التخطي إلى المحتوى الرئيسي

عالم افكار ..بس الي ينط بفكرة



انا ححكي حاجه كدا زي حتوته ... ممكن تحصل لاي واحد مننا ... بس يكون فعلا مش مدي نفسه اقل منها حقها ....
سبيني من الكلام دا و بعدين نرجعله ......
اسمع معايا الحكايه دي الاول ....
في يوم 14-5-1984 اتولد واحد اسمه مارك .... (يعني اكبر مني بسنه و اربعه ايام :) ) ولد زي اي ولد في الدنيا دي ... كتبله القدر انه يدخل جامعه فارفرد الشهير في امريكا لما كبر ...
و لان ظروفه او حياته كانت عاديه ... دخل المدينه الجامعه و كان بيدرس علوم الحاسب .... طول عمره .... ولد طبيعي ... بيفكر بطريقه عاديه .... انا لما قريت عنه شويه ملقتش انو كان متميز في حاجه معينه في حياته ....
في مرة من المرات حاول يدخل من الجامعه علي الملف الشخصي (Profile ) لناس تانيه معاه في الجامعه ... لكن لقي ان دي مش من صلاحياته و انه ممنوع من كدا .....
لو كنت في موقفه كنت عملت ايه ؟؟؟؟؟؟؟؟؟؟

لو كان واحد مننا في موقفه ... كان زمانه شتم الجامعه و يمكن الريس و رئيس الوزرا و جاب ابيض و اسود عليهم و دعا عليهم .... و بعد ما خلص الشريط الي حافظه ينفض للموضوع وينسي هو فكر في ايه و خلاص ... و هي دي النقطه الي فرقت في حياته كلها و حياه عيلته كلها كمان ....

هو معجبوش الموضوع دا ... و قال ليه كدا !!!! مفروض الحاجات دي تكون موجوده و ببلاش .... ايه الغلاسه دي ... و حط الموضوع في دماغه و عمل الموقع بتاعه ... بأمكانات عاديه .... و كان اقصي حلمه انو يكون عليه اصحابه و الناس الي في الجامعه ... علشان الناس تعرف بعض ...
الموقع طلع لاول مرة و في حدود الجامعه بس سنه 2004 ؛ لما كان عنده 20 سنه ....

الموقع بتاع حضرته .... Face Book بدأ يمشي بطريقه رهيبه في الجامعه الناس الي برة سمعت عنه ... راح مدخل المدارس الثانويه كمان .... شويه شويه .... راح فتحو للعالم كله ..... هو مش خسران حاجه ....

سنه 2006 لما بقي البشر كلها عرفاه اتعرض عليه ..... من كذا شركه انها تشتريه .... شركه زي الياهو عرضت عليه ....
بليون دولار :D .... سته بليون جنيه يا حضرات .....
طبعا لو حد مننا كان مكانه .... كان زمانه قال .... الحق انفد بجلدي .... شكل ياهو اتجننت و يمكن يقول للياهو لا.... نص بليون بس ... :D

بعديها بسنه و بالظبط من حوالي شهرين ..... بقي عند مستخدمي الفيس بوك 40 مليون مستخدم .... و متوقع علي اخر العام يكونو 50 مليون مستخدم ... ربنا يزيده ...

المهم خلال الشهرين الي فاتو مايكروسوفت جت تعرض علي الاخ مارك انها تشتري 5% من الفيس بوك ب رقم يصل الي 500 مليون ... يعني مايكروسف خلت الفيس بوك يرتفع ثمنه الي 10 بليون دولار ..... ها مين يزود ؟؟؟:D:D

الاخ مارك شاف ان سعر الفيس بوك بقي 10 بليون بس .... فرفض ....
يعمل ايه بقي .... الواد عنده 23 سنه ... رفض علشان يعرف يكمل جهاز العروسه :D

