Thursday, 31 May 2007

واحد بيكلم نفسه:$


انا مش عارف ليه الكلام دا . بس زي ما تقولو كدا واحد بيكلم نفسه . :$
اليوم زي ما كلنا عارفين خلصنا امتحانات و مذاكرة مدي الحياه الا لو الواحد حاطط في دماغو ماجستير و كدا ؛انا بصراحه مش شايف انها مفيده في الوقت الحاضر لاني مش بحب سلك التدريس عموما .
خلاص عمري ما حصحي مدايق من حلم فيه MCQ و مش عارف اختار واحد و لا اتنين ولا ثلاثه ولا اشيلهم كلهم و احط الصح من عندي .
خلاص عمري ما حشد في شعري من الحاجات الغلط الكتير الي حصلت و مازالت بتحصل في التدريس .
انا مش عارف دي حاجه كويسه ولا لا ؟
انا مش عارف احدد حاجه .
انا مش مقتنع اني مش حقعد تاني علي البنش و اركز في المحاضرة ؛ سواء كنت حفهمها ولا لا .
اليوم كنت بدور علي ورق معين داخل ادراج مكتب رعايه الشباب . كنت بفتح الدرج و ادور علي الورق و مش متخيل ان دي اخر من افتح فيها الدرج الي بقالي ثلاث سنين بفتحو .الغرفه دي الي اعرف الي فيها اكتر ما اعرف الي في ادراج بيتي .
انا مش متخيل اني كدا خلصت السلك الدراسي تقريبا .
يعني اربعه ابتدائي و بعديهم اربعه متوسط و بعديهم اربعه ثانوي و بعديهم اربعه جامعه .
الواحد اخد علي مود معين . اعتقد اني اتسستمت عليه خلاص.
كل سنه اذاكر و و انجح و اطلع للي وراها بحمد لله .
انا مش متخيل ولا مقتنع اني في شهر تسعه الجاي مش حروح الكليه .
انا كل ما بنتقل من مرحله دراسيه للي وراها كنت بحس اني كبرت .
انا افتكر لما خلصت متوسط الي بتقولو عليها اعدادي يعني و دخلت اولي ثانوي كنت حاسس اني كبير قوي .كبير قوي و لما دخلت الجامعه انتابني نفس الشعور . احساس كان بيدي الواحد الثقه و الدفعه لنفسه اكثر .
شعور كنت مستنيه من زمان . اني اخلص جامعه و ابقي اكبر من أي وقت مضي علشان ابقي واحد قد المسئوليه و راجل و الكلام الكبير دا الي بيجي في دماغ اي واحد بيفكر بطريقه منطقيه ...
اما حاليا : فانا لا املك هذا الشعور . انا مش حاسس الشعور الي كان بيجيلي كل مرحله .بل علي النقيض احيانا اشعر اني لما دخلت رابعه بدأت اصغر من اكبر .
انا مقتنع تماما بأني عقلاني و اقدر اتحمل مسئوليه و لكن فين الاحساس الي كان بيجيلي دا ؟
فين الحاجه الي كنت مستنيها بقالي سنين ؟؟؟؟!!!
الحاجه الوحيده الي قادر احددها اني مستعجل علي الشغل. عايز اشتغل بسرعه لاني من زمان جدا و انا نفسي اشتغل بس مكنتش مؤهل (مش متخرج) . دي الحاجه الوحيده الي مقتنع بيها .
وسط حاجات كتير مش حاسس بيها .
انا فاقد الاحساس حالياً .
يا تري انا كاتب الكلام دا لاني تحت تأثر هول الموقف .
يا تري انا كبرت ولا صغير .
يا تري انا فرحان ولا زعلان .
يا تري دي حاجه كويسه ولا لا .
يا تري انا عاقل ولا اتجننت :D .
حد فاهم حاجه ؟ :$

Thursday, 24 May 2007

عندما ترى الخيال


بكيبورد :احمد عيسوي :) .

