التخطي إلى المحتوى الرئيسي

فوفو اتكتب ليه عمر جديد



سيناريو فيلم السينما :

فوفو (الي هو انا ) قرر انو ياخد رخصه قياده سيارات لانه مش تمام في السيارات الي بيكون الجير فيها عادي مش اوتوماتك .... علشان هو اخد اعفاء من الجيش من كام يوم ... و اصبح للمرة التانيه من فئه عامه الشباب (معندوش شغله ولا مشغله ) قرر ياخد الرخصه يسلي بيها وقته...

النهارده كان عليه اول حصه و هي حصه نظري ( مش سواقه يعني ) الساعه سته المغرب .و علشان فوفو بيحب يحترم المواعيد .... و كمان الشركه بتاعه التعليم دي قريبه من بيته راح في المعاد الساعه سته ..

الساعه 6.00
دخل مقر الشركه في الدور الارضي و قالهم ان دي اول حصه ... قالو له اطلع الدور الاول في وشك علطول حتلاقي لوحه بأسمنا...

الساعه 6.01
دخل بوابه المول الي فيه مقر الشركه متجه للدور الاول ... بس فوفو لقتى السلم مترب و ضلمه .... فقرر انو يطلع علي المصعد (أسانسير) اهو دور واحد والسلام ... كل الي عمله فوفو في حياته انو ضغط علي رز الدور الاول ... بس يظهر ان المصعد كان ليه وجه نظر تانيه ... المصعد طلعني شويه حلوين و بعد كدا وقف ادام حيطه .

الساعه 6.02
فوفو لما لقي المصعد بيخرف ... و لقي نفسه ادام حيطه ... قال اكيد دا مش باب الدور الاول ... :D
داس علي زرار الدور الاول ... مش شغال .... الدور التاني .... مش شغال ....الارضي ....برضو مش شغال ....ايه دا المصعد باااااااااااظ ....

الساعه 6.03
فوفو قرر يدور علي اخر زرار ...الجرس ... علشان الامن يسمعوه او البواب او أي حد ماشي ....و لكن علشان المشهد يكمل ... الجرس كان بايظ ....

الساعه 6.04
فوفو .... قعد يفكر شويه مذهول من الوضع .... بيقول لنفسه .... انا كدا غالبا اتحبست ... لان انا بقالي بتاع 5 دقايق بطلع دور .... مش معقول ....
هو الناس الي بيتحبسو بيعملو ايه ؟؟؟؟؟؟؟

الساعه 6.06
فوفو قرر انه ينادي علي الناس و يخبط علي الباب زي ما كان بيشوف في الافلام .... و في الاخر حد يسمعه .....و تخلص المشكله ... بس يا تري الناس بتنادي بتقول ايه .... انا مش بنت علشان اقعد اصوت و الاقي الناس تتلم عليا .... انا راجل ... هو الراجل بيقول ايه ؟؟؟؟ فوفو قال انا لو عقدت افكر الاكسجين حيخلص انا لازم اتصرف بسرعه .... اعصابه لسه متماسكه .... متوقعش حاجه كبيرة حتحصل اكتر من كدا .... قال ... يا ناس ... انا محبوس في الاسانسير ... و قعد يقول كدا بتاع 8 دقايق ... بس للاسف ادامه حيطه مينفعش يخبط عليها لانها مش حيطلع صوت !!!!!!!!

الساعه 6.14
فوفو بص في الساعه ... اربعتاشر دقيقه جوه و مفيش حد سامع ... لازم ياخد قرار اسرع .... افتكر ان اخته قالت ليه خد الموبيل معاك و هو مكنش عايز و في الاخر اخده معاه .... اتصل بمين ؟؟؟؟ ايه دا كمان الموبيل مش فاضل فيه الا شرطه و البطاريه تفضي ... و الارسال نازل قوي ...قرر انو يتصل علي 121 و يقولهم علي الحكايه خصوصاً ... لانو بدأ يدوخ .... مش عارف دا بسبب القلق ولا الاكسجين يقل .... في الاخر كلم 121ردت عليه بعد دقيقتين ولا حاجه .... و اخدو عنوانه و مكانه و ايه الحكايه بالظبط ... و فضلو معاه علي الخط بتاع 5 دقايق و بعد ما عرفو ان المصعد فيه كهربا قالوا ... معلش دا مش تخصصنا ...احنا طوارئ الكهرباء بس ... اتصل علي 122 ...