بعد محاورات عديده بين مايكروسفت و الاخ مارك .... مايكروسفت بدل ما تشتري 5% مأدرتش و الاخ مارك رفع السعر و وصله ل 15 بليون ....
من ايام قليله فقط .... مايكروسوفت اشترت 1.6% فقط من الفيس بوك .... ب 240 مليون دولار ... يعني سعر الفيس بوك بقي 15 مليار بس ... :D

ايه الفرق بينا و بين الاخ مارك :
اولا : هو رغم انو مكنش انو يتوقع دا ... بس برضو بيعامل نفسو انو قد دا ... لما لاقي الجامعه مش سمحاله ... ميأس ... ل ... ا دا فكر في حل للمشكله ...
ثانيا : عندو روح المجازفه لابعد الحدود ... واحد اتعرض عليه مليار .... رفض ... 10 مليار ... رفض برضو .... شوف بعد النظر عندو كان لفين .... مش علشان مكنش يحلم انو يمسك مليار ... لما يشوفو يركعلو و خلاص ....

كل الي انا طالبو من نفسي و منكم ... اننا منستحقرش حد ... منستحقرش نفسنا ... حتي لو الظروف الي حولينا وحشه .... هو كمان ظروفه مكنش 100% ... دا كان في مدينه جامعيه في وقت في ناس في جامعته بتروح البيت ....

متستبعد علي نفسك انك تكون زيه .... هو مش اقل ولا اكتر مننا في حاجه ....

هو مخترعش الذره ...علشان يبقي كدا بالحجم الي هو فيه دلوقت .... مش لازم علشان ابقي حاجه كويسه .... اني اعيد اخترع الكون ...ولا اخترع نظريه هندسيه فيزيائه بحته .
عندك ناس من هندسه هنا في مصر عملو كذا موقع ... شويه افكار عندهم ... نجح منها واحد بس و الباقي فشل و هو موقع اطلب ... بعد فترة باعوه ب مليون جنيه من حوالي اربع او خمس سنين ...ايام ما كان المليون دا حاجه ما بيخلص :)...

لو عايز اديك في امثال زيه مش حنخلص ... بالمناسبه في مقوله عجباني بتقول
عاوز تنجح؟.. ضاعف معدل فشلك.. لأنك كل مابتفشل.. كل مابتتعلم أكتر .

انا مش الراجل الفظيع ولا وريث سيدنا لقمان عليه السلام ... علشان اقعد اقول الكلام دا ... انا واحد مصري ....بفكر بنفس الطريقه القاصره الي عند معظمنا و لكني حاليا تحت تأثير الصدمه (قرائه الخبر)... نفسي اكون حاجه زي الراجل دا ..... انا كنت متابع اخباره من قبل ما مايكروسفت تشتري عنده لانه فعلا اظهر علي الاقل ليا نقاط اختلاف كتيرة بينا و بينه .... مارك ميفرق كتير عن معظمنا ... و الكلام الي انا كتبته دا .... دا نتاج انبهار و تفكير الايام السابقه بعد ما عرفت ان مايكروسفت اشترت عنده ...

دا تعليق حطيته عندي في الماسنجر اول ما عرفت الخبر :
بجد بجد العالم دا عالم افكار ...الفلوس طايرة في الهواء كتير .... بس اللي ينط بفكرة ==الفيس بوك ب 15 مليار

بعيد عن كل الكلام دا ...و الحاجات الي تشرح القلب دي .... لو كنت انت مارك ... و معاك ال15 مليار بس :D .... كنت عملت ايه ؟؟؟؟؟ ........
يا ريت من الي يقرا المقاله يقولي ... :)

