Monday, 19 March 2007

دكاترة اخر زمن !!!!!!!


مفيش تقدم ليه !
سؤال ياما سألتو لنفسي و سالتو لمن حولي ؟ و كل مرة اطلع بأسباب جديده .
سؤال سألتو لنفسي بعدما وجدت نفسي في ادني الارض و غيرنا يعلو و يرتفع عنا مئات الاقدام .
ناس طلعو القمر و احنا مش عارفين نروح اسكندريه بطيارة احنا الي عاملينها .

الاسئله دي كوم . لوحدها و الرد الي سمعتو بآذاني من الدكتور دا كوم لوحده .
بس عايز اتفق معاك علي حاجه في الاول .
انا اقر و اعترف ان انا و الناس الطبيعيه الي زي . مش بتفهم من كل الدكاترة .
و دا بسبب حاجه من حاجات كتير .
اما ان احنا مش مهتمين بمادته . لتقصير مننا بلا شك .
اما هو مش عارف يوصل المعلومه بس بيحاول و باين انو بيبزل جهد .
اما هو عارف انه مش قوي و مش متمكن من الماده . فبيراعي النقطه دي (رحم الله امرئ عرف قدر نفسه ).
اما هو متمكن و الكل عارف كدا كويس و مهتمين بيه .
اما ....حاجه من حاجات كتير كل الناس الطبيعيه متفقين عليها .

بس في الاخر مهما كانت شخصيه الدكتور او المعيد . فلا شك اننا نكن له كل التقدير و الاحترام .

= = = = = = = = = = = = = = = = = = = = = = = = = = = = =
لما دكتور يدخل عليك و يقولك .
انا مش مُطالب اني اشرحلك حاجه . انا اكتب العنوان و خلاص .
انت الي مفروض تقرأ و تدور !!!
انا صعقت لما سمعت الكلام دا . ما كان ممكن اجيب أي حد يكتب الكلمتين بتوع العنوان و خلاص علي السبورة . ايه الفن ان دكتور يكتبهم ولا هو ليه خط معين غير خط الدكتور .
ولا حاجه اظرف ما كان يبعت ميل بالمنهج وخلاص . علي الاقل يوفر علينا و عليه .
هل معني كدا ان الدكاترة الي بتشرح دي معندهاش دم و مش عارفه اصول التدريس .
الله اعلم .

دكتور تاني : بيقول انا طلاب ماجستير دول مش بيشوفو الا قفايا .
انت فاكرني حشرحلهم حاجه . هما لازم يدورو و يبحثو.
برضو لا تعليق و الله اعلم .

و الله انا بقيت مش فاهم حاجه و لا عارف ايه الصح من الغلط . ولا الاتنين صح ولا الاتنين غلط .

كل الي اعرفو ان مستوي الكليه بيقل كل ترم عن الترم الي قبله . دي الحاجه الوحيده الي انا واثق منها .
انا زمان كنت بقول العيب فينا احنا الطلاب بس يظهر ان انا كنت غلطان . او احنا الاتنين غلطانين .
برضو الله اعلم .


اسئله اتركها لاي اكاديمي لو عنو اجابه .

# الدراسات العليا : في اساتذة جامعيين بيطالبو : بتقليص عدد الدارسين و الغاء مجانيه التعليم في الدراسات العليا و اخرون يطالبون بإنشاء كليه خاصه بالدراسات العليا :
و اكيد انتم تعلمون ان عدد المتقدمين كل عام يتجاوز الالاف !!!
لو كانت هذه الابحاث حقيقيه و ذات معني و تعب فيها الدكاترة لكانت كفيله لحل مشاكلنا من اصغرها الي اكبرها !!!! هل عندك رد ؟؟؟؟؟؟؟؟؟؟؟؟

كيف يشكو من حال الجامعه الاساتذه و العاملون بها و هم الاولي بإصلاحها؟؟؟؟؟؟؟؟؟؟؟؟

ما وضع الابحاث المنتجه كل عام امام العالم و قدر الاستفاده منها ام انها تذهب هباء ؟؟؟؟؟؟؟؟؟اين المجهود المبذول من مسئولي الرساله نحوها ؟؟؟؟؟؟؟؟؟؟؟؟؟؟؟