الساعه 6.21
فوفو قفل السماعه و بيبص في البطاريه ... الحمد لله الشرطه الاخيرة لسه منزلتش ... و طبعا متغاظ في وقت مينفعش فيه يتغاظ من طوارئ 121 ..... المهم بسرعه اتصل علي 122 و قعدت البداله بتاعه دقيقتين تانين شغاله موسيقي و صوت مسجل بيقول سوف نقوم بالرد عليكم حالاً .... حالاً دي اخدت بتاعه دقتين ولا حاجه ... و الراجل الجديد اخد البيانات من تاني و المكان و السبب و حوارات كتير كدا.... بس الراجل دا حسسني بخطورة الموقف خصوصا اني بقالي بتاع نص ساعه في المصعد و ادام حيطه و قولتله اني دايخ ...

الساعه 6.26
الطواؤي 122 قالتلي خليك علي الخط لغايه ما تجي الطوارئ ... بس انا فهمت قصدو ... هو متوقع اني ممكن اموت لاني بقالي كتير جوه ... بجد ساعتها كنت فعلا مخنوق... مش قادر اخد نفس براحتي او قلقان بصراحه مش قادر احدد ... و كنت قاعد علي الارض اسبح ربنا ... و سلمت امري لربنا ... المهم جتلي مكالمه تانيه علي ال waiting رغم ان انا كنت مازلت علي الخط مع الطوارئ ... نمرة بيت ... معرفهاش ... المهم لما رديت لقيت واحد بيقولي ... متخفش احنا في الطريق ... و قفل علطول ... بيني و بينك انا دماغي راحت بعيد .... و قولت دا ملك الموت.... و بيستأذن ...

الساعه 6.31
سمعت صوت عربيات المطافي و النجده تحت .... قلت الحمد لله في امل اهو .... و لقيت واحد بيكلمني من بئر المصعد و عمال يكلمني ... اسمك ايه ... عمرك كام ؟ حاجات كدا ... و قالي متقلقش . ...علشان يتأكد اني لسه علي قيد الحياه ... و في نفس الوقت سامعه بيكلم حد باللاسلكي ... رغم انو كان بعيد ... الا ان بير المصعد كان هادئ و أي صوت بيكون قريب مني ...

الساعه 6.34
لقيت ناس تانيه بتسألني انت في الدور الكام و انا برد انا مش عارف ... بس الاسانسير مطلعش كتير ... اصل العمارة بتاعه 15 دور ولا حاجه ... سألوني عن اقرب باب ليا فين ... قولتلهم معرفش ...و زي الي قبله قالي متقلقش ... و الي زاد المشهد رعب الكهرباء انقطعت عن العماره كلها .... قعدت تنقطع و تيجي تاني ... يا تري صدفه ولا هما الي عملو كدا ... انا معرفش ....

الساعه 6.41
بعد فشل تحريك المصعد ..... عده مرات .... لقيت المصعد بدأ يرتفع 2سم كل دقيقه .... بيرتفع ببطئ شديد ...
بدون الامل في وجود باب ... غالبا ... الادوار الاولي ملهاش ابواب ...و كالعاده واحد تاني جه يقولي متألقش ... كل ما فوفو بقي يسمع الكلمه .... يعرف ان الموضوع اتعقد اكتر ... و بقي نفسه ميسمعش كلمه متقلقش .....

الساعه 6.44
لقيت ادامي بدل الحيطه .... فتحه غالبا للتهويه ... مغلقه بشبكه حديد مسلح و مفيش نور نهائي او كهرباء .... و لكن دا كان اخر قرار لهم ... جابو مقصات حديد و قعدو يقصو الحديد و يكسرو في الحيطه ..... علي اضواء الموبيلات ... و من شده التكسير واحد دخل 3 اسياخ حديد في ايده و غالبا حياخد غرز في ايده ...ربنا يشفيه ... و الله عملو الي عليهم بزياده .... لغايه ما فتحو فجوه كافيه لاخراج شخص .. و شالوني ... و اخرجوني للحياه من تاني ....زي الي بيتولد من جديد ...

الساعه 6.50
خرجت للحياه مره اخري .... انا الي اتحبست و هما الي اصابو.... انا جتلي عربيه الاسعاف و لكن هما الي استخدموها... ..الحمد لله ...لم اصاب الا بقليل من التراب علي ملابسي .... مقدرتش اقول غير ان ربنا مش عايز ياخد عمري دلوقتي ...يا رب اكرم و وفق الجماعه اللي انقذوني دول للخير حيث كان... و ابعدهم و بعاد بينهم و بين الحرام ...

الساعه 9.30
فوفو بيكتب المقاله دي دلوقت... لان كل الي قولتو دا بجد مش هزار ...