تعليقات

‏قال Rehab Mostafa
بصراحه حاجه تعقد :D
كلامك والله صح بس أصل احنا لما بنفشل مره بنحس ان دي نهاية العالم وخلاص بقى مش هنعرف ننجح مش زي مانت بتقول نتعلم من فشلنا لأ خالص احنا الحمد لله بنسيب الفشل يسيطر علينا أويي ونستسلمله
مش عايزه أدخل ف حكاية انه مش مصري دي بلاش علشان احنا الغلطانين أصلاً وهو مش احسن مننا ف حاجه:D
-----------
15 مليار بس يعملوا ايه دوول :D...
لسه واحد النهارده طلب مني عربيه ولابتوب والله لو معايا أجبلو العربيه واللاب توب ووعد مني مش أي عربيه ولا أي لاب توب هسافر وألف الدنيا علشان أجبهم بس ...أهي حجه كويسه ألف بيها العالم... بعد كده بقى بصراحه أنا مش مستوعبه كمية الاصفار دي كلها ممكن يتعمل بيهم ايه .. بس بالامانه ومن غير تناكه أنا ماحبش يبقى معايا الفلوس دي كلها.. من غير ضرب بس :$ أكد هوزعها على اصحابي الغلابه المساكين الفقراء الكحيانين يااااه ده انا هبقى تنكه بمعنى الكلمه ....ا
كلام جميل لكن أنبهك إلى فكرة أن المقاييس والمعدلات الغربية للنمو غير عندنا وده مش تثبيط ولكنه دعوة للواقعية لي صديق عاش في أمريكا فترة وتعود على هذه الأفكار التي أسميها بالهرمونية

وعنده أفكار كثير ولكنها تفشل هنا فينبغي التفكير بمقاييس الواقع وعدم التأثر بمثل هذه التجربة أو تجربة بيل جيتس أو لينوس تورفالدس وهكذا
‏قال أحمد
تدوينة ممتازة با أحمد

وجميلة الجملة دى
"عاوز تنجح؟.. ضاعف معدل فشلك.. لأنك كل مابتفشل.. كل مابتتعلم أكتر"

فكرتنى بجملة تانية برضة قريتها النهاردة الصبح
"الفوز هو ألا تخشى الفشل"

وهو الموضوع فعلاً بيتلخص فى فكرة تعبر عن إحتياج فعلى (أو تحسين وإضافة لشىء موجود بالفعل) , وتنفيذ صح , ومناخ ملائم , دة بجانب أن طريقة التفكير نفسها لازم تتغير , ولازم ن
"Think outside the box"

الإحتياج الفعلى محتاج عين ثاقبة تقتنصه وهو طاير حيران .
التنفيذ الصح محتاج علم , وتنفيذ خطوات متسلسلة بدون فهلوة .
أما المناخ الملائم فدة اللى للأسف مش موجود عندنا فى مصر لكن فيه ناس بتنجح فى المناخ دة على أى حال , والأمثلة كتير زى ما أنت قلت فى التدوينة , وبيقدروا بعد كدة يخلقوا المناخ المناسب حواليهم .

ودة اللى عمله مارك .. الفيس بوك كان إحتياج فعلى سواء له هو شخصيا أو لطلبة جامعته .. ونفذها صح .. وفضل صاااااااابر على فكرته , وهو شايفها بتكبر يوم بعد يوم .. دة لغاية 4 شهور بس ماكنتش بشوف إعلانات على الفيس بوك , دلوقتى شوف الإعلانات عليه عامله ازاى و
........

كفاية كدة

:)
‏قال Mai_3ssam
السلام عليكم و رحمة الله و بركاته

أنا اتعقدت اه بس بردوا اديتني امل أن لو الواحد لو عايز ينجح يضاعف عدد مرات الفشل ... حقيقي طلب العلم دة عايز صبر فظيع و تركيز ...بس هي جت معاه بالصدفة في الاول على فكرة يعني هو ما كنش يتوقع ان الموقع بتاعه يوصل للعدد دة, مش زي بيل جيتس ... سبحان الله رزقه .
15 مليار متهيألي مش هعمل بيهم حاجة من كتر ما هحس انهم كتير بس ممكن اديهم لمستثمر كويس دة طبعا بعد ما أبسط نفسي أنا و اللي حوليا :D و أطلع حج و أشتري عربية و لو حد عايز يسدد ديونه و بكدة يكونوا خلصوا خلاص و ما فيش داعي للمستثمر :D
‏قال غير معرف…
eshta ya essawy.. nice post
bas besara7a ana 3andy comment wa7ed

ana 3agbany el gomla ele enta kont katebha fe el header beta3 ur blog kter men ele maktoba now ..
beta3et fe 7agat keteer 7elwa lazem nensaha 3alashan nerta7 .. a7la men ele enta katebha now ... hope to c it again ..