هل سالت نفسك يوما ماذا إذا رأيت شي تعتقد استحالة وجوده . تعتقد أن الكلام عنه درب من دروب الخيال العلمي لإضافه بعض من الإثارة و التشويق للموضوع ليس إلا .
لا أريد استفاضة في المقدمة لان الموضوع لا يحتاج لها .
كل ما أستطيع أن أقوله لكم الآن هو أنت تستطيع أن تطبع أي شئ يخطر علي بالك . فمثلا لو كنت في المكتب و لم تجد ملعقة لتقلب بها الشاي ؛ تستطيع بواسطة الطابعة الجديدة طباعه ملعقة بحجمها و شكلها الطبيعيين ثلاثية الأبعاد و تستخدمها في تقليب كوب الشاي بكل يسر هذا كما تري في الصورة كما تستطيع طباعه أشياء اكثر تعقيد من الملعقة كالأدوات الدقيقة و التروس علي سبيل المثال .


أما عن طريقه التعامل مع مثل هذه الطابعات فهي تستطيع قراءه ملفات البرنامج الشهير اوتوكات و امتدادات أخرى للصور ثلاثية الأبعاد.
و عن الشركات المنتجة لهذه التكنولوجيا فهي متعددة مثل شركة امريكان زد و ديسك توب فاكتوري و زد كوربوريشن و تقوم كل شركه بعرض العديد من الطابعات مختلفة في المواصفات متفقه في الهدف لتناسب احتياجات معظم العملاء .
يتوقع وجود مثل هذه الطابعات في الشركات الصغيرة و بين الهواة و المحترفين في التصميم و المهندسين و الطلاب و في المدارس ليمتلك كل منهم طابعته الخاصة بمواصفات خاصة . و يدعم هذه الثقة في انتشار هذه الاله العجيبة او الطابعة الجديدة هو سعرها الاقتصادي و حجمها المناسب .

المصادر الاجنبيه :
http://www.desktopfactory.com/
http://www.gizmag.com/go/2578/
http://www.zcorp.com/products/printersdetail.asp?ID=1



Tuesday, 15 May 2007

العقل المصري

من ارشيف مقالاتي بتاريخ فبراير 2007
سنه 2007 بتمثل ليا عصر الحاجات الغريبه .انا كنت اتوقع اي حاجه في اي حاجه . يعني لو قالولي ان الناس وصلو بلوتو مثلا حصدق . كل حاجه الواحد ميتخيلهاش بقت بتحصل . و من كترة المفاجأت الي الواحد شافها مكنتش اتوقع اني ممكن اتفاجئ بحاجه تاني .
و كنت بحاول اجيب تعريف للعقل المصري وسط هذه التكنولوجيا السريعه .
و لكن اسمعي مني الكلمتين دول و انا بعرف العقل المصري .
مرة كنت في سوبر ماركت في روكسي بجوار نادي هيليوبلس . مشيت من جنب ركن التسالي زي ما بيقولو يعني اقصد الراجل بتاع المقله . لقيته عارض لب سوبر :) .
دا فيها حاجه :) .
اه فيها . لاني لقيت حضرته عارض لب سوبر بالجبنه و لب سوبر تاني بالباريكو و لب سوبر عادي . و فول سوداني عادي و بملح و اسواني و بالجبنه و بالبابريكو و بالعسل و السمسم . D:D:
و عندو حاجات غريبه كتير . بس و الله طلعت حلوه .
اتفاجئت و قولت هو دا العقل المصري .
مرة تانيه كانت قبلها بشهر ولا حاجه . واحد صاحبي قالي في عصير لب بس ايه طعمو جامد جدا و قعد يقول فيه ابيات شعر و كلام كتير خلاني قولت لازم اجربو علشان اثبت لنفسي انو اتجنن و مفيش حاجه اسمها كده .
روحت معاه للمحل بتاع العصير و لقيته بيقول اتنين عصير لب كبير .انا سمعت كده و روحت مغمض عيني و استسلمت للقدر و قولت الراجل حيضربنا دلوقت و يقول علينا محششين ولا حاجه كده . و لكن الي حصل اني لقيت الراجل بتاع العصير بيقولي عنييا الاتنين و بيقول بصوت عالي اتنين عصير لب كبير .بيقولها بسهوله كده كأنه بيقول اتنين عصير قصب :) .
ساعتها قولت يبقي الراجل كمان مجنون يظهر الناس كلها اتجننت في المنطقه دي .و لكن رغم كدا اخذتني ابتسامه رهيبه و عريضه و معرفتش امنع هذه الابتسامه نهائي .لغايه ما الراجل ادانا الكوبيتين و فعلا طلعو بطعم اللب . و بجد طعمهم كان ظريف . و لما رجعت البيت عملتو لتيته و اختها و كانو بيبصولي بنفس النظرات الغريبه و افتكروني مجنون و في الاخر قالو حيعملوه في بيوتهم .
اتفاجئت و قولت هو دا العقل المصري .
بعدها بكام يوم سمعت ان في عصير سوداني :) :) :) :) .برضو كان حلو .
اتفاجئت و قولت هو دا العقل المصري .
اما صحيح برضو سمعت ان في عصير جرجير D:D: بس دا لايمكن اجربو و مقولتش :)
هو دا العقل المصري .


