقولها بسهوله كده كأنه بيقول اتنين عصير قصب :) .
ساعتها قولت يبقي الراجل كمان مجنون يظهر الناس كلها اتجننت في المنطقه دي .و لكن رغم كدا اخذتني ابتسامه رهيبه و عريضه و معرفتش امنع هذه الابتسامه نهائي .لغايه ما الراجل ادانا الكوبيتين و فعلا طلعو بطعم اللب . و بجد طعمهم كان ظريف . و لما رجعت البيت عملتو لتيته و اختها و كانو بيبصولي بنفس النظرات الغريبه و افتكروني مجنون و في الاخر قالو حيعملوه في بيوتهم .
اتفاجئت و قولت هو دا العقل المصري .
بعدها بكام يوم سمعت ان في عصير سوداني :) :) :) :) .برضو كان حلو .
اتفاجئت و قولت هو دا العقل المصري .
اما صحيح برضو سمعت ان في عصير جرجير D:D: بس دا لايمكن اجربو و مقولتش :)
هو دا العقل المصري .


17 comments:

Batta said...

:D:D:D:D:D:D:D masha2 allah da fadel a yet3ml 3ser :D
l2 bs ana est7ala ashrb 3ser el leb wel sodane wel 7agat el 3'reba de :S y333333:S
wb3den yahmed talma enta shrbt el 7agat de grb 3ser el grger ba2a 3shan t2olna t3mo 7elw wala l2 :D efred 7d s2lna n2olo mesh n3rf y2ol 3lena a?yala d7e bnfsk ba2a 3shana.mesh enta shm3a t7trk mn agl ala7'reen;):D:D

ah w yaret bs t2ole tare2et 3ml 3ser el leb 3shan a3mlo le7'wate lw dy2one fe ay 7aga :D:D:D:D

Wafaa said...

looooooools :D:D:D:D:D
والله انا مش متخيله خالص عصير اللب دي
طب ده يتعمل ازاي تقشر اللب وتعمله في الخلاط ولا تخليه بالقشر اهو برده القشر المملح ليه طعم حلو.
في حاجه كمان كم لبه بقي ان شاء الله
تعمل كوبايه عصير :D:D:D
بس انا عايزه اسألك بجد بإعتبارك خبره في التجارب الغريبه دي
ايه إحساسك بعد ما دوقت عصير اللب وغيره من العكشن والحاجات الغريبه دي ,حاسس انك طبيعي ولا في اعراض جانبيه عشان بس الواحد ياخد حذره "اسأل مجرب:D:D"
بالنسبه بقي لعصير الجرجير انا أعرف انه بيتعمل ماسك للشعر مع حاجات تانيه بس ممكن تجربه نشوف لما يتشرب ايه اللي هيحصل الجرجير ليه فوايد كتير برده:D:D

وأخيرا هو دا العقل المصري ناس مخها ذري ليها أختراعات غريبه مش فالحين غير في الأكل وبس

Mai_3ssam said...

دة غير كدة الواحد مش عارف يحط فيه سكر و لا ملح ؟ :S:S:S


و عصير الجرجير بردوا يتحط فيه ايه خل ؟ :S:S:S

Rehab Mostafa said...

مممممم
هو اللي أنا فهمته ان تعريفك للعقل المصري انه بيقول لأ على الحاجه من غير مايجربها ولما يجربها بيعرف انه كان غلطان لكن برضه مش بيعترف بغلطه
:D أنا مش عارفه انا فاهمه ولا لأ
بس أنا لما قريت كنت بدور على العنوان فى المقاله بغض النظر عن العصير :D
وبالنسبه للعصير أنا أصلاً بقرف من ريحة اللب مش معقوله هشرب لب :D
الله أعلم لو جربته هقول ايه مانا مصريه برضه
أما عن الجرير أنا مش بحبه بس ممكن أجربه لو اتحط عليه سكر وكنت جنب مستشفي علشان أعمل غسيل معده على طووووووول
معلش طولت شويه بس عايزه أعرف هو أنا فهمت صح ولا خرفت :-?:-?
thnx

Ahmed Essawy said...

@ Fatma
:D:D
ايه الهجوم دا كلو و الله انا معملتش حاجه غلط . الحمد لله اني مكملتش علي العصاير التانيه وولا كتبت عن عصير البلح بالعسل باللبن و الجرجير و الايس كريم .
:D:D:D
و الله انا مش بهزر .

بجد فيه حاجه اسمها كدا . بس الحمد لله مجربتوش برضو .
لان المحل مفيش جنبو مستشفى قريبه


و بعدين الي متعرفيهوش ان عصير اللب حلو و طعمو جميل يعني لو كنت فاكره ان لما حد يغلس حتعمليهولو حتلاقي الناس كلها بتغلس عليكي
:P

Ahmed Essawy said...

@ wafa2

برضو حرد عليكي بنفس الرد الي في اول ردي علي فاطمه
.

اما عن شعوري و انا بشرب العصير .
في الاول بفرح و انا ماسك الكوبايه و فيها لب مش شايفو
:D
و لما بتخلص الكوبايه
ببقي زعلان انها خلصت .
:(

Ahmed Essawy said...