Yatara .. who um i ????
‏قال sakayar
أولا بشكرك لزيارتك مدونتي المتواضعة ...شرفتني فيها
وبحييك على مدونتك الجميلة دي وأفكارك أو حماسك الجميل
وفيه مقولة لأحد المستثمرين الأغنياء في العالم ... لما سألوه عن النجاح ... قال النجاح يأتي من القرارات السليمة ...قالوا ومن أين تأتي القرارات السليمة؟؟ قال: بالخبرة ... قالوا ومن أين تأتي الخبرة ؟؟؟ قال من كثرة القرارات الخاطئة
وبرضه أنا معاك بإن شاب زي مارك حقق حاجة بايجابية ولإنه شايف نفسه إنسان ...وانسان دي معناها كبير أوي ...لكن بتفق مع تعليق أخي عصفور المدينة في إنه المشكلة مشكلة المحيط اللي حواليك أو امكانيات المجتمع واللي يقدروا يقدموه أو يقدروا يقبلوه ... أعرف مجموعة شباب عملوا جمعية للخير في بلدهم وقدموا من خلالها خدمات كتير جدا وأول ما اشتهروا في البلد دي واتعرفوا ... جالهم قرار بوقف الجمعية لإن مساحة اللعب في البلد لا يحتمل وجود جمعية بالحجم الكبير بتاعهم ده ... على الرغم من إنهم مش طلبوا من حد مساعدة وكانوا معتمدين على نفسهم ... بس أتمنى في يوم من الأيام يكون شبابنا كلهم أفضل من مارك كمان ...آسف على التطويل
شوكرن على مدونتك الجميلة دي
‏قال Ahmed Essawy
@ رحاب مصطفي
هي دي جزء مهم من المشكله فعلا ...
كلنا بنعاني منها ...
هي ليها اسبابها فعلا ...وعلي فكرة الفكر الهدام دا موجود في كل مكان ... حتي في امريكا نفسها .... المشكله في نسبه الافكار الهدامه دي في المجتمع و وجود بيئه مناسبه لارتقاء الفكر ...

==
ربنا يرزقك خير الرزق يا رب ... و تصرفيه في الي انت عايزاه ... بس بلاش تبقي تنكه دي ....
:D
في ناس كتير ربنا رازقهم و مش تنكين ...
:)
عارف انك اكيد بتهزري .....
‏قال Ahmed Essawy
@ عصفور المدينه

مش عارف ... انا مش معاك علي طول الخط .... ايوه افكارهم صح زيما انت بتقول هرمونيه ....
ايوه الظروف عندهم احسن ....
ايوه التعليم عندهم احسن ...
ايوه و ايوه و ايوه ...
بس برضو في حاجات موجوده بالفطره و احنا مش عاملين ليها اهتمام ...
مش شرط ان احنا علشان الحاجات دي مش موجوده عندنا بنفس الطريقه الي عندهمم يبقي خلاص نشتري دماغنا و نندب الحظ .. ومنحاولش و ترمي المشكله علي الطروف ...
مش شرط ان النجاح يكون بنفس الطريقه ...
قصص النجاح لما تتأمل فيها حتلاقيها الغايه واحده و لكن الوسيله غير خالص ...
البشمهندس احمد بهجت .... الاستاذ عمر اديب ...البشمهندس خالد بشار
احد مؤسسي شركه لينك دوت نت سنه
...اصحاب فكرة موقع اطلب الي اتكلمت عليها في البلوج ...
مفتكرش ان حد فيهم كان في يوم من الايام كان يتوقع انه يكون كدا ...
بس الي واثق منه ان فكرة اكيد كان غير فكرنا ... اكيد الناس دي احبططت في يوم من الايام و اكيد كان في طريقهم فشل ... و لكن كانو بيواجهوه بطريقه مش زي الناس التانيه و الا كان زمانهم زي الناس التانيه
...
‏قال Ahmed Essawy
@ عصفور المدينه
معلش انا كتبت الاسم غلط اسمه بشمهندس خالد بشارة مش خالد بشار
‏قال Ahmed Essawy
@ مبرمج حر