ليه بتحتقرو الطلاب لما بعضكم بيدخل المحاضرة ؟؟؟؟؟؟ الم تكونو في يوم من الايام علي نفس المقعد مثلهم ؟؟؟؟؟؟؟؟

بس ارجع و اقول :
ع اسم مصر التاريخ يقدر يقول ما شاء انا مصر عندى احب واجمل الاشياء بحبها وهى مالكة الارض شرق وغرب وبحبها وهى مرمية جريحة حرب بحبها بشدة وبخوف وع استحياء واكرها والعن ابوها بعشق زى الداء .....

12 comments:

Mohamed Gamal El-Den said...

ازيك يا مستر عيسوي؟
انا عندي تعليق بسيط .. لو انت سألت اي واحد دلوقتي في الكليه او في مصر عموما .. نفسك في ايه بعد ما تتخرج ؟ تقريبا هتكون الاجابه واحده
عاوز اسافر علشان ابقي غني و معايا فلوس .. من هنا ممكن تقدر تبص للموضوع بتاعك
الكويسين علطول بره مصر و اللي مش نافعين بره هما اللي هنا ..
مع ان لو الناس كلها فكرت انها ازاي تقدر ترد لبلد دي جزء من جمايلها علينا مكنش حالنا بقي كده ... انا طولت :D
معلش سلام

أحمد عماد said...

بصراحة يا عيسوي موضوع البحث العلمي في مصر موضوع شائك جدا
لكنه متعلق كله بسبب واحد انتا عايز ايه من الي بتعمله في حياتك
صدقني لا تلقي باللوم على الدكاترة ولا الي بيحطوا نظام التعليم
اللوم كله على الطلبة
لكن مش طلبة المرحلة دي بس
لا طلبة المرحلة دي وكمان
الدكاترة نفسهم لما كانوا طلبة
تفكيره في ايه
عايز يطلع دكتور ليه
أنا واثق إن أكثر من 80% من الكلية عندنا لو سألته انتا بتتعلم ليه هيقولك حاجة من الاتنين
يا إما علشان اشتغل واتجوز ولأن كل الناس لازم تتعلم
لإما هيرصلك كلام بتاع التليفزيون الي هو مش عارف معناه
وأذكر موقف الترم الأول لما د.حسام ادانا 11 درجة زيادة ودا أدى إلى أن محصلش تكاقؤ فرص لتساوي البعض زي محمد نبيل ومحسن مع الي جايبين أقل منهم وطالبنا ساعتها ان الدرجات تزيد على المادة كلها علشان يفضل فيه نسبة وتناسب
د. حسام لأنه عارف الطلبة بتفكر ازاي قال ايه
قال يا تاخدوهم على الميد تيرم لاما بلاش
شفت كام واحد قال لا خلاص على الميد تيرم
مع إن انعدام التفاوت دا هيضرك قبل ما يضر غيرك
احنا محتاجين نفكر صح في حياتنا
انا ليه بروح الكلية
ليه مابروحش
ليه بذاكر وليه مابذاكرش
في ناس كتير لعلمك بقوا غاويين يتغنوا بحب الوطن اليومين دول كتير لكن ما تشوفش فعل
يقولك مصر .. ومش مصر وأمي وجدتي وخالتي وكل حاجة وتيجي تبص في أفعاله تعرف إن كلامه دا استهلاك للمنظرة فقط ولأنه مش لاقي أي أهمية يصنعها لنفسه فبيستمد أهميته من حب الوطن واتذكر قصة الشيخ محمد حسين يعقوب قالها :
قال كان في واحد ماشي وشاف واحدة عجبه شكلها
فتبعها لحد ما خدت بالها منه فقالتله ماذا تريد ؟
فقال لها : سلبني حبك
فقالت له : ماذا لو رأيت أختي وأشارت لخلفه
فالتفت ينظر
فقالت له : أيها الكذاب لو صدقت ما التفت
لو فعلا بتحب مصر ماكنتش تلتفت عنها
لو بتحب دينك ما تلتفتش تشتغل لحاجة تانية
وطبعا حب البلد جزأ من حب الدين ومظبوط بضوابط الدين وإلا هيصبح عصبية مذمومة
طبعا يا عيسوي ما أقصدكش انتا بالكلام دا
أنا بالذات واثق إنك لما بتقول حاجة بتقولها من قلبك
دا إحنا عشرة مشاريع كتير
معلش طولت عليك لكن كلمتين كان نفسي اقولهم من ساعة ماحضرت محاضرة النهاردة
وطبعا أنا كمان مقصر واسأل الله أنه يقلنا من عثرتنا جميعا
وأخيرا في مبدأ مهم لو مشينا عليه الدنيا هتتصلح :
قل إن صلاتي ونسكي ومحياي ومماتي لله رب العالمين

