Tuesday, 17 April 2007

تخلف يا مصر

كالعاده لما بيكون عندي شعور غريب سواء كان فرح او حزن او مدايق او حاجه كدا باجي هما .
والمرادي انا هنا لاني مستغرب و في قمه الذهول .بس انا عودت نفسي اني لو حعستغرب علي كل حاجه غريبه يبقي حقضيها استغراب طول حياتي .

ندخل في المفيد . جامعه عين شمس الي هي المفروض من اعرق الجامعات المصريه و اكثرها شهره خارج مصر .
مش عارف الكلام دا بقي دقه قديمه ولا ايه!!!! لان دلوقتي الجامعات مفروض تسمي ملاهي .
فمثلا الي كانت اسمها جامعه عين شمس زمان يبقي اسمها دلوقت ملهي عين شمس .
كل يوم و انا معدي عليها الصبح في طريقي لجامعه لحلوان . بشوف من الشباب و البنات اشكال و الوان .
الي لابس جاكت علشان الدنيا برد و بنطلونه واقع منه .يظهر و الله اعلم انو لما بيسقط البنطلون مش بيحس بالبرد .
و بنات لابسه الي بيسموه البوت و علي راي اخويا الي عنده خمس سنين جزمه الجزارين :) علي حاجه استرتش علي حجاب و نسيت كمان الكاب الي علي الحجاب و النظارة السودا الكبيرة و طبعا مش شايله لا كراسه ولا قلم و هلم جر.
لما بشوف الانواع دي من الشباب . و علي اعتبار ان دي الشياكه و الاناقه . مبتبقاش لايقه عليه انو رايح مكان علم .
من الاخر كنت بنتقد شويه الشباب دول .
لكن اسمع الكلام دا للاخر .
لما يكون اليوم في كليه الالسن جامعه عين شمس 6 رقاصين رجاله و زيهم ستات و طبعا معروف الرقاصه حتعمل ايه ؟ متقنعني انها حتدي محاضرة في الرقص مثلا .
جيباهم الكليه علشان حاجه عندهم اسمها يوم الشعوب .
يبقي مين الي فاتح الملهي .
الجامعه ولا الطلبه ؟

7 comments:

أبوعامرالديب said...

لاحول ولاقوة إلا بالله

الحمد لله ان احنا في جامعة حلوان مرمين في الصحراء نعمة كبيرة واحنا مش حاسيين

وعمار يا ألسن عين شمس عايزيين خريجين علي واحدة ونص واللي يعيش ياما يشوف

Wafaa said...

بجد أنت جيت علي الجرح,جرح كتييييييييير من الناس اللي فكرت في الموضوع ده وتعبت خلاص ومش لاقت حل.

مناظر كتيير الواحد غصب عنه بيشوفها في الجامعه اللي بجد بتؤذي نظره.
بس هل الشباب والبنات هما بس اللي عليهم المسؤليه,فين أمهاتهم وأبائهم"كلكم راع وكلكم مسؤل"
فين الجامعه اللي بدل ما تحاول تحد من الموضوع تتيحلهم الفرصه دي وكمان تيجبلهم لحد عندهم راقصات ما شاء الله طب منتظره ايه من الشباب!!!!!!!! وكمان يسموا اليوم ده يوم الشعوب طب ازاي بأعتبار ان ده شرف لينا مثلا!!!!ده يوم العار الأنحراف أي حاجه كده بس مش الشعوب
طيب ساعات بقول الواحد علي قد ما يقدر ينصح الشباب والبنات دي يعني من رأي منكم منكر فليغيره ....
طب تعمل ايه لو جيت تنصح حد وتلاقي الرد عليك في منتهي عدم الحياء لا وايه تتهم بإنك متخلف ومش عارف الموضه!!!! طب بلاش دي
لما تلاقي مثلا أم ما شاء الله محجبه أو مختمره ماشيه ومعها بنتها ومش عايزه أقولك هي عامله ايه والأم مفتخره ان بنتها كده أموره والشباب بتعجب بيها هتعمل ايه ولا تقول ايه!!!!!