بمناسبه المقولات ...
برضو انا افتكرت واحده تانيه بتقول
ومن يتهيب صعود الجبال يعش أبد الدهر بين الحفر

كلامك صح يا بشمهندس احمد
احتياج فعلي ...
فعلا الاحتياج الفعلي يخلق الابداع و خصوصا اذا سانده مناخ ملائم...
‏قال Ahmed Essawy
@ مي عصام
و عليكم السلام و رحمه الله و بركاته..

نعم ... ممكن يكون العلم عايز صبر و تركيز كتير ... بس مفتكرش علطول ....ممكن في مرحلهمن المراحل بس ... الواحد من دول بيوصل لمرحله بيجد بعدها ان في الاستزاده من العلم لذه ...
يا رب اوعدنا...

==
ربنا يرزقك خير الرزق يا رب ... و تصرفيه في الي انت عايزاه ...
بس للاسف مفتكرش ان الرقم دا ممكن يخلص
:(
..
اني لو بتصرفي في اليوم الف دولار
لا بلاش الف ...نبحبحها شويه ...
لو بتصرفي في اليوم ثلاث الاف دولار
يعني كل يوم بتصرفي ثماني عشر الف جنيه
يبقي ادمك يا دوبك يادوبك مليون سنه علشان الفلوس تخلص
:D:D
....
بس يا ريت متنسيناش بحبه منهم...كام مليار كدا ...
:)
‏قال Ahmed Essawy
@ Anonymous
ما شاء الله
في ناس اهو ملاحظتها دقيقه ...دي انا لسه مغيرها عن قريب ... و علي فكرة .. هي الي اتمسحت بالغلط و انا بحط صورة جديده للبانر...
فقولت احط حاجه تانيه ...
==
بيني و بينك ... مش برضو مينفعش الواحد يقول في حاجات حلوه لازم ننساها علشان نرتاح ...و احطك الكلمه دي في وشي كل ما افتح البلوج ...
علشان كل واحد فينا يفتكر الحاجات الحلوه الي مفروض ينساها ...
:D

بس انا فعلا انا بعتز بالمقوله لاني صاحبها ...و فرحان شويه لاني في حد عجبته حاجه انا كاتبها ...بس زعلان انك فكرتني بالي مفروض انساه
:D

==
اما بالنسبه لسؤال حضرتك مين .... رغم اني مش بحب الاسلوب دا
انا مقدرش احدد بالظبط ...بس اكيد انت حد انا اعرفو .... و كويس كمان
للاسف دائرة الاحتمالات واسعه ....انا حبايبي كتير ... و الحمد لله ..
:)
‏قال Ahmed Essawy
@ sakayar
انا وضحت رايي في وجهه نظر عصفور المدينه بس برضو كلامك الي انت قايلو عن الجمعيه ....يخليني معرفش اقولك ايه بالظبط...
علي اعتبار ان كلام الي انت قولته دا من مصدر موثوق جدا ..و صح
انا مازلت مصر ان الامل في النجاح موجود ... لان الحياه بدونه حياه لا نكهه..
الشباب بتوع الجمعيه يأسو .. و دا رد فعل طبيعي ..بس مش مفروض ان كدا الي عليهم خلص...
مفروض يحاولو يتصرفوا بالسياسه ...بتقليل النشاط ...
معرفش الابعاد علشان اقول ايه المفروض ...
المهم الجهد المبذول ميأفش ...

انا معاك تمام ان الكلام دا مش موجود بره بالصورة الي موجوده هنا ..