Ahmed Essawy said...

@ Mohamed Gamal El-Den
اهلا اهلا يا مستر جمال
:)
بلا شك ان في ناس كتير بتسافر برة علشان هما كويسين .
بس لازم تاخد بالك ان الكلام دا مش علي كل الكويسين.
بدليل ان عندنا معيدين في الكليه ما شاء الله . عشرة علي عشرة .
من حيت التعليم .و الدماغ النظيفه.
غير ان في ناس كويسه في اماكن تانيه . محدش سافر منهم بره لانهم رافضين مبدأ الخروج برة مصر .
مش علشان مش لاقين فرصه .
===============
اقصد بالكلام دا .دا ممكن يكون عامل من عوامل كتيرة .بس مش السبب الرئيسي .

Ahmed Essawy said...

الي احمد عماد :
انا مش معاك في ان الطلاب هما السبب الرئيسي .
نهائي .
زي ما رديت مع محمد جمال ممكن يكونو سبب فرعي مش اساسي .
ليه متفسرش حال الطلاب دا كنتيجه لحاله احباط بشعه .



ايه الي في الجامعه او الكليه بيشجعك علي المثابرة و الجد الرهيب في الدراسه و الحياه الاكاديميه .
حتي لو عندك هدف .
هل الحياه الاكاديميه وضحت الهدف من الدراسه .
انا مصر ان السبب الاساسي دا نتيجه فشل ذريع متعدد العوامل .
احد فروعها الطلبه
و لكن علي راس هذه العوامل هم من قبلو امانه رعايه الحياه الاكاديميه
و فشلو
ايوه و فشلوووووو
و بيدعو النجاح
الذي لا يراه احد غيرهم
:(

============
حاجه اخيرة :
لو كل واحد عمل الي عليه .
دكتور
معيد
طالب
و كامل الطقم الاكاديمي
لو كل واحد عمل الي يرضي الله
كان زماني كتبت مقاله
احسن من دي بكتييير .
لازم الكل يعترف بالتقصير و انا اولكم .

Ahmed Mubarak said...

على فكرة كلامك صح يا عيسوي الكل المفروض يغمل الي عليه..مينفعش نحمل شخص واحد المشكلة لوحدة ..الطالب مثلا..
ونفتكر الول
إن الله يحب اذا عمل احدكم عملا أن يتقنه

مش خص معين الكل

أحمد عماد said...

راجع كلامي تاني يت عيسوي هتفهمني صح
أنا الي اقصده ان كله مشؤل بما فيهم الدكاترة
لكن أقصد إن غلطته مش من دلوقتي
غلطته لما كان طالب زينا
وقدامه سكتين يتعلم كويس ويبقاله هدف ويعلم الناس
او يجمع درجات من اي طريق علشان يبقى معيد ودكتور واسم وسمعة ومستقبل
فهمت قصدي
انا ما اقصدش الطلبلا بصفة عامة لكن اقصد ان هنا بيبدأ فشل المنظومة
التفكير عند النقطة الي هي فيصل بين حياتك العملية وحياتك الدراسية

Ahmed Essawy said...