Friday, 11 May 2007

We are Spider men of FCI

We are Spider men of FCI

No way to be like us , Don't try :D

click the photo to see it in a large scale

Tuesday, 8 May 2007

Hossam's Tag

قام حسام صادق بتوجيه بعض من الاسئله التي اصف بعضها بالشائكه .
كالعاده مش بحب الفرانكو و مش حعرف اعبر عن الكلام دا بالانجليزي علشان كدا حكتبه بالعربي رغم ان الاسئله بالانجليزي .
List five things you learnt in FCI -not Technical :D-??
#اتعلمت ان الانسان مش بمظهره و لا تسريحه شعره رغم اهميتهم و لكن الانسان بحجم القيم الي بيحملها .
#اتعلمت ان مش كل الي بيدخل الجامعه لازم حيطلع متعلم حاجه .
#اتعلمت ان مش دايما معني الفرح انك تكون مبسوط . ممكن تفرح علشان حوليك حد فرحان .
#اتعلمت قيمه الاخوه و انها بجد كنز لا يقدر بثمن .
#اتعلمت ان الواحد لو مشي ورا كلام الناس حتي و لو اغلبيه مش حيعمل حاجه .لازم تعمل اليي الواحد مقتنع بيه .


Five things you will miss in FCI?
#الوجوه الي الفها و اتعود عليها . في ناس لغايه النهارده معرفهاش بس حاسس ان بيني و بينهم الفه .
#استاذ عماد انا بعتبرو اخي الاكبر رغم اني مليش اخوات اكبر مني .بس بجد الواحد اخد منه خبرات و حاجات كتير .
#الخروجات الي كانت بتيجي علي غفله .
#الدفعات الي اصغر مني . محمد جمال . احمد محمدين . احمد بهي .احمد سعيد . عمرو حسنين . محسن رغم اني متعاملتش معاه كتير ..احمد مجدي .احمد اسامه .محمد عدلي .سامح . سيد التخين و سيد الطويل و احمد اسماعيل و ناس كتير .مش متخيل اني مش حشوفهم زي الاول .

Best day in FCI Helwan?
اليوم الي روحنا فيه كوستا كافيه و لعبنا عروستي
:D:D


Worst day?
بلا شك يوم وفاه والده نبيل او اخت كريم يرحمهما الله .
الاتين اسؤ من بعض بالنسبه ليا


Best week?
الاسبوع الاخير من مشروع كليتنا اجمل.لان ثمرة الشغل الي اشتغله الناس طول الصيف طلع في الاسبوع دا .

Best doctor, course, book, project?
دكتور احمد الجارحي و دكتوره امل .
Turbo c / the complete reference
DirectX , battle of tanks .

Worst doctor, course, book, project?
للاسف هو مش واحد
الذكاء الصناعي و image
كتاب الذكاء الصناعي
جافا

Best instructor?
مستر عمرو غنيم و مس ايه و مس مي و مس هاله و مس مروه صلاح .
دي ناس لسه عندها ضمير .


Best situation?
لما عرف نتيجه الترم الي فات .
اول مرة اجيب امتياز


Bad situation?
لما مستر رائف زعقلي و لغي السكشن .

Did you meet your sweet-half in FCI?
ربما :$ , ادعولي بالخير .

Did you regret for knowing someone in FCI?
الحمد لله علي نعمه النسيان .. انا مش شايل من حد.. ...

What was your favorite place in the faculty?
مكتب رعايه الشباب

What is the size of our digital photos on your hard disk?
تقريبا 8.5 جيجا

What will you do in the last day?
مش عارف ..صراحه بس خايف من دموعي تخوني .