الحمد لله الذي لا يحمد علي مكروه سواه ...



تعليقات

الحمدلله

اللي حصل معاك ده رسالة ليك ورسالة لكل واحد عرف الموضوع عشان الواحد ياخد باله ان في لحظة واحدة هيموت وممكن ميكونش عامل حسابه

ربنا يحفظك يا احمد
‏قال أحمد
سلامتك يا أحمد ألف سلامة

:)
اللهم لك الحمد
مهلة جديدة أعطيت لك أسأل الله أن يعينك على حسن استعمالها
ولا تكن ممن قال الله فيهم
ونخوفهم فمايزيدهم إلا طغيانا كبيرا

انت قلت فيه جاتوة وحاجة ساقعة ولا انا ماسمعتش كويس
يا خبر يا احمد

الحمد لله يبني انك بخير الحمد لله فعلا
معلش تعيش متاخدش غيرها ان شاء الله
موقف صعب فعلا ويخلي الواحد يفكر في حاجات كتير بيعملها

لا بجد الف سلامة عليك والله الحمد لله
‏قال Ahmed Mubarak
الف سلامه عليك يا فوفو..محدش بياخد اعفى من غير مقابل
:D

طول عمرك مواضيعك حلوة..وطريقك لسرد الموضوع احلى

مرة تانية ربنا يخليك لينا على طووووووووووول
‏قال Nesma Mostafa
:'( ah dah , ana 7sl feya keda bs f asancer el kolya w tl3t bsor3a el hamdollah y3ne, bs kwayes 2nk 2drt tkml lel 2a7'r el hamdollah :D bs bsra7a ana sm3t 2n fe nas mt3'zen mnk 3lshan a7'dt 23fa f aked homa ele 3mlo fek keda
‏قال Ahmed Said
الحمد لله جت سليمة
بس اخدت حصة السواقة بعدها ولا روحت
:)
‏قال Rehab Mostafa
ألف حمد لله على السلامه
فعلاً هي دي ضريبة الاعفاء
على فكره أنا كنت دايماً بفكر لو حصلي الموقف ده ممكن أعمل ايه بس بصراحه كنت بفكر في حدود اسانسير الكليه وكنت بلاقي حلول ومره فعلاً حصلي الموقف ده بس كان في دور مش حيطه بس مجرد اني حطيت ايدي على الليزر الباب فتح ( اسانسير الكليه برضه) وبصراحه شكراً انك جبتلي حلول تانيه
وفعلاً دي رساله ليك إحمد ربنا ... ربنا يحفظك ومايحرمناش من مواضيعك أبداً :)
‏قال Zo0oZ
حمد الله ع السلامه

ما كانش معاك رقم مكتب السواقه في العماره نفسها أقرب ؟
:S

كويس فكرة 121 و 122 .. أول مره أعرفهم .. الاولى خدمة طوارئ الكهربا .. و التانيه ايه ؟

ضحكت جدا من الفكره اللي جت في بالك لما قلت : نمرة بيت ... معرفهاش ... المهم لما رديت لقيت واحد بيقولي ... متخفش احنا في الطريق ... و قفل علطول ... بيني و بينك انا دماغي راحت بعيد .... و قولت دا ملك الموت.... و بيستأذن
:D

ربنا يحفظك من كل شر .. و مبروك على الاعفاء
:)
‏قال Wafaa
سلام عليكم ورحمه الله وبركاته
ألف سلامه عليك يابشمهندس والحمد لله جت سليمه.. فعلا اتكتبلك عمر جديد.

انا حصلي موقف زي ده بس مش في مصعد كان الموضوع ابشع من كده بشويه غاز بقي وإختناق وفقدان عن الوعي.. وكمان كان أيام إمتحانات .فعلا كنت حاسه اني في اللحظات الأخيره من عمري بس الحمد لله عدت.

بس واضح ان اول درس في السواقه كان صعب اوي انا كنت ناويه اتعلم سواقه بس بعد الكلام ده هغير رأيي:D.
اه نسيت مبروووووووك الإعفي.
‏قال Ahmed Essawy
الي محمد عامر :
و الله فعلا يا عامر ... مقدرش اقول الا ان دا كرم من عند ربنا ....
==

الي مبرمج حر :
الله يسلمك و يخليك و يبارك فيك و يكرمك ... انا عمري ما شوفت علي الحقيقه ...بس و الله بفرح قوي لما اشوفك بتكومنت عندي...بحس ان البلوج نور ...في ناس الواحد بيحبهم من غير ما يشوفهم ... و الله يا احمد اني احبك في الله .
==