يمكن يا عماد بس اصل انت كاتب كلام كتير و مش متنسق علشان كدا ممكن اكون فهمتك غلط .
عموما نحن هنا علشان نتناقش .
;)

Rehab Mostafa said...

السلام عليكم
أنا بس عايزه أقول حاجه بجد تعباني جداااااا .... لما واحد اسمه دكتور في كليه زي كليتنا وينطق الماده اللي هو بيدرسها أصلاً غلط Imej مش Image
ووالله بينطق باقي الكلام غلط

sumaaaation بدل summation
ومش لازم أكمل .. ويتهمنا اننا احنا اللي عندنا مشكله ف اللغه ..ماعلينا :@:@:@
وطبعاً باقى الدكاتره بدون ذكر اسماء اللي أصلاً أنا بجد بجد نفسي أعرف متخرجين منيين!!!
ولما نحضر المحاضره على أمل اننا نفهم ويحصل حاجه من تلاته إما ان دمنا يتحرق :@:@:@:@ أو اننا مانفهمش اييي حاجه ويبقي ضيعنا الوقت ع الفاضي أو الاحتمال الضعيف بقى اننا نحقق أملناونفهم الحمد لله!!!!
ولما المعيد يكون مجبر على تدريس ماده مش حاببها؛طبيعي مش هيقدر يفدنا الا باللي قادر عليه!!!
ولما ماده علميه تتحول لماده تترص في دماغنا ونصبها على ورقه امتحان مالهاش لازمه تبقى ايه فايدتها!!
وكل ده والعيب فينا ازاي؟؟؟؟؟؟!!!!!
بجد نظام تعليم فاااااااااااااااشل
بس احتمال كبيييير حوالي 10% كده ان رغم كل الظروف دي الواحد يبقى سعيييد ويتغلب عليها ويحاول يتغلب عليها
بس العيب مش فينا إلا لو بقينا زي الامثال دي

أحمد عماد said...

أعتذر يا عيسوي عن عدم التنسيق وطبعا إحنا هنا علشان نتناقش وأحيك فعلا على طرح موضوع بالأهمية دي
وإجمالا لكلامي علشان نخرج منه بشئ مفيد
إن المفروض دلوقتي نبص لنفسنا إحنا وما نتعقدش .. نركز أكتر في دورنا إحنا وما نكنش امتدادا لسلسلة من ردود الأفعال
يعني ما نطلعش طلبة معقدين وعايزين نطلع عقدنا على الي بعدنا
إذا كان بقية عناصر المنظومة ما بيقوموش بدورهم يبقى على الأقل نقوم إحنا بدورنا علشان لما يتغير دورنا جوا المنظومة ما يجيش الطلبة الي بعد كده ويتهمونا بنفس الاتهام
ربنا يوفق الجميع لما فيه الخير يارب ولصالح المسلمين

Ramy Mahrous said...

انا هذا الرجل و مش عيب يا جمال اني هطلع اشتغل برا علشان ابقى غني الفلوش مش عيب
انا في بلدي مليش لزمه برا ليا دا انا لو كويس يعني

Ramy Mahrous said...

السبيبين كويسين
كتير جدا يا احمد بيحبوا مصر و بيشتغلوا علشانها
1- لما كنت لسه عضو عادي في دوت نت كوميونتي كنت بجاوب على الناس وفالاخر بكتب مصر كنت لسه الناس متعرفنيش كنت اشوف الناس بتكلمني على الياهو وتقولي هو انت اكيد من مصر هي مصر في تكنولوجيا كنت برد عليهم ساعد انك تعلي بلدك كتييييييييييير جدا عاوزين يخلوا مصر كويسه

Ramy Mahrous said...

صح يا معلم عيسوي
المشكله انها مشكله من كل الناس لو كل واحد اتق ربنا فالحاجه الي بيعملها البلد ده هتبقى احسن بلد