نعم الحل يبدو كلام خيالي شويه ...بس دا المفروض نعمله ...
لانه احسن من مفيش...
‏قال Sabrysoft
والله احييك على الكلام ده..ده مش مجرد انشاء..ده فعلا كلمة نابعة من احساس جواك
انا حاسس بيك وفكر زيك تمام
وياريت كفايه نقول معاير عربيةومعاير اجنبية
اللى عاوز ينجح حينجح
واللى عاوز يبقى مشمارك وبس لأ يبقى احسن من بيل جيتس ..هيكون
ده مش تخرييف
"مش بالكلام نقدر نحقق كل اللى احنا بنحلم بيه ..لازم يوم نصدق مافيش حلم مستحيل"
انا لو معايا المبلغ ده
هجيب الافكار اللى بتتطبق فى كليات الحاسبات فى الغرب..واتبع بيها لكليات الحاسبات فى مصر..ليس فقط بل سأتحمل تكاليف ما يلزم لتطبيق تلك الافكار
او انى افتح انا كليه ملكى مجانا للشعب عموما ومن اى سن هيكون هناك اختبارات طبعا للألتحاق بها
وطبعا هتبقى معترف بيها عالميا لأن التراخيص كلها هتبقى عالمية وتحت مقايسس عالمية ..
من الاخر عاوزين مصر تصحى
‏قال simply me
كلام جميل اوى
بس ماتنساش يا احمد ان مارك اتربى وعاش فى بيئه غيرنا تماما

انا مش ببرر موقفنا الضعيف

بس توفر الامكانيات عامل مهم جدا فى القدره على الابداع

سيبك انت انا لو معايا مليار واحد بس كنت عمل عمايل
‏قال FTM
انا متفقة معاكم ان المجتمع لة دور كبير فى النجاح..بس أكيد برضة لازم حد يبدأ علشان يغير سلوك المجتمع , اية الطرق مش عارفة

مليار كتير اوى ...بصراحة الواحد لو معاة مش هيشتغل ..ممكن يقرأ بس للعلم لكن شغل عشان يعيش وكدة ما لوش داعى...
:D
‏قال Ahmed Essawy
@Sabrysoft
ربنا يرزقك خير الرزق يا رب ... و تصرفيه في الي انت عايزاه ...
كلمه اخير ...مصر مش حتصحي الا بينا ... انا و انت و الي حوالينا ... بس نستحي و نعمل الي علينا ...
:$

@ بندقه
حقول بشرط انك تقولي الاول ...لاني انا الي بدأت السؤال ...
:P

@FTM
اولا : اهلا بيكي في بلوجي المتواضع....و مبروك ليكي رجعتك للبلوج بتاعك ...عدم الكتابه فيه احسن ما تكتبي حاجات ملهاش لازمه ...علشان يفضل بلوجك ليه وزنه ... الي اتعودنا عليه
ندخل فيه المفيد
طبعاالمجتمع ليه دور
...بس قبل ما نطالب بحقنا نديه حقه الاول علشان يدينا ....
مصر مش حتصحي الا بينا ... انا و انت و الي حوالينا ... بس نستحي و نعمل الي علينا ...
:$
و الله انا فعلا بشوف نماذج من الي حوالينا لو الناس كلها زيهم ...حتبقي البلد غير البلد ...و غير كدا الواحد لما بيشوفهم كدا بيحاول يبقي زيهم ...
احنا محتاجين كل واحد يعمل الي عليه بضمير ... مش اكتر
و حاجه كمان ....مفيش قدوه ...
الحد الكويس دا ...مش موجود في حتت كتير علشان الناس تشوفو و تحاول تبقي زيه ..
دا غير ان الوحش موجود كتيييييير .
الموضوع كمان عايز قوه ايمان و ثقه بالنفس ..
الواحد لو اتكلم في الحوار دا مش حيخلص ...و عايز نقاش كتير ...
====
ربنا يرزقك خير الرزق يا رب ... و تصرفيه في الي انت عايزاه ...
و متنسيناش بكام مليون كدا ...
:)