وفي الأخر تلاقي كل واحد يقولك ده زمان ما يعلم بيه الا ربنا طب ليه نتهم الزمن مادومنا احنا اللي بنمثله...طب ما نصلح من نفسنا الأول عشان العكس يحصل "نعيب زمننا والعيب فينا"
للأسف كل اللي أقدر أقوله اللهم عافنا وإياهم وربنا يهديهم.

Ahmed Essawy said...

الي وفاء

اللهم اهدينا و اهدهم و عافنا و عافهم.
اترك في النهايه قول الامام الشافعي.

نعيب زماننا و العيب فينا
وما لزماننا عيب سوانا

و نهجو ذا الزمان بغير ذنب
و لو نطق الزمان لنا هجانا

فدنيانا التصنع و الترائي
و نحن به نخادع من يرانا

و ليس الذئب يأكل لحم ذئب
و يأكل بعضنا بعضاً عيانا

Rehab Mostafa said...

فعلاً الحمد لله اننا منعزلين عن الجامعه كلها ومحدوفين في أخر الجامعه علشان الكلام ده مش ف جامعة عين شمس وبس ده موجود عندنا وف الشارع وف أي مكان هتمشي فيه هتلاقى مناظر زي دي وماتعرفش فعلاً العيب من ميين
زي ما وفاء قالت كده ازاي اصلاً البنت تنزل من بيتها كده قدام باباها ومامتها بالمنظر ده وماحدش فيهم يعترض ولا يقولها حاجه ونفس الحكايه الولاد بس دول اعتقد التحكم فيهم صعب شويه
بس ف النهايه دي حاجه من جواهم هما يمكن بيقلدوا الغرب وخلاص أو يمكن فرحانين بنفسهم كده وعاجبهم منظرهم المستفذ ده
في كلمه قالها الشيخ محمد عبد الفتاح امبارح احترمتها اوي: قالك المفروض الواحد قبل ماينزل يبص في المرايا يشوف منظره ده يرضي ربنا ولا لأ
بس المهم الواحد يتغير من جواه الاول

Ahmed Mubarak said...

مش عارف يا عيسوي لية مواضيعك بتحرك نفسي..وكل مرة على البلوج بتاعك تخليني أسأل نفسي نفس السؤال
هو احنا هنفضل لغاية امتى كدة؟
وكل مرة بفتكر نفس الكلمتين في دماغي مش عارف لية
أحيانا بقول مستحيل..لكن برجع وأقول..ما أيام سيدنا عمر كان العدل والامان..وأيام الخليفة عمر بن عبد العزيز كان العلم والاقتصاد الكويس

لكن المشكلة تتلخص في كلمتين
مبنفذش الدين..وانا أول الناس التي لاتنفذ الدين..وبالتالي مفيش ضمير

Ahmed Essawy said...

الي رحاب و احمد مبارك

شكرا علي التعليق بس للاسف معنديش تعليق عليكم .
:)

HoNdA said...

سلام عليكم انا من جامعة المنصورة وعندى زى الى عندكم زيااااادة الجامعة متقسمة مناطق للحبيبة كل منطقة حسب الجو فى مناطق للصبح ومناطق للعصر عشان الشمس مانتو عارفين بقا لازم الجو يبقا رومانتيكى ومش كده بس دول حتى احتلو استاد الجامعة عشان فاضى تلاقى بيحبو بعض هناك بجد بيحتلو الجامعه وغصبن عنك متقدريش تقعدى فى اى اماكن من دى بجد والا هتتشبهى اصل معروف مين الى بيقعد فيها ومناقيين اماكن تحفة الواحد بيبقا نفسه يقعد فيها بس هنقول ايه ومش بعيد وانت ماشى تلاقى شلة مختلطة بتلعب صلح بجد من كتر ماتمشى وتشوف الكابلز تقول ان الجامعه كلها مرتبطةوفى منطقة اسمها الصنية الى عايز يتفرج على ازياء البنات والشباب الهايف يروح هناك بجد ربنا يهدى انا مرارتى اتاكلت خلاص وبقيت بكره الجامعه م المناظر الى بشوفها لانى بزعل جامد ع شباب مصر وبقول دول هيبقو اباء ازاى اصلن الحمدلله الذى هدانا وماكنا لنهتدى لولا ان هدانا الله