الي عصفور المدينه :
لا اانا مقولتش في جاتوه ولا حاجه ... انت عايز ايه ؟؟؟
:P
اللهم ارزقنا حسن الخاتمة اللهم اعني على شكرك وحمدك وحسن عبادتك امين امين امين يا رب ...
==

الي آلام و امال :
الله يسلمك ... الحمد لله علي كل شئ .
==

الي احمد مبارك :
الله يسلمك يا كوكو ... الله يكرمك يا ابو حميد ..
كل الي كلموني في التليفون فعلا ... بيقوليلي حلاوه الاعفاء... :D
==

الي نسمه مصطفي :
حمدا علي السلامه من اسانسير الكليه .. :D .... معاكي حد في حوار الناس المتغاظه دا .... الي يكلمك قوليله ...ان مصر شيفاني اني حخدم البلد برة الجيش اكتر ...الجيش دا للناس التعبانه .:P
اه صحيح العصفورة قالتلي انك حتسافي السعوديه ... :D توصلي بالسلامه ان شاء الله .
==

الي أحمد سعيد :
لا يا بشمهندس احمد ... مش كفايه الحصه الي انا أخذتها دي !!!!!!!!
==

الي رحاب مصطفي :
الله يسلمك و يكرمك ....
:( دي مش ضربه الاعفاء ... مصر شيفاني اني حخدم البلد برة الجيش اكتر ...الجيش دا للناس التعبانه .:P
==

الي ZoOoZ :
لا طبعا .. النجده اقرب ...من مكتب السواقه .. لاني اكتر واحد ممكن اوصفلهم الوضع ...في الحاجات دي انا مضمنش الا نفسي ... :)
وانا بردو ..حاجه كدا ....قبل المكالمه دي كنت فاكر الاتنين نفس الحاجه ...
الله يكرمك ... و برضو العصفوره قالتلي انك مسافره ... توصلي بالسلامه:D ....
==

الي وفاء :
و عليكم السلام و رحمه الله وبركاته ..... الله يسلمك ... الحمد لله علي كل شئ ... سلامات الف سلامه ... يا بشمهندسه ... يظهر ان بشمهندسين الكليه بسبع ارواح ...
:D
الله يبارك فيكي ...
==

الي الجميع ....
ياريت كل واحد يقول لكل اهلو علي الرقم
طوارئ الكهرباء ...121
و النجده 122 ...
علشان الامر ما يسلمش .... حفظنا الله و اياكم من كل مكروه ...
‏قال Mohamed Gamal El-Din
يعني من الاخر انت لسه عايش ... اممممم طيب :D:D

الحمد الله انها جت علي خير ... مش عاوز الفلاشه بتعتك يا كابتن ؟
‏قال Great wishes
الف حمد الله على السلامه

وربنا يبرك فى عمرك يارب
‏قال Nakeep
ألف سلامة يا عيسوى
معلش جت متأخرة
‏قال Zo0oZ
الله يسلمك .. و جزاك الله خير على الافاده

هاقول لاهلي عليهم لما نكون في مصر ان شاء الله و يارب ما نحتاجهم
:)

أنا شاكه في العصفوره بتاعتك .. هو عصفور واحد ومش عارفه لو كان دخل الجيش ولا طار منه
:D
‏قال simply me
الف سلامه عليك
كل ده يحصل وانا ماعرفش

ربنا يسلمك من كل سوء

انا اصلى مجربه حبسه الاسانسير دى
بس معايا بقى
ماوقفش
لالالالالالالالالالالا

ده فضل يطلع شويه ويتقهقر درررررررج شويه

وانا ساعتها قلبى وقف
وخلات خلاااااااااااص
عليه العوض

الحمد لله انك خدت موبايل اختك
هاتلك موبايل بقى واعمل زيى

وحمدا لله على سلامتك
‏قال أحمد
والله أنا كمان يا أحمد بحبك فى الله

:)

ربنا يبارك فيك يارب

:) :)
‏قال Ahmed Essawy
@Mohamed Gamal El-Den
عاوز الفلاشه و الكتابييين يا كابتين ..
:P:P

@Great wishes
الله يكرمك ...
منوره البلوج ...اهلا و سهلا
اعتقد دي اول زياره ...
::)

@ Nakeep
الله يسلمك يا ابو حميد ...
ولا يهمك ...