@ Mai

الواحد لما بيحب يشرب الحاجات دي مش بيفكر اذا كانت بالملح و لا السكر .
انا لما فكرت اشربو . مجاش في بالي السؤال دا .
:D
بس عموما هو بالسكر .

اما بالنسبه للجرجير
و الله انا مليش دخل بيه . اسمو اصلا مش عاجبني
:)

Ahmed Essawy said...

@ re7ab

فعلا انا حاسس انك خرفتي .
شكلك مش بتحبي الجرجير .
:D
عموما انا هدفي من الموضوع دا اساسا اني اتكلم عن الافتكاسات المصريه بطريقه فكاهيه .
و اكيد طبعا مش حعرف اجيب تعريف للعقل المصري لانو غني عن التعريف .

Batta said...

:D yabnte enta lesa faker trod :P da ana 2olt aked 3mlt bns7te w grbt 3ser el grgeer :$ wa23dt a2ol ya 3ene kan tyb :D yala al7amdoelleah enk lesa b7'er :D:D

Ahmed Essawy said...

@ Fatma
انا اتأخرت في الرد بسبب تأثير المذاكرة شكلها بتأثر علي الواحد اكتر من الجرجير .
:)

Ramy Mahrous said...

يابني انت لسه علشان جديد في مصر
تعرف زيزو نتانه؟
اه ده عنده سندوتشات مهلبيه
لا مش مهلبيه في اطباق
في عيش فينو

تعرف بقى بحه ده قريب مني ابقى اخليك تاكل من عنده حاجات جامده هي موجوده في الحيوانات الي بناكلها قصدي يعني فالخرفان وكده بس الناس بيشلوها الراجل ده مش بيشلها

سيبك من الناس ده تعرف كيلو كباب ب 17 جنيه
:D:D:D:D:D:D:
ولا تقولي ابو حسن ولا ابو شقره ولا ابو رامي حتى
ده بقى من عند محل اسمه تقريبا احمد هوهو
ايوه هوهو يعني المصدر الرئيسي للحمه الحيوان الي بيقول هوهو
:D:D:D:D:D:D:D
تعرف هو اه :D??
والناس عليه بالضرب

سيبك من كل ده انا ليه واحد صحبي ايام الثانوي كان بيجب الموز ويحتو فالفينو وياكل عادي وباهنا والشفا
:D
هو ده القرش المصري مش العقل المصري

Ramy Mahrous said...

طب سوال هو عصير اللب بقشره ولا من غير؟
وعصير السوداني
سوداني بقشره ولا سوداني اسواني ولا حلواني ولا سوداني مملح؟
ولا هو سوداني ساده ويضافلو
favor :D
حسب المذاق
:D :D :D

Ahmed Essawy said...

@ Ramy
طبعا سمعت عن الحاجات دي .
و طبعا مجربتهاش .
و احب اصلحلك معلومه.
حسب ما سمعت ان كيلو الكباب ب 8 جنيه
:D
ولا يمكن دا سعر كيلو الكفته و انا ناسي
:D:D
الله اعلم .
و حاجه تانيه
لا تسألوا عن أشياء إن تبد لكم تسؤكم
:D
اهم حاجه الطعم سيبك انت من بقشروا و لا متأشر .
خليك راجل بتاع مزاك
:D:D

ريحانة said...

اللي جربته وحلو جدا في كل ده
البلح باللبن

لكن معرفش بصراحة:D:D

Aemy said...

على فكره بقى يا احمد انا اول لما قريت الموضوع خرفت زى رحاب باردوا وقلت احمد يقصد ان الشعب المصرى معظم اهتماماته بالاكل , ودى الصراحه شايفها فى المصريين والعرب بوجه عام
ياعنى نفرح ناكل نزعل ناكل نروح البيت نسأل على الاكل ونقوم من النون نسأل على الاكل , نفتح التلفزيون نتفرج على برامج الاكل ونمدح الزوجه علشان نفسها حلو فى الاكل ورابطين كل المناسبات والاعياد بالاكل , لحد خلاص ما الصرف الصحى اشتكى مننا
حتى افتكاستنا متركزه فى الاكل
بس ده ممكن نسميه الطفاسه المصريه مش العقل المصرى
قولى بقى اللب السوبر بالجبنه طعمه حلو؟
:)

Rehab Mostafa said...

@ 3mad
ماهو ياعماد علشان احنا مالناش في حوار الأكل ده خاااااااالص فكرنا كده :$:$
يعني أنا لاأعتقد انك بتصحى من النوم تدور ع الأكل وكده زيي يعني :$:$:$
علشان كده كانت دي اخر حاجه فكرنا فيها واتجه عقلنا للتخريييف

Ahmed Essawy said...

@ all
انا اسف علي التأخير في الرد بس للاسف .
مش بدخل النت كتير .
:)

@ Noran
شكرا علي التعليق .
و كويس ان في حد فكر يجرب حاجه
:D .

@ Amey
اللب السوبر بالجبنه حلو قوي .
علي فكرة هي مش جبنه بجد .
مش جبنه بيضه مثلا .
عارف انت الشبسي الي بيكون بطعم الجبنه .
هو عامل زي بالظبط .
بيحطو النكهه بتاعه الجبنه علي القشر .
:)
جربو و مش حتخسر .