المشاركات الشائعة من هذه المدونة

خطوات تصب في طريق النجاح

ما من فرد منا في هذه الفترة يبحث عن عمل الا وسيبدأ مع اي شركه في اي مجال بالمقابله الشخصيه التي هي أولي الخطوات لتقديم و لتقييم الفرد المرشح . المقابله الشخصيه اختبار ذات جوانت متعدده .... مثلها مثل اي شئ في هذه الدينا .... اختبار و كل اختبار له عدده خطوات تصب في طريق النجاح ... اردت اليوم ان الخص بعض هذه الخطوات من خلال ما قرأته من مواقع متعدده هنا لتعم الفائده علماً بأن هذه المواقع مشار اليها في نهايه المقال . المرحله الاولي - التحضير : هي تلك المرحله ما قبل المقابله نفسها . تسمي في بعض الاحيان بالواجب المنزلي . كل ما عليك في هذه المرحله ان تراجع معلوماتك فغالبا انت معرض لاختبار (تقني technical و ذكاءIQ و شخصي peronal test ) . حاول ان تجلب معلومات عن الشركه... عنوانها ... مجالها .... فروعها ... الاشخاص الذي سوف تقوم بمقابلتهم في المقابله الشخصيه (يمكنك ذلك من خلال موقع الشركه علي الانترنت او من خلال اصدقائك و من حولك ) هذه المعلومات سوف تدعمك وقت المقابله مع الشركه . جهز صورة شخصيه و السيرة الذاتيه فأحياناً كثيرة تحتاج الشركه لها . حرصك علي هذه الاشياء الصغير سيعطي فرصه للشركه لكي

أجمل ما قيل في الاخوة في الله

للامانه لست أنا صاحب هذه المقاله انما جاءتني كأيميل يتناقله الناس بدون صاحب :) قال تعالي :  (إنما المؤمنون إخوة) الحجرات ايه 10 . وقال صلي الله عليه وسلم (المسلم اخو المسلم لا يظلمه ولا يسلمه). وقال ايضا (لا يؤمن احدكم حتي يحب لأخيه ما يحب لنفسه) قال الامام احمد بن حنبل ""إن لنا أُناس لا نراهم إلا في كل عام مرة نحن أوثق بمودتهم ممن نراهم كل يوم"" قال عمر رضي الله عنه في مجلس المهاجرين و الانصار (( أرأيتم لو ترخصت في بعض الأمور ماذا كنتم فاعلين!! فكرر فلم يجيبوه )) فقال البشر بن معاذ: لو فعلت قومناك تقويم القدح ( السهم الذي يرمي به عن القوس) قال: عمر:أنتم إذن !أنتم إذن. ثمرات المحبة  قال تعالي في حديث قدسي:  (وجبت محبتي : للمتحابين فيَّ ، و المتجالسين فيَّ ، و المتزاورين فيَّ ، و المتباذلين فيَّ). قال رسول الله صلي الله عليه و سلم (الله في عون العبد ما كان العبد في عون أخيه). قال رسول الله صلي الله عليه و سلم يا أيها الناس ! اسمعوا ، واعقلوا ، واعلموا أن لله عز وجل عبادا ليسوا بأنبياء ولا شهداء ، يغبطهم النبيون والشهداء على منازلهم وقربهم

حل مشكله عدم الاضاءه او السطوع عند ترقية لينوفو لابتوب الي ويندوز 10

اتبع الخطوات بالاسف اذا واجهت مشكله في سطوع الشاشه بعد ترقية لابتوب لينوفو Z500 الي ويندوز 10 lenovo z500 touch brightness not working after windows 10 update 1:-   Win + R 2:-   Type in 'regedit' 3:-   Press F3 to bring out the find menu. 4:-   Type in 'FeatureTestControl' And Click On 'Find Next' 5:-   Once Found 'Right Click' on it and select 'Modify' 6:-   Replace the Original Value By'ffff' 7:-   Save It And Restart The System 8:-   Problem Solved