رغم دا..لسه الدنيا بخير

ساعات الواحد بيشوف مواقف فيه ناس مستفزه او اي حدث معين بيفضل موجود في ذاكرته لبعض الساعات و ربما ايام ...

احيانا بتأثر في نفسيه الواحد و ممكن كمان تخليه زعلان غصب عنه :( .

لكن في وسط الغضب دا يلاقي حاجه تنسيه الدنيا بما فيها و تعرفه فعلا ان لسه في ناس بخير :) .

شوف معايا الموقفين دول لسه حاصلنلي اليوم .

مرة و انا رايح بالميكروباص حلوان (الجامعه يعني ) . و مرة و انا جاي برضو من مكروباص برضو بس مش حلوان :) .

الموقف الاول :

و انا راكب المكروباص الصبح و لسه بنقول يا هادي .... و الناس بتلم الاجرة للسائق . كان معظم الناس معهاش فكه :) . و في ازمه فلوس يعني . و بعد ما حاولو يحلوها كانو عايزين خسمه جنيه و خمسه تانيه كل واحدة لازم تتفك علشان في اربعه عايزين فلوس منها :) .

المهم السواق قال حد معاه فكة خمسه .يا جدعان حد معاه فكه خمسه جنيه .

محدش رد :) .

انا بصيت في محفظتي و لقيت فكه خمسه واحده . روحت مديها للسواق و هو اداها لاتنين من الي ليهم باقي .

دلوقت باقي خمسه جنيه مفروض تتفك و محدش عايز يرد علي الراجل السواق يعني .

المهم هو كل ما يشوف مكروباص بجوارة في الطريق يسأله عن فكه للخمسه الي باقيه و كلهم بيقولو لا معهومش .

فراجل من الي مفروض ليه باقي قال يا ريس ادخل البنزينه الي جايه علشان انا قربت انزل و اول ما السواق هدئ علشان يدخل في البنزينه لقيت الي جنبي شكله محترم و لابس بدله سودا و حركات يعني :) بيقول : متدخلش يا رايس . انا معايا فكة . امشي علطول .

علما بأن انا و الراجل ابو بدله دا كنا قاعدين جنب السواق .يعني واخد بالو من كل حاجه .

قولت في سري هو حب النفس و الانانيه للدرجه دي . الفلوس طلعت لما لاقي انو ممكن يتأخر عن المعاد او حيتأخر و مش حاطط في دماغو المشكله الي عامله ازمه في المكروباص .

زعلت شويه و قولت عادي ياما الواحد شاف و سمع اكتر من كده .

شوف بقي الموقف التاني و شوف الفرق .

و الله بالصدفه ان الموقفين في الباص و في يوم واحد .

الموقف التاني

و انا راجع اليوم من الكليه نزلت نادي السكه و ركبت في سياره صديقي جزاه الله خير الذي تطوع بإصالي الي الف مسكن و من هناك اركب ميكروباص الي عين شمس :) .

الحكايه تبدأ في المكروباص دا :) . الراجل بيقول اجره الي ورا .يقصد حضرته سيادتي يعني . فتحت المحفظه اطلع 35 قرش ثمن الاجرة .

ملقتش في المحفظه غير ورقه ب100 جنيه مفيش اي حاجه تانيه ولا ربع جنيه حتي .

انا قولت لنفسي . ادي السواق 100جنيه و اقوله خذ 35 قرش:) . كده يبقي السواق حيهزأني و يقولي كلام ملوش لازمه:(:( . اصلك متعرفش سواقين عين شمس .

معرفتش اتصرف ازاي . روحت متصل علي واحد صاحبي اشوف رأيو ايه في الموضوع دا ؟؟؟؟؟

يمكن يجيلي بالحل السحري:$ .

لكن لقيته بيضحك عليا و صوته من علوه ممكن يكون حيسمع الميكروباص . كل الي قالهولي لما تحل المشكله ابقي طمني عملت ايه !

لقيت الي جنبي بصفته شايفني و انا بتكلم في الموبيل و بفتش في جيوبي علي اي فلوس رغم انو كان مش لابس بدله ولا حاجه . دا عامل بسيط و باين علي هدومه انو شغال في المباني و السقالات و كده .

قالي خلاص . انا حدفعلك .بصراحه انا مكنتش عارف ارد اقوله ايه !!!!

بس هو اصر علي كلامه .

كل الي كان مني اني شكرته جداً و وضحت له الموقف ووعدته اني حتبرع بشئ باسمه .

بجد ساعتها بس قولت لنفسي لسه الدنيا بخير:) :) .الحمد لله .

الدروس الي انا استفدها :

اولا : الناس مش بمناصبها ولا بملابسها . كل واحد مهما لبس عمره ما حيعرف يخبي معدنه . كل واحد بيبان في وقت اللزوم .

تانيا : (.. لِلَّذِينَ أَحْسَنُوا فِي هَذِهِ الدُّنْيَا حَسَنَةٌ ..) (النحل:30)( والله في عون العبد ما دام العبد في عون أخيه ) ( من كان في حاجة أخيه كان الله في حاجته ) يعني من كان ساعيا في قضاء حاجة أخيه فان الله سيقضى حاجته .

و دا الي حصل بالظبط . انا فرجت كربه في ميكروباص الصبح و ربنا فرج عني كربه مكروباص بالليل :) .

لما طلعت فكه للناس الصبح ربنا طلع واحدا دفع عني اجرة الميكروباص و فرج عني كربه .تخيل لو كان جنبي واحد زي الي ابو بدله في مكروباص الصبح كنت حعمل ايه .

ثالثا : لا ينبغي للمسلم أن يحتقر معروفا مهما كان قليلا لان النبي – صلى الله عليه وسلم – قال (لا تحقرن من المعروف شيئا ولو أن تلقى أخاك بوجه طلقٍ ) رواه مسلم . الوجه الطلق السرور على أخيك و دي صدقه ان شاء الله في ميزان حسناتك :) .

بجد انا فرحان النهارده لاني ربنا لم يخذلني :) .