@ ZoOoZ & مبرمج حر
انا برد علي الواحد مرة واحده .. علشان كدا مش حرد
:P:P
‏قال Ahmed Essawy
@ بندقه
اسف ... نسيت اكومنت عليكي ...
معلش .
عموما الله يسلمك و حمدا علي السلامه برضو :)
‏قال غير معرف…
حمدا لله على السلامة ياكابتن
والله حياتك مغامرات لذيذة
(action movie)
‏قال Ahmed Essawy
@memo2008
الله يسلمك و يباركلك...
سعيد بوجودك بس حكون سعيد اكتر لو عرفت انت مين ؟؟؟
:)
‏قال FTM
حمد الله على السلامة ..بس انت اتصرفت كويس جدا على فكرة ..تخيل لو الموبايل كان فاصل شحن ولا الرصيد خلص ؟ الحمد لله ربنا سلم

المشاركات الشائعة من هذه المدونة

خطوات تصب في طريق النجاح

ما من فرد منا في هذه الفترة يبحث عن عمل الا وسيبدأ مع اي شركه في اي مجال بالمقابله الشخصيه التي هي أولي الخطوات لتقديم و لتقييم الفرد المرشح . المقابله الشخصيه اختبار ذات جوانت متعدده .... مثلها مثل اي شئ في هذه الدينا .... اختبار و كل اختبار له عدده خطوات تصب في طريق النجاح ... اردت اليوم ان الخص بعض هذه الخطوات من خلال ما قرأته من مواقع متعدده هنا لتعم الفائده علماً بأن هذه المواقع مشار اليها في نهايه المقال . المرحله الاولي - التحضير : هي تلك المرحله ما قبل المقابله نفسها . تسمي في بعض الاحيان بالواجب المنزلي . كل ما عليك في هذه المرحله ان تراجع معلوماتك فغالبا انت معرض لاختبار (تقني technical و ذكاءIQ و شخصي peronal test ) . حاول ان تجلب معلومات عن الشركه... عنوانها ... مجالها .... فروعها ... الاشخاص الذي سوف تقوم بمقابلتهم في المقابله الشخصيه (يمكنك ذلك من خلال موقع الشركه علي الانترنت او من خلال اصدقائك و من حولك ) هذه المعلومات سوف تدعمك وقت المقابله مع الشركه . جهز صورة شخصيه و السيرة الذاتيه فأحياناً كثيرة تحتاج الشركه لها . حرصك علي هذه الاشياء الصغير سيعطي فرصه للشركه لكي

أجمل ما قيل في الاخوة في الله

للامانه لست أنا صاحب هذه المقاله انما جاءتني كأيميل يتناقله الناس بدون صاحب :) قال تعالي :  (إنما المؤمنون إخوة) الحجرات ايه 10 . وقال صلي الله عليه وسلم (المسلم اخو المسلم لا يظلمه ولا يسلمه). وقال ايضا (لا يؤمن احدكم حتي يحب لأخيه ما يحب لنفسه) قال الامام احمد بن حنبل ""إن لنا أُناس لا نراهم إلا في كل عام مرة نحن أوثق بمودتهم ممن نراهم كل يوم"" قال عمر رضي الله عنه في مجلس المهاجرين و الانصار (( أرأيتم لو ترخصت في بعض الأمور ماذا كنتم فاعلين!! فكرر فلم يجيبوه )) فقال البشر بن معاذ: لو فعلت قومناك تقويم القدح ( السهم الذي يرمي به عن القوس) قال: عمر:أنتم إذن !أنتم إذن. ثمرات المحبة  قال تعالي في حديث قدسي:  (وجبت محبتي : للمتحابين فيَّ ، و المتجالسين فيَّ ، و المتزاورين فيَّ ، و المتباذلين فيَّ). قال رسول الله صلي الله عليه و سلم (الله في عون العبد ما كان العبد في عون أخيه). قال رسول الله صلي الله عليه و سلم يا أيها الناس ! اسمعوا ، واعقلوا ، واعلموا أن لله عز وجل عبادا ليسوا بأنبياء ولا شهداء ، يغبطهم النبيون والشهداء على منازلهم وقربهم

حل مشكله عدم الاضاءه او السطوع عند ترقية لينوفو لابتوب الي ويندوز 10

اتبع الخطوات بالاسف اذا واجهت مشكله في سطوع الشاشه بعد ترقية لابتوب لينوفو Z500 الي ويندوز 10 lenovo z500 touch brightness not working after windows 10 update 1:-   Win + R 2:-   Type in 'regedit' 3:-   Press F3 to bring out the find menu. 4:-   Type in 'FeatureTestControl' And Click On 'Find Next' 5:-   Once Found 'Right Click' on it and select 'Modify' 6:-   Replace the Original Value By'ffff' 7:-   Save It And Restart The System 8:-   Problem Solved