What would you like to say to dof3tnaa?
اول اني احبكم في الله .
ايامكم محفورة في ذاكرتي . مش حنساكم حتي لو نسيتوني.
بشكر كل واحد وقف معانا او ساعدني بأي حاجه حتي لو كلمه حلوه في وقت كنت محتاج فيه الكلمه دي .
الي اللقاء يا دفعه لم و لن تتكرر
الي اللقاء
انا املي في الله كبير فذلك امر علي الله يسير فإن لم يكن في الدنيا فسويا في جنات الخلد و النعيم بإذن الله .

What would you like to say to other grades -aldof3at altanya- ??
شدو حيكلم و مضيعوش وقتكم في حاجات ملهاش لازمه . مش حتحس بقيمته الا لما تتخرج .
اهم حاجه معاكو دلوقت هي الوقت .

What would you like to do if you found the today's date is 2003-ya3ny lo reg3t lesnah ola bel3fyah ?
كنت حشوف انا مجتليش الرغبه الاولي ليه في جدول الرغبات رغم ان مجموعي مغطيها .
:D

Thursday, 3 May 2007

من معاني القوه


موقف رائع شايف فيه معاني جميله جدا تحملها النفوس السويه و الطيبه حبيت اني انقلها هنا علشان تشوفوها معايا :) .
الاشخاص : اتنين ميعرفوش بعض قوي . كل الي بينهم شغل و مصالح مشتركه .
الزمان : من ايام قليله .
الحكايه : اتنان يتفاني كل منهم في عمله ؛ يرتبط الاثنان برباط من التعاون و الاحترام المتبادل . كل منه مثال و نموذج في موضعه في العمل .
استمر الحال علي ما هو عليه حتي جاء يوم مشؤم .
يوم اهان في شخص زميله بكلمات جارحه و مهينه . و لكن لم ينطق المهان بعدها بكلمه واحده . و قد اسكت الموقف جميع جوارحه . وكناتج منطقي كدر هذا الموقف صفو و هدوء الشخص المهان لعلو نفسه لايام قليله .
الي ان مرت ثلاث ايام لم يخاطب فيها الشخص الاول الشخص المهان بشئ .
حتي جاء الليل علي الشخص المهان و نظر الي السماء و هو يسمع شئ غريب يهاتفه في اذنه بقول الرسول " لا يحل لمؤمن أن يهجر أخاه فوق ثلاث ، يلتقيان فيعرض هذا ، و يعرض هذا ، و خيرهما الذى يبدأ بالسلام " .
فإذا بصوت الشيطان يهمس في اذنه كرامتك . انت معملتش حاجه و كمان تعتذر . انت اهبل .و كلام من دا كتير .
فقرر الاخ المهان الرد علي الشيطان بفعل لا بقول .
فقد ذهب لجهاز الكمبيوتر و ارسل هذه الكلمات للشخص الاخر .
السلام عليكم و رحمه الله
انا كرامتي عزيزة عليا جدا
و لكن حبي لله اكبر من اعتزازي بكرامتي
لذلك بعد مرور ثلاثه ايام
وجب عليا البدأ بالسلام .

و ما هي الا دقائق حتي رد عليه اخيه برساله يعتذر فيها عن ما حدث و هو يقص عليه مسببات ما حدث .

انتهي الموقف عند هذا الحد عندما شعر الشخص المظلوم براحه نفسيه و رد اعتبار لكرمته التي قد اهانت و اكيد شعر الشخص الاخر ايضا براحه نفسيه قال الله سبحانه وتعالى في كتابه الكريم: إِنَّمَا الْمُؤْمِنُونَ إِخْوَةٌ فمهما حدث بيننا فنحن اخوه يشد بعضنا بعضاً .

التعليق اني لا اري في هذا الموقف الا الكبرياء و القوه للمظلوم خمس مرت .
الاولي : انه لم يرد الاهانه بإهانه لذلك فاخلاقه اسمى .
ثانيا : انه من بدأ بالسلام و دا دليل علي قوي شخصيته و احترامه لدينه .
ثالثا : رد لهمزات الشيطان و الانتصار عليه عندما وسوس له .
رابعا : شعورة بالراحه النفسيه بعد ان اعتذر المخطئ له .
خامسا : شعورة بالسعاده بعد ان جمع بين الاربع صفات السابقه .

صدق الرسول عندما قال "و خيرهما الذى يبدأ بالسلام " .
كلمه كلنا عارفينها بس ممكن منكونش فهمين معناها . انا شخصيا اول مرة احس بالمعاني دي للحديث .
صدقت يا رسول الله ...صدقت يا رسول الله . صلي لله عليه